کەریم چۆلی: کابینا نوی و موغامەرە!

کابینا نوی و موغامەرە!
بەشداریکرن یان بەشداری نەکرنا هەرسێ لایەنێن ئۆپۆزسیۆن نابنە سەدەم و خالێن بهێز بۆ سەرکەتنا کابینا نوی یا حکۆمەتێ
پڕۆژە و پڕۆژەکاری د ناڤبەرا ئۆپۆزسیۆن و پارتی و ئێکەتی و سەرۆکایەتیا هەرێم و پەڕلەماندا، وەکی نامێن دلداران دئێنە پێش چاڤ
کەریم چۆلی
ژبەری بداوی هاتنا ساڵا ڕابوری وەرە ئالوگۆڕا سەرۆکێ حکۆمەتا هەرێمێ دناڤبەرا پارتی و ئێکەتیدا بابەتێ بگەرمی ڕۆژەڤێ یە، بێگومان حەقێ مە یە بەحس بکین چونکی هەر گۆڕانکاری ورویدانەک دپێکهاتەیا حکۆمەتێدا بێتەکرن ژهەمی ئالیێن ئابوری و سیاسی وجڤاکی و ڕەشەنبیری و… گرێدای ژیان وگوزەرانا مەیە و باندووریا خوە لسەر هەیە. گەلەک ژ ئەوان بابەتێن دڤێ مژارێدە ژی هاتنە نڤێسین و کەتنە پێش چاڤێن من دوو جۆرێن بابەتانە، یان لاینگرییەک بۆ بریاردانا پێشوەختا سەرکەفتنا کابینا نوی پێڤە دیارە یان بریارا پێشوەخت لسەر سەرنەکەفتنا کابینێ هاتییەدان و کێم بابەت هەنە کو بشێوەیەکی بابەتی و لگۆر واقعێ ئەڤرۆ یێ کوردستانێ پرسا ئالوگۆڕکرنا سەرۆکایەتیا حکۆمەتێ دناڤبەرا ئێکەتی و پارتیدا شرۆڤە کربیت.
بێگومان ئەز ناخوازم ئەوان بۆچوونێن هەڤدژ شرۆڤە بکم، بەلێ بدیتنا من ئەو کێشە و ئاستەنگێن بەریا نهە رێگر بوون ل هەمبەری سەرکەفتنا کاروبارێن کابینێن حکۆمەتا هەرێمێ نهە ژی هەمان ئاستەنگ و رێگری بەردەوامن و ئەگەر زێدەتر نەبـن ئەڤە بێگومان کێمتر نەبوونە، دوو ئیدارەیی نهەژی بەردەوامە و حکۆمەتا یەکگرتی تنێ بناڤە و بریارێن سەرۆکێ حکۆمەتێ ل هەمی دەڤەرێن هەرێمێ وەکی یەک نا ئێنە جیبەجی کرن و گۆهداری کرن، گەندەلی بویە دیاردەهەک بەرفرەهـ و ژ حالەتێن فەردی دەرکەتییە و چارەسەرکرنا وێ ژی تنێ بسەرۆکێ حکۆمەتێ نا ئێتەکرن، ئەگەر هەر کەسەک بیت، چونکی ڕێگرتن و نەهێلانا گەندەلیێ پێویستی بسیستەمەکێ هەیە کو یاسا تێدە سەروەر بت و یاسا گەندەلیێ و هەمی پرسێن دی ژی چارەسەر بکەت، بەری نهە مە سەربۆڕەکا باش دگەل بریارێن سەرپێی و حیزبی هەیە بۆ چارەسەرکرنا گەندەلیێ و سەروەرکرنا یاسایی، بەلێ ئەوان بریاران نەشیانە هیچ  گرفتەکێ چارەسەربکن و بەڕۆڤاژی دیاردەها گەندەلیێ ڕۆژ بڕۆژ زێدەتر بوويە و کێمتر نەبوويە.
ژئالیەک دن ڤە هەوڵێن دەست پێکی بۆ پێکئینانا کابینا نوی یان باشترە بێژین نیڤیا دوێ یا کابینا شەشێ بڕەنگەکی نە سروشتی دئێنە دیتن، دەما کو تێگۆتن ئەگەر ئۆپۆزسیۆن بەشداریا حکۆمەتێ نەکن بەرێز نێچیرڤان بارزانی سەرۆکایەتیا حکۆمەتێ وەرناگرت یان (پارتی موغامەرێ ب نێچیرڤان بارزانی ناکت)! هەر چەندە بدیتنا من نابیت هیچ کەسەک ژ سەرۆکایەتیا حکۆمەتێ کو دەسهەڵاتا جیبەجی کرنێ یە بلندتر و مەزنتر بێتە هەژماردن و ئەڤێ پرسێ دپێکئینانا ئێکەم کابینا حکۆمەتا هەرێمێدا ژی رویدا و بۆیە سەدەمەک سەرەکی ژی بۆ سەرنەکەفتنا حکۆمەتێ، بەلێ من دڤێت بتنێ ژ یەک ئالی ڤە ئەڤێ گۆتنێ شرۆڤە بکم، ئەوژی ئەوە هەوڵێن نە هێلانا ئۆپۆزسیۆنێ و بەشداری پێکرنا تەڤ ئالیان دحکۆمەتێدا نیشانا کوشتنا پڕۆسا دیموکراسیێ و نەهێلانا دەلیڤا رەخنێ و دائێخستنا تەڤایا دەریکانە لسەر چارەسەرکرنا ئەوان گرفتێن بەری نهە هەبوون و ئیرۆ ژی بەردەوامــن.
دڕاستیێ دا بەشداریکرن یان بەشداری نەکرنا هەرسێ لایەنێن ئۆپۆزسیۆن و تەنانەت لایەنێن دن ژی یێن ژدەرڤەی پەرلەمانی نابنە سەدەم و خالێن بهێز بۆ سەرکەتنا کابینا نوی یا حکۆمەتێ، چونکی دبنگەهیدە خالێن لاوازیا حکۆمەتێ نەکو بتنێ بەشداری نەکرنا لایەنێن ئۆپۆزسیۆنە، بەلکی هەبوونا گەندەلیێ و نەبوونا شەفافیەتێ و نەبوونا سیستەمەکی ئیداریێ تەندروست و نەبوونا دادپەروەریێ و بن پێکرنا یاسایی و هەبوونا دوو وەزارەتێن دارایی و ناڤخۆی و پێشمەرگەی (د جەوهەریدا) و تێکەل بوونا حیزبێ دکاروبارێن حکۆمەتێدا ئاستەنگێن سەرەکی نە بۆ سەرنەکەتنا حکۆمەتێ دجیبەجی کرنا ئەرکێن خوەدا، ئەگەر مەرەما بەشداری پێکرنا لایەنێن ئۆپۆزسیۆن دحکۆمەتێدا بۆ بێدەنگ کرنا ئەوان بیت لهەمبەری کێم و کاسیان، حکۆمەت نەشێت ب بێدەنگ کرنا ئۆپۆزسیۆنێ سەرکەفتنێ بدەستڤە بینت، بەلکی خالا بنگەهیا سەرکەفتنا حکۆمەتێ ئەکتیڤ کرنا دامودەزگەهێن حکۆمی یە، نەکو بێدنگ کرنا رەخنێ.
هەمی خەلکێ کوردستانێ (باشور) دزانن ئەڤ ئۆپۆزسیۆنا نها پارتی و ئێکەتی هەوڵددن بەشداریا حکۆمەتێ بکەت، پشتی خوەنیشاندانێن ساڵا رابۆری چەند پڕۆژەیەک پێشکێش کرن و دارخوازکرن حکۆمەت ئەوان پڕۆژان بۆ چارەسەرکرنا پرسگرێکێن هەرێمێ جیبەجی بکت، وەکی پڕۆژا (٧) بەندیا گۆڕان و پڕۆژا (٢٢) بەندیا و (٦) پەکجێن هەرسێ لایەنێن ئۆپۆزسیۆن و پاشان پارتی و ئێکەتی ژی پڕۆژەیەک  پێشکێش کرن بۆ گفتوگۆ کرنێ وپێکهاتنێ لسەر پڕۆژەیەکی هاڤبەش و دهەمان دەمدا پەرلەمانێ کوردستانێ ژی پڕۆژەیەکی (١٧) بەندی دهەمان مژاردا پەسەندکر و پاشان سەرۆکێ هەرێمێ ژی (٤) بریار دەرکرن… ئەڤ پڕۆژە و پڕۆژەکاریا وەکی نامێن دلداران دئێنە پێش چاڤ نەبوونە سەدەما چارەسەرکرنا گرفت و ئارێشان و دەما مە بڤێت بپرسین گەلو چەند بەند و خال ژ ئەوان پڕۆژان هاتنە جیبەجی کرن؟! هیچ دڤێرێدا پرسیارا بێ بەرسڤ ئەوە گەلو بۆچی هەتا نهە ژی تەنانەت هیچ بەندەک ژ ئەوان پڕۆژە و بریاران نە هاتیە جیبەجی کرن؟؟؟ کی ڕێگرە؟.
لداویێ بدینا من سەرکەفتنا هەر حکۆمەتەکێ ل هەرێما کوردستانێ گرێدایی بریار و ئیرادا سیاسییە بۆ ئەنجامدانا ریفۆرمەک بنگەهی و بتایبەتی چارەسەرکرنا ئەوان قەیرانێن ئەڤرۆکە بوونە بارەکی گران لسەر ملێن خەلکێ و مەترسیەک مەزن بۆ پاشەڕۆژا سەربۆڕامە دروست کرییە، نە کو بەشداری کرن یان بەشداری نە کرنا ئۆپۆزسیۆنێ دحکۆمەتێدا، بەرۆڤاژی حالەتێ تەندروست هەبوونا ئۆپۆزسیۆنێ و تەداولا دەسهەڵاتێ یە بۆ پاراستن و بەردەوامی و سەرکەفتنا سەربۆرا هەرێما کوردستانێ و بەشداریا هەمی ئالیێن سیاسی تنێ دێ ڕێکێ خوەش کت بۆ بەرفرەهـ بوونا گەندەلیێ.