كۆمەڵێك كەسایەتی ئەكادیمی و ئیسلامی بە لیستی چاكسازی و گەشە بەشداری هەڵبژاردنەكانی كوردستان و عێراق دەكەن
وتەبێژی لیستەكە: دوای هەڵبژاردن بڕیاردەدەین ببینە حیزب یان نا
نوچەنێت . سڤیل
رزگار رەزا چوچانی
كۆمەڵێك كەسایەتی كوردستانی و ئەكادیمی و ئیسلامی لەكوردستان لیستێكی سەربەخۆ بۆ بەشداریكردن لەهەڵبژاردنەكانی كوردستان و عێراق رادەگەیەنن، وتەبێژی لیستەكە بۆ (سڤیل) ئاشكرای دەكات، ئەو لیستە بەناوی لیستی چاكسازی و گەشە دەبێت و دڵنیان لەسەركەوتنی لیستەكەیان.
د. محەمەد بازیانی كەسایەتی دیاری ئیسلامی و سەرۆكی سەنتەری هودا بۆ لێكۆڵینەوەو وتەبێژی لیستی چاكسازی و گەشە، بۆ (سڤیل) ئاشكرای دەكات، لەگەڵ چەند كەسایەتیەكی دیاری كوردستان، لەهەڵبژاردنەكانی عێراق و كوردستان بەلیستێكی سەربەخۆ بەشداری دەكەن.
بازیانی چۆنیەتی بیركردنەوە لەدروستكردنی لیستێكی سەربەخۆ، بۆ (سڤیل) دەخاتەڕوو و دەڵێت “بیرۆكەی دروستكردنی لیستی چاكسازی و گەشە دەگەڕێتەوە بۆ نزیكەی ساڵێك لەمەوپێش، كاتێك كۆمەڵێك رۆشنبیرو رۆشنفكر و خاوەن هزر لەخولیای پرۆژەیەكی چاكسازی گەورەدابوون، كە هەموو تاكێكی كوردستان خۆی بەخاوەنی بزانێت، لیستێك نەبێت قەتیس بمێنیت لەكۆمەڵێك یان حزبێك، بۆ ئەم مەبەستە زنجیرەیەك دانیشتن و راگۆڕینەوە لەو بارەیەوە كراو، لەگەڵ لەبەرچاوگرتنی تایبەتمەندییەكانی كوردستان و ئەم گۆڕانكارییە هەنوكەییانەی لەناوچەكەدا گوزەر دەكات، یەكێك لەو پرسیارە میحوەری و زەقانەی خۆی سەپاند بەسەر زۆربەی دانیشتنەكاندا ئەوەبوو، كوردستان هەموو موقویماتی گەشەكردن و چاكسازی و گۆڕانكارییەكی پۆزەتیڤانەی تێدایە، بەڵام بۆچ چاكسازی و گەشەسەندنی لەگەڵ هەموو ئەو ئیمكانیەتە بەشەری و مەعریفی و مادییانە كە هەیە، هێشتا وەك پێویست نییە؟!.”.
ئەو كەسایەتیە ئیسلامییە، پێكهاتەی ئەو لیستە وا باس دەكات، “كەسایەتییەكان كە ناسراون و بەقۆناغ ئاشكرایان دەكەین، لەهەموو كوردستانن، لەهەولێر و سلێمانی و گەرمیان و بادینان و كەركوك، لەسەر ئاستی ئەگەر هەڵبژاردنی عێراق بێت، لەقۆناغی ئێستا تەنها ئەوەندە ئاشكرا دەكەین، بەندە محەمەد بازیانی وتەبێژم و دكتۆر سەرهەنگ لەهەولێر و دكتۆر نایف لەدەڤەری كۆیسنجەق كارەكان دەكەین.
بەڵام رەتی دەكاتەوە لیستەكەیان لەسەر ئەساسی بڕواو ئایدۆلۆژیایەكی تایبەت كار بكات و دەڵێت “لیستی ئێمە ناوی لیستی چاكسازی و گەشەیە، هەركەسێك بڕوای بەچاكسازی و گەشەسەندنی كوردستان بێت ئەم لیستە كراوەیە بۆی و ئەو كەسە بەخاوەنی ئەم لیستە دەزانین”. گوتیشی “باگراوەندیان هەندێك زوو لەحزبی ئیسلامی بوونە، زۆریشیان لەدەرەوەی حزبی ئیسلامی و كەسایەتی كوردستانین، كەسایەتی ئەكادیمین، ئەو كەسایەتیانەن كە بڕوایان بەچاكسازییەكی گشتگیر هەیە لەكوردستان، چاكسازی مەعریفی و هزری و سیاسی و كۆمەڵایەتی و ئابووری”.
د. محەمەد بازیانی گوتیشی “لەم قۆناغەدا زیاتر خۆئامادەكردنمان بۆ هەڵبژاردنەكانی ئەنجومەنی نوێنەرانی عێراق و پەرلەمانی كوردستانە، بەڵام ئەگەر هەڵبژاردنی ئەنجومەنی شارەكان دوا بكەوێت، ئەوا ئێمە چانسی باشترمان دەبێت و بۆ خۆئامادەكردنی باشتر”.
وتەبێژی لیستی چاكسازی و گەشە بۆ (سڤیل) بڕوای خۆی رادەگەیەنێت بەوەی “ئەم لیستە پێگەی گرنگی دەبێت لەكوردستاندا، چونكە كەسایەتییەكان سەنگی گەورەی جەماوەری یان هەیەو بەرنامەكانی ئەم لیستە كە پێشكەشی كۆمەڵگەی دەكات، زۆر واقیعبینانە دەبێت و دەرفەتی جێبەجێكردنیشی زۆر دەبێت”.
لەئەگەری سەركەوتنی لیستەكەیدا لەهەڵبژاردنەكاندا پەیوەندی خۆیان بەحزبەكانی كوردستانەوە وا باس دەكات كە “دەستباری لەگەڵ هەموو هێزە سیاسیەكانی كوردستان دەكات، بۆ گەیشتن بەكۆمەڵگەیەكی ساغڵەم و تەندورست كە سستەمێكی سیاسی عادیلانە و حەكیمانە حوكمی بكات، ئێمە دیدوبۆچوونمان وایە، هەر جۆرە چاكسازییەك لەو چاكسازییانەی ئاماژەمان پێی كرد، تەنها بەلایەنێك ناكرێت بەحكومەت و ئۆپۆزسیۆن و كۆمەڵگەی مەدەنی تاك تاكەكانی كۆمەڵگە دەكرێت، نەك تەنها بەحكومەت یان ئۆپۆزسیون، یان كۆمەڵگەی مەدەنی”.
بازیانی ئەگەری بەحزبیبوونی لیستەكەی لەدوای هەڵبژاردنەكان بەدوور نازانێ، بەڵام لەئێستادا “ئەو كەسایەتیانەی لەناو ئەم لیستەدان و لەناوی دەبن، بڕوایان بەلیست هەیە نەك حزب، لەپاش هەڵبژاردنیش ئەوە دەستە جەمعی بڕیاردەدەرێ، ئیستا تەنها قەوارەیەكی سیاسین بۆ هەڵبژاردنەكان و بەس”.
د. بازیانی لەگەڵ ئاشكراكردنی نیازەكانی لیستەكەی بۆ بەشداری لەهەڵبژاردنەكانی عێراق و كوردستان و ئەنجومەنی شارەكان، رەتی نەكردەوە كاندیدیان بۆ سەرۆكایەتی هەرێمی كوردستانیش دەبێت، تەنها ئەوەندەی گوت “بۆ وەڵامی ئەو پرسیارە ئێستا زووە، لەكاتی خۆی رایدەگەێنین”.