لەسوید توندو تیژی ناموس پەرستی لەناو کورد بەردەوامە
رێکخراوەکانی ژنان متمانەیان بەیەک نییە
خەریکە کوشتنی ژن دەبێتە یەکێک لەناسنامەکانی کورد لەناو سویدییەکان
کێشەکانی ژنان وەک قۆنتەرات ئەدرێتە چالاکوانەکانی ژنان
هەندێ لە رێکخراوەکانی ژنانی کورد لەسوید وەک سەرمایەداری و بزنس مامەڵە لەگەڵ پرسەکانی ژن دەکەن
رزگار رەزا چوچانی / سوید
بەهۆی بەردەوامی توندوتیژی ناموسپەرستی و کوشتن لەسەر شەرەف، وەختە توندوتیژی لەزۆر جێگایەکی ئەوروپا، وەک یەکێک لەناسنامەکانی ناسینەوەی کورد جێگە دەگرێت، رێکخراوەکانی ژنانی کوردو ژنە چالاکەکانی ئەو بوارەش ئامادەی کاری هاوبەش نین بۆ رووبەڕوبونەوەی ئەو دیاردەیە، سەرچاوەیەکی ئاگادار لە کاری رێکخراوو ژنەچالاکەکانی کورد لە سوید، هۆکاری ئامادەنەبونی کاری هاوبەشی ژنانی کورد، بۆ رەچاوکردنی دەستکەوتی مادی و بەرژەوەندی شەخسی ژنان دەگێڕێتەوە، رێکخراوەکانی ژنانیش نکۆڵی لەو راستیە ناکەن، بەرپرسی رێکخراوی هەرگیز فاتیمەو پێلا لەیاد ناکەین دەڵێت” لەناو رێکخراوەکانی ژنانی کورد لەسوید، هەندێ شەخس و هەندێ رێکخراو وەک سەرمایەداری و بزنس مامەڵە لەگەڵ خەبات بۆ پرسەکانی ژن دەکەن “.
ئەگەرچی وڵاتی سوید بەهۆی ڕێزگرتن و فەراهەمکردنی بەشێکی زۆر لەمافەکانی ژنان بەوڵاتی ژن ناودەبرێت، بەڵام لەناوخۆو خودی ئەو وڵاتەش تاکو ئیستا توندو تیژی دژی ژنان بونی هەیە، لەناو پەنابەرانی وڵاتانی رۆژهەڵات لەوڵاتەدا رێژەی توندوتیژی بەرزتر دەبینرێت و کوردیش لەونەتەوانەن کە لە توندوتیژیەکان لەبەرانبەر ژنان، وەک ژنێکی چالاکی بوارەکە دەڵێت”پشکی گەورەی بەردەکەوێت و خەریکە کوشتنی ژن دەبێتە یەکێک لەناسنامەکانی کورد لەناو سویدییەکان”. یەکێک لە ژنەچالاکەکانی کورد لە سوید کە نەیویست ناوی بهێنرێت بەهۆی ئەوەی کە” ژنانی کورد لە سوید راستیان پێ قبوڵناکرێت و رەنگە بکەونە تەشهیر پێکردنیشم بەناوی ترەوە”. راستییەکان بۆ سڤیل ئاشکرا دەکات و دەڵێت “ژنانی کورد لەوڵاتی سوید، زۆرینەی هەرەزۆریان چالاکی بۆ ژن ناکەن، ئەوەندەی چالاکی بۆ حزب و پارە دەکەن”، ئەو ژنە چالاکەی کورد بو سڤیل زیاتر وتی” ئەگەر لەناو نەریتی کورد توندوتیژی بەرانبەر بەژنان هەبێت، مەسەلە ئەوەیە کە لەسەرەتای دروست بونی ئەو کۆمەڵگەوە، پیاو سالار بووە و پیاوان کارو خەباتیان کردووە، ئەو ژنانەش کە چالاکییان کردووە زیاتر لە خزمەتی چالاکی پیاواندا بوون و بۆ ئامانجەکانی ئەوان کاریان کردووە، خۆ ئەگەر ژنێکیش بەناوی خەباتکردن بۆ ژنان کاری کردبێت، ئەوە بەبێ گومان ئامانجێکی تری هەبووە، کە ئەویش بەکار هێنانی کێشەی ژن بووە بۆ خۆدەرخستن و دەستکەوتی شەخسی، کاتێک ژنی چالاک نەبوو بەجدی و مەبدەئی کار بۆ ژن بکات و هەموو کارەکان بۆ دەستکەوتی زاتی بێت، کێشەی ژن هەر لەجێی خۆی دەبێت بۆیە ئەوەندەی ئەو هۆکارانەی کەباسم کرد لەباری پیاو سالاری، خودی ژنە مەساڵح پەرستەکان، بازرگانە بچوکەکان بە پرسی ژنەوە، نەک چالاک بۆ پرسی ژن هۆکار و هێزی بەردەوامی مانەوەی ئەو رەوشەن، بەڵام بێگومان ژنی خاوەن مەبدەئیش هەن لەو بارەوە بەپاکی خەبات دەکەن، بەداخەوە پاکی ئەوانیش بووە بەژێر لافاوی زۆرینە بەرژەوەندی پەرستەکان”.
وەک پشتراستکردنەوەیەکیش بۆ قسەکانی وتی” ئەگەر ژنە چالاکەکانی بواری ژنان، دەڵێن دەسەڵاتی کوردی دەسەڵاتێکی پیاو سالارە، یاساکانی کوردستان یاسای وڵات و پەڕلەمانێکی پیاو باڵا دەستە، بۆیە ناتوانین زیاتر لەوە بچینە پێش، ئەگەر رۆشنبیرەکان دەڵێن ژنان بۆیە لەکوردستان ناتوانن لەخزمەتی ژنی کوردا کار بکەن سەربەحزبەکانن و حزبەکانیش کێشەیان بۆ ژن دروست کردووەو رێگە بەوە نادەن کێشەکان چارەسەر ببێت، ئەگەر دەڵێن مەسەلە ئەوەیە دین باڵا دەستە لەو وڵاتە و دین هۆکاری توندوتیژییەکانە، باشە خۆ لە وڵاتێکی وەکو سوید نە دەسەڵاتی کوردی هەیەو نە پەرلەمانە پیاو سالارەکەی کوردستان هەیە و نە دەسەڵات و رێکخراوە حزبیەکانی ئەوێ هەن، ئەی بۆ لێرە ناتوانن هەنگاوی جدی هەڵگرن؟؟ ئەگەر لە کوردستان حزب سەرچاوەی بژێوی ژیانی ژنە چالاکەکانی کوردە و بەهۆی بژێوی ژیانیان ناتوانن لە بڕیاری حزبەکان دەربچن، بەهۆی خەتەری دین ناتوانن هەنگاوی گەورە هەڵگرن، خۆ لە سوید ئەو شتانە نییە، بۆچی ژنانی کورد کە خۆیان ناو ناوە چالاکوان، لە پرسەکانی ژن ناتوانن هەنگاوی گەورەتر لەوانی کوردستان هەڵبگرن؟ لەکاتێکدا نە خەتەری دین هەیە و نە پارە و نان بڕینی حزب هەیە، پارە و نان لە حکومەتی سوید وەرئەگرن و یاسای بێلایەنیش هەیە بیان پارێزێ، لێرە چییان کردووە بۆ ژنی کورد؟ نازانم ئایا شیڕە شێڕی سەرجادەو بابەت بڵاوکردنەوە بەزمانی سویدی و وەک پۆلیسی فریاکەوتن فڕاندنی ژنان لەماڵەکانی خۆیانەوە بۆجێگایەکی ئارام، ئەوە حەلکردنی کێشەکانە؟ ئەویش لەکاتێک کە شۆسیال پەیوەندی پێوەکردن بۆ کارێکی ئاواو وتی کێشەیەک هەیە، یان حەل ئەوەیە کە دەبێت کاری ریشەیی گەورە بکەن بۆ ئەو پرسە”.
هەر ئەو چالاکوانە کە نەیویست ناوی بهێنرێت ئەوەشی وت” کاری گەورە کە حکومەتی سویدیش ناچار بەهاوکاری و زەمینەسازی کاری مەیدانی زیاتر بکات، کۆبونەوەی ژنە چالاکەکانی کوردە لەودەوری یەک و کۆبونەوەی رێکخراوەکانی ژنانە، تا پێکەوە پرۆسەیەکی گەورە بەرپا بکەن، بۆ تێگەیاندنی خێزانە کوردەکان لەم وڵاتە، تا بتوانن ئەم خێزانانە بکەنە نمونە بۆ وڵاتەکەی خۆشیان، بەڵام هیچ ژنێک لە دەوری یەک کۆنابێتەوە، دوو رێکخراوو ئامادەنین پێکەوە کار بکەن، ئەویش بەهۆی ئەوەی رێکخراوەکانی ژنان گومانیان لەیەکە، وەک ئەوەی کاتێک رێکخراوێک دەستپێشخەری گردبونەوەیەک دەکات، رێکخراوەکانی تر لایان روونە مەسەلە ئەوەیە دەستپێشخەرییەکەی بکاتە راپۆرتێک وەک چالاکی پرۆژەکانی خۆی و پارەی پێ وەربگرێت لە وڵاتی سوید، بۆیە ئەوانیش ئامادە نین هاوکاربن بۆ پارە دەستخستنی، هەوڵ ئەدەن پرۆژەیەکی تریان هەبێت بۆخۆیان کە هەم کاری خۆیان بێ، هەم پارەی بۆخۆیان بێت، بەڵگەم هەیە بۆ ئەم باسە کێ لە ژنانی کوردی سوید ئەڵێ وانییە، با بەبەڵگە قسە بکات بۆ نمونە، دوای ئەوەی باوکێکی کورد له سوید کچه‌که‌ی ده‌کوژێ به پاساوی پاراستنی شه‌ره‌ف، له رۆژی دوشه‌ممه 16/11/2009/ لەهەموو میدیاکانی سوید و دنیا دەنگی دایەوە, دوای ئەوە و لەسالیادی روبەروبونەوەی توندوتیژی، هەندێ ژن کۆبونەوەو داوای گردبونەوەیەکیان کرد، لە پێناو حەلکردنی پرسەکانی ژنان کە سەنتەری نینا، لەگەڵ چەند ژن و رێکخراوێکی هاوڕێی خۆیان داوای ئەو گردبونەوەیان کرد، ئەوە داوایەکی باش بوو، بەڵام لەجێی بەدەمەوە هاتنی ئەم داواکارییە، کۆمەڵێک ژنی چالاکی تر کۆبونەوە هەمان داواو هەمان ئامانجی ئەوانیان راگەیاندو ئەوانیش داوای کۆبونەوەیەکی لەو شێوەیان کرد، بێ ئەوەی بڵێن ئاخر بەر لەئێمە کۆمەڵێک ژن داوای ئەوەی کردووە، با بچین و دەرفەتێکی باشە بۆ کۆبونەوەو گردبوونەوە دواتر نە ئەمبەر توانی دروست بێت و نە ئەو بەر توانی جا نازانم نەشیان توانی پارە بەوکۆبونەوانە وەربگرن یان نا؟”.
لەبەرانبەردا هەڵاڵە رافع بەرپرسی سەنتەری نینا بۆ داڵدەدانی ژنان لە سوید، کە خۆی و سەنتەرەکەی یەک لەو کەس و رێکخراوانە بوون، لەگەڵ کۆمەڵە ڕێکخراوو ژنێکی چالاک، لەڕێگای میدیاکانەوە داوای گردبونەوەی ژنانیان بۆ روبەڕووبوەنەی توندوتیژی بەشێوەیەکی کاریگەرتر کرد، لەباری کۆنەبونەوەی ژنانی چالاکی کورد بۆ کاری هاوبەش بە سڤیلی وت” راستە ئێمە داوانامەیەکمان بڵاوکردەوە، کە لە راستەوە بۆ چەپ رێکخراوەکانی ژنان هاوکاری یەک بکەین، بیگومان ئەو رێکخراوانەی کەلەو بوارەدا کار دەکەن بیروباوەرو بنەمای فکری جیاوازیشمان هەبێت، نابێتە هۆی ئەوەی کە نەتوانین پێکەوە کار بکەین، به‌ڵکو به پێچه‌وانه‌وه له‌هه‌وڵی ئه‌وه‌داین له‌سه‌ر خاڵه هاوبه‌شه‌کانمان کۆبینه‌وه‌و هاوکاربین، بۆیە ئێمە داوای ئەو گردبونەوەیه‌مان لەخزمەتی پرسەکانی ژندا بەپێویست بینی.
ئێمە لە ٢٥ / ١١ ئەو دوانامەمان خستە بەردەم هەموو ژنانی چالاک، لە پرسەکانی ژنان و مرۆڤ دۆستان و دۆستانی مافەکانی ژن، کە پێکەوە کار بکەین، خەڵکانێکی زۆر بەدەم داواکەی ئێمەوە هاتن و ئێستاش بەردەوامین له رێکخستنی کاره‌کانماندا که له‌م ڕۆژانه‌دا دوایین ئه‌نجامه‌کانتان پێڕاده‌گه‌یه‌نین، راستە کۆمەڵە ژنێکی چالاکی تر دوای بانگەوازەکەی ئێمە کارێکی هاوشێوەیان کرد ، بەڵام هۆکاری ئەوە چی بوو کە نەهاتن من نازانم، دەتوانن لەخۆیان لەپرسن، به‌ڵام ئێمه کاره‌کانمان به‌رده‌وامه‌و ئیستاش داواکارین و له‌هه‌وڵی ئه‌وه‌داین که هه‌ردوو گروپه‌که بکرێته یه‌ک تا ره‌وه‌ندی کوردی له پرسه‌کانی ژنان بتوانێ به یه‌ک نوێنه‌رایه‌تیه‌وه له ئاستێکی باڵادا چ له کۆمه‌ڵگا و چ له‌گه‌ڵ ده‌وله‌تدا ده‌رکه‌وێ.
به‌ڕاستی من نامه‌وێ وه‌لامی هه‌موو ئه‌و ڕایانه بده‌مه‌وه، چونکه هه‌م پێویست ناکات وه هه‌م سه‌ره‌نجامی کار له‌مه‌ر ژنان وه کۆمه‌ڵگا خۆی وه‌لام ده‌ره‌وه‌یه به‌و قسانه. به‌ڵام زۆر کورت هه‌ندێ سه‌رنجم هه‌یه. وەک ئەوەی سه‌رباری هه‌ر که‌م و کاری و که‌م وکوڕییه‌ک، زۆربه‌ی چالاکوانانی ژنا ن و رێکخراوه‌کانیان، ده‌وری به‌رجه‌سته‌و به‌رچاویان بووه له خزمه‌ت به کێشه‌و گرفته‌کانی ژنان، ئه‌گه‌ر کارو ماندوبوونی ئه‌و ڕێکخراوانه و هه‌لسوراوه‌کانی نه‌بوایه توندوتیژی و کوشتنی ژنان له ناو ڕه‌وه‌ندی کوردی چه‌ند به‌رابه‌ر ده‌بوو، ئه‌وه رێکخراوه ژنانه پێشکه‌وتنخوازه‌کان و هه‌لسوڕاوانیان بوون که مه‌ترسی کولتوری پیاوسالاریان له‌سه‌ر ژنان ریسوا کردووه، له‌دژی وه‌ستاونه‌ته‌وه، هوشیاریان په‌ره‌پیداوه و مه‌یدانی کاریان کردوه و به‌کرده‌وه ژیانی ده‌یان ژنیان له مه‌رگ و توندوتیژی رزگار کردووه. هەروەها به‌پیچه‌وانه‌ی دیدی هه‌ندیک له هه‌ڵسواروان، زۆریک له رێکخراوه‌کانی ژنان، ئه‌وانه‌ی که به واقعی دڵیان بۆ مه‌سه‌له‌که لێده‌دا کاری هاوبه‌شیان کردووه، که‌مپه‌ینی هاوبه‌شیان کردووه، کۆرو کۆمه‌ڵی هاوبه‌شیان کردووه، سمینارو پانیڵی هاوبه‌شیان کردووه، تاد، بۆیه ناکرێت که رێکخراوه‌یه‌ک یان که‌سیک ره‌خنه‌ی هه‌بوو یان خۆی به‌هه‌ر هۆیه‌که‌وه بێت ئاماده‌یی کاری هه‌وبه‌شی نه‌بوو، بڵێت کاری هاوبه‌ش نییه، رێکخراوه‌کان متمانه‌یان به‌یه‌ک نییه…...تاد. ئایا ئه‌و ڕێکخراوو که‌سانه‌ی که ڕه‌خنه‌یان هه‌یه خۆیان له‌وباره‌وه چیانکردوه وه چ کاریکی مه‌یدانیان کردوه وه ئێستا بۆ له‌ناو ئه‌و ناوه‌ندانه‌دا نین؟؟، ماندوبوون و کاری مه‌یدانی زۆربه‌ی رێکخراو هه‌ڵسوراوه‌کانی ژنان وبزوتنه‌وه‌ی یه‌کسانی خوازی ژنان جیگه‌ی شانازییه‌و به‌هیچ کلۆجێک به پاره ناخه‌مڵێنریت، وه دڵنیام له‌وه‌ی ئه‌و ڕێکخراوانه‌ی که هه‌ڵسوڕاون به ئه‌ندازه‌ی نیوه‌ی کاره‌کانیشیان ئیمکانیه‌ت له‌به‌رده‌ستیاندا نیه. کارو ماندوبون و تیکۆشانیانی ئه‌و ڕێکخراوانه له‌م کۆمه‌ڵگایه‌دا به‌رچاوه‌و که‌س ناتوانێ نکۆڵی له ده‌ورو نه‌خشیان بکات، ئه‌گه‌ر که‌سێک یان رێکخراوێک ماسکی کردبێت و به‌ناوی کێشه‌ی ژنانه‌وه به‌هره‌به‌رداری شه‌خسی و مادی کردبیت هه‌رگیز ناکاته ئه‌وه‌ی که‌ده‌وری ڕێکخراوه‌کان و هه‌ڵسوڕاوه‌کانی تری ژنان، بخاته ژێر پرسیار”.
گۆڤاری سڤیل هەر بۆ وەرگرتنی وەڵامی هۆکاری پێکەوە کار نەکردنی ژنانی کورد لەسوید، پەیوەندی بە گروپی دووەمەوە کرد، کە هەمان شێوە داوای کاری هاوبەشیان کردووە، دوای داواکارییەکەی گروپی یەکەم و ئامادەی کۆبونەوە نەبوون لەگەڵ گروپی یەکەمدا، بەڵام بەپاساوی ئەوەی کە تاکو ئیستاو لەدوای ٣ مانگ، نەیانتوانیوە لەناو خۆیان قسەکەرێک دیاری بکەن، ئامادە نەبوون هیچ لێدوانێک بدەن.
لەوەڵامی هەمان ئەو پرسانەی کە ژنە چالاکێکی کورد لە سوید بۆ سڤیل خستونیە روو،. سارا موحەمەد وەک ژنێکی چالاک و بەرپرسی رێکخراوی ” هەرگیز فاتیمەو پێلا لەیاد ناکەین ” لە سوید بۆ سڤیل وتی” پێم وانییە لەنێوان ژنانی کورد کەس بەدەم کەسەوە نەچێت، هاوکاری لەنێوان رێکخراوەکان تا رادەیەک بونی هەیە، بەڵام بەپێی پێویست نییە، ئەویش دیارە تا ئاستێک رەبتی بە سیستەمەکەوە هەیە، لە سیستەمی سوید، زیاتر هاوکارییەکانیان لەسەر ئەساسی پرۆژەیە، کە دەبێت لەو ساڵەدا تایبەت لەسەر ئەو پرۆژە کار بکەی، ناتوانێ لەسەر هەموو گرفتەکانی ژنان کار بکەی، ئەو سیستەمەش چالاکییەکان سنور دار ئەکات و وا ئەکات بەداخەوە رێکخراوەکانی ژنان دەستەمۆی سیستەمی ئێرە بن، بۆ ئەوەی کە پرۆژەکانیان قبوڵ بکرێت، رەنگە لەم بارەوە رەخنەکە لەجێی خۆی بێت، چونکە ئەو سیستەمە وا دەکات کارەکان بەشێوەی قۆنتەرات بێت، چۆن قۆنتەرات بە بازرگانێک ئەدرێت، کێشەکانی ژنانیش وەک قۆنتەرات ئەدرێتە چالاکوانەکانی ژنان، بەبڕوای من ئەم جۆرە کارە شایەن بەڕەخنەیە و زەربە لە پرسی ژن ئەدات، هەم لێرەو هەم لەوڵاتانی ئێمەش”.
بۆ بەدەمەوە نەچونی بانگەوازی رێکخروەکانی ژنان، کە داوای گردبونەوە دەکەن، سارا دەڵێت” ئێمە هاوکاریمان هەبووە لەگەڵ ڕێکخراوە جیاوازەکان، هەم لە پەنابەران و هەمیش لە سویدییەکان، بەڵام رێکخراوی ئێمەو شەخسی خۆشم، بۆم موهیم بووە، کە بزانم ئەوکەسەی یان ئەو رێکخراوەی کە داوای گردبونەوە دەکات یان کەمپەینێک بەڕێدەخات و داوای مەوقیفی هاوبەش دەکات، تاچەند جێی متمانەیە، هەم لای من و هەمیش لای کۆمەڵگە، من ئەگەر باوەڕ بە کەسێک نەکەم و لە پراکتیکدا نەیبینم، کە مەبەستیەتی کارەکان لە خزمەتی پرسی ژندا بێت، ناچمە ناو کارو باریان، نامەوێ هیچ کەسێک سوئیسفادە لەناوی من و رێکخراوەکەی ئێمە بکات، بۆ مەبەستێکی تر، هەروەها خەڵکی تریش هەمان مافی هەیە، کەمن داوەتی کارێک یان پرۆژەیەکم کردن، بڕوا بەمن بکەن ئەوکات بەشداری تێدا بکەن، دەبێ ئەو کارانە بۆ خزمەتی کێشەی ژنان بکرێت، نەک بۆ خزمەتی ناوی شەخس و رێکخراو، من وەک شەخس موشکیلەم لەگەڵ کەس نییە، بەڵام بەشداری هیچ پرژەیەکیش ناکەم کە لێی دڵنیا نەبم، ژنانی دیکەش بەهەمان شێوەن، کەوایە ئەو هۆکارەی پێشتر کەباسم کرد کە سیستەمی پرۆژەیەو بەداخەوە شێوەی قۆنتەراتی بە چالاکی بۆ پرسەکانی ژن داوە، لەگەڵ نەبونی بڕوای من و یان خەڵکی تر بەکەسەکان، وا دەکات کۆبونەوە لە دەوری پرۆژەی موشتەرەک ئاسان نەبێت”.
لە ناو ژنانی پەنابەرو ئاگاکانی ئەو بوارە رایەک هەیە کە بڕوای حزبی یەکێکی تر لە هۆکارەکانی پێکەوە کار نەکردنی ڕێکخراوەکانی ژنانە، ئەگەر چی نەبونی هەوڵی جدی و دەستەجەمعی و کوشتن و توندوتیژی بەردەوام لەناو کوردانی پەنابەر، خەریکە ناسنامەی ژن کوژی دەداتە کورد، سەرۆکی رێکخراوی فاتیمەو پێلا ئەو بۆچونە پشتراست دەکاتەوەو دەڵێت” ئەوە رایەکی دروستە، زۆربەی رێکخراوەکان راستەوخۆ یان ناراستەوخۆ، پەیوەندیان بەحزبێکی دیاری کراوەوە هەیە، بەڵام کەباسی رێکخراوەکانی ژنانی کورد دەکەین، بەگشتی بەشەکانی تریش باس دەکەم، نەک تەنها باشور، زۆرێک لە ڕێکخراوەکان تایبەت حزبێک دروستی کردوون و بە هاوکاری وڵاتێکی ئەوروپا لە چوارچێوەی فکرو سیاسەتی ئەو حزبەدا چالاکی و کاری خۆیان دەکەن، بۆیە ئەوەش کاریگەری خۆی هەیە، بەتایبەت ئەو حزبانە کە تازە دابەش دەبن، ئەگەر ڕێکخراوێکیان هەبێ یەکی ترو دووی تریش دروست ئەکەن، ئەگەر حزبەکانیان پەیوەندیان نەبێت و لێک نزیک نەبن، رێکخراوەکانی سەر بە ئەوان چۆن نزیک دەبن؟، یان لەناو حزبەکانی رۆژهەڵات حزب هەیە بووە بە نزیکەی هەشت بەش، بەهۆی کێشەکانی ناوخۆیان، هەر بەشەو ریکخراوێکیشی دروست کردبێت، بێگومان ئامادەنین کاری پێکەوەیی بکەن و دەبێتەوە ڕێگر لە بزوتنەوەی هاوبەشی ژنان”.
بۆ بەکارهێنانی پرسی ژن و دەستخستنی پارە بۆ بەرژەوەندی شەخسی لای هەندێک لەڕێکخراوەکانی ژنان، سارا ئەوەشی وت کە”رەخنەم لەسیستەمی پارەدان هەیە، بۆ رێکخراوەکان لەوڵاتی سوید، نەک هەر بۆ رێکخراوەکان کە پەنابەران دروستی دەکەن، بەڵکو لەناو خودی رێکخراوە سویدیەکانیش ئەو کێشە بونی هەیە، رێکخراوەکانی ژنانی کوردیش لەسوید بەشێکن لە رێکخراوەکانی ئەم وڵاتە، بۆیە لەناو رێکخراوەکانی ژنانی کوردیش لەسوید، هەندێ شەخس و هەندێ رێکخراو وەک سەرمایەداری و بزنس مامەڵە لەگەڵ خەبات بۆ پرسەکانی ژن دەکەن، چونکە مەجالێکەو دەوڵەت پارەی بۆ خەرج دەکات، بۆیە کارکردن لەم بوارە دەکەوێتە سەر ویژدانی شەخسی خۆت، ئەوانەی کەلەو بوارەدا کار دەکەن، خۆیان بە داکۆکیکار دەزانن لە مافی ئینسان، ئەگەر لە زاویە ئینسانییەکەوە سەیری ئەو بوارە بکەن، ویژدانی خۆیان رێگایان پێنادا سوئیسفادە بکەن، هیوادارم ئەوانەی کە سوئیسفادە ئەکەن، تەنها جارێکیش بێت چاویان کێشەو موعاناتی ئەوانە ببینێت، کە داوای هاوکاری لەوان دەکات”.
بۆ وەرگرتنی رای زیاتری رێکخراوەکانی ژنانی کورد لە سوید، سڤیل پەیوەندی بە زۆر ژنێکی چالاک و رێکخراوێکی ژنانەوە کرد، بەڵام زۆرینەیان بە پاساوی ئەوەی کە ئەگەر خراپیش بێت، رێکخراوی ژنان بونی هەبێت لەنەبونی باشترە، ئامادەنەبوون قسە بکەن، بەڵام هیچ کام لەو ژنانەی کە سڤیل پەیوەندی پێوەکردن ئەوەیان نەشاردەوە کە بێ سیقەیی لەنێوان ژنان و رێکخراوەکانیان بونی هەیە و پارە وەرگرتنیش، بەناوی کارکردن بۆ پرسی ژن راستییەکەو ناتوانرێ نکۆڵی لێبکرێت.
