عادل خێرکى: لیژنەیا ڤەکولینا روودانێن بادینان راپۆرتا خوە د بەرژەوەندا یەکگرتوویا ئیسلامى دا بەلاڤکر

لیژنەیا ڤەکولینا روودانێن بادینان راپۆرتا خوە د بەرژەوەندا یەکگرتوویا ئیسلامى دا بەلاڤکر
عادل خێرکى – زاخۆ
پشتى تێپەربوونا 22 رۆژان ب سەر پێکئینانا لیژنەیا ڤەکولینا بوویەرێن بادینان، ئەوا کو ب فەرمانا سەرۆکێ هەرێما کوردستانێ ل 3/12 پێکهاتى و ل 25/12 راپۆتەکا 5 خالى یا کێم زانیارى راگەهاندى و نیگەرانى ل دەڤ من و کومەکا خەلکى و لایەنگرێن یەکگرتوو پەیدا کرى؛ مەکتەبا سیاسى یا یەکگرتوویێ ل رۆژا  26/12 د رۆنکرنا خوە یا لدۆر دەرئەنجامێن لیژنەیێ دا د خالا (ج) دا داخوازکریە کو لیژنەیەکا دادوەرى یا تایبەت و بێ لایەن بهێتە دیارکرن، بۆ ڤەکولینێ و حوکم دانێ ل سەر ڤان بوویەران و ئەڤ خالە ژى دانپێنەدانە نەک ب دەرئەنجامێن لیژنەیێ بەلکو دانپێنەدانە ب زاتێ لیژنەیێ، ب خوە ژى و ئەز ژى وەکو رۆژنامەڤانەکى دەڤەرا بادینان ل زاخۆ یێ رازى نینم ب ئەنجامێن ڤێ لیژنەیێ و داخوازێ ژ جەنابێ سەرۆکى دکەم بریارێ بدەت ئەڤ لیژنەیە یا بەردەوام بیت ل سەر ڤەکولینا خوە، هەتا کو هەموو کێشە و سکالایێن لدۆر ڤان بوویەران ل دادگەهان ژى ب دوماهى دهێن و راپۆرتا لیژنەیێ ژى نەک یا دوماهیێ بیت و هەموو زانیاری و پێزانین و بەلگەیێن ل بەر دەستێ لیژنەیێ ب شێوەیەکێ فەرمى بهێنە رەوانەکرن بۆ داواکاریا گشتى و لیژنەیا ڤەکولینێ ژى ب رۆلێ هاریکاریکرنێ رابیت دگەل دادگەهێن پارێزگەها دهۆکێ چونکى هێشتا ئەکتەرێ سەرەکیێ ڤى فیلمێ بادینان خۆیا نەبوویە و هەردوو پارتێن سیاسى (پارتى و یەکگرتوو) هاتینە تومەتبارکرن کو ئێکگرتوو ب هاندانا خەلکى بۆ سۆتنا سەنتەرێ مەساجێ و دوکان و هوتێلێن مەیڤەخوارنێ ل بادینان و پارتى ژى ب کونترۆلنەکرنا لایەنگرێن خوە ل دەمێ سوتنا بارەگایێن یەکگرتوو ل بادینان.
ئەڤ بوویەرێن بادینان جهێ نیگەرانیا هەموو خەلکى بوو، زیانێن مەزن گەهشتنە هاولاتیان، رێک ل کارێ گەلەک هەژاران هاتە گرتن و گەلەک قوتابى و رۆژنامەڤانێن بەشدارى و بەرهەڤى وان خۆنیشاندانان بووین چوونە د گرتیخانەیان دا، ئەڤە هەموو دەرئەنجامێ خەمساریا بەرپرسێن پارتى و ئێکگرتوو بوویە ل دەڤەرێ، لێ دێ ئێکەم جار ژ یەکگرتوو دەست پێ کەین، مادەم بەلگە و پێزانین د دەستێ لیژنەیا ڤەکولینێ دا هەنە کو یەکگرتوو هاندان کریە، دڤێت توندترین پێرابوونێن یاسایى دگەل یەکگرتوو دا بهێنە وەرگرتن و سوزنامەیەکى ل پەرلەمانێ کوردستانێ ئیمزا بکەت، کو ئەگەر دووبارە ببیت ئەڤ کارێ وان ئەنجام دایى، ل گورەیى یاسایێ ئەڤ حیزبە بهێتە داخستن کو ئێدى بارۆدوخێ هەرێمێ تێک نەدەت، یان مەترسیێ ل سەر هندەک ئاینێن نە موسلمان پەیدا بکەت ل دەڤەرێ، زێدەبارى ئەڤ کەسێن هاندان کرین هەر چ پلە هەبن بهێنە سزادان ل گورەى یاسایێ.
چونکى ئێکەم جار یەکگرتوو بهێتە سزادان پاشان پارتى، ژبەرکو هەموو بەلگە وەسا خۆیا دکەن کو ئەکتەرێ سەرەکى ئەو بوویە لێ راپۆرتا تام سیاسیا لیژنەیا ڤەکولینێ نەگوتیە ئەکتەرێ سەرەکى یەکگرتوویە، دڤیابا دیارکربا و هەمى هاولاتى ژى هایدار کربان ب پێزانینێن راست و رەوا و ب بەلگەڤە؛ ژبەرکو ئەگەر کونترولا ڤێ رەوشێ نەهاتبایە کرن ژ لایێ دەزگەهێن ئێمناهیێ ڤە، کوشتن ژى دا پەیدا بیت و دا گەلەک جهێن دى ژى هێتە سوتن.
راپۆرتا لیژنەیا ڤەکولینا بوویەرێن بادینان پارتى ژى تومەتبارکریە کو بەرپرسێن حیزبى یێن بادینان ب کەمتەرخەم ل قەلەم داینە، کو نەشیاینە کونترۆلا لایەنگرێن خوە بکەن ئەوێن بارەگایێن یەکگرتوو سوتاندین، هەروەسا ئاشکراکریە کو کەمتەرخەمیا ئیدارى و ئەمنى هەبوویە و ئەڤە ژى بێ لایەنیا لیژنەیێ خۆیا دکەت، لێ ب دیتنا من ڤێ لیژنەیێ گەلەک پرسیار هێلاتینە بێ بەرسڤ و هەر ئێکسەر راگەهاندنا خوە یا کورت وەشاند و د بەرژەوەندا یەکگرتوویا ئیسلامى دا راپۆرتا خوە بەلاڤکر نەک د بەرژەوەندا پارتیێ دا.
ئەو تێبینى و پرسیارێن هێلاتینە د مێشکێ مە دا ئەڤێن ل خوارێ نە:
1. دیار نەکریە ئایا ئەو مەلایە هاندەر بوویە، یان نە ئەو مەلایێ راگەهاندنا ئۆپۆزسیونێ کلیپێن وى بەلاڤکرین کو هاندانا خەلکى کرییە.
2. باس ل سوتنا کابینەیێن پۆلیسێن هاتن و چوونێ و شکاندنا تابلویێن ئاگەهدارى و رێکلامان یێن باژێرڤانیێ و سوتنا جوانکاریێن ئافرەتان نەهاتیە کرن.
3. باس ل بەلاڤکرن و هاڤێتنا نامەیێن گەفلێکرنێ یێن کوشتنێ بۆ ناڤ تاخێن مەسیحیان دا ل زاخۆ نەهاتیە کرن، کو بوویە ئەگەرێ ترسێ ل ناڤ برایێن مە یێن مەسیحى دا هەتاکو ترسیایین و زارۆیێن خوە ل وان رۆژان فرێ نەکرینە قوتابخانەیان.
4. باس ل بارەگایێ یەکگرتوو نەهاتیە کرن، ئایا ل دەمێ هاتیە سوتن چ کەل و پەل تێدا بوون، ئایا وەکو زانیارى ئاشکرا دکەن یا راستە ل پێشوەخت یەکگرتوو بارەگاییێن خوە چول کرینە و هیچ مرۆڤەک تێدا نەمایە زێدەبارى ڤەگوهاستنا پێزانین و نڤێسارێن خوە یێن حیزبى.
5. ڤێ لیژنەیێ دیار نەکریە، کو ئەو کەسێن تێکدان کرین و وێنەیێن وان هاتینە ستاندن و پاشان هاتینە دەستەسەرکرن لایەنگرێن چ پارتێن سیاسى نە، ئایا د ڤان وێنەیان دا کەسانێن بەرچاڤ و هاندەر کادیرێن پارتى نە، یان یەکگرتوویا ئیسلامى؟.
ل داویێ هیڤیخوازم سەرۆکاتیا هەرێمێ و پەرلەمان و سەروکاتیا ئەنجومەنێ وەزیران، پێرابوونێن یاسایى یێن جدى وەرگرن بۆ دووبارە نەبوونا ڤان روودانێن کو زیانێ بگەهیننە سەربۆرا هەرێمێ و تێکدانێ ل ناڤ ئولێن جودا جودا پەیدا بکەت، و یا گرنگە د زووترین دەم دا بەرپرسێن ئیدارى و ئەمنى بهێنە گهورین یان ڤەگوهاستن و ئەو بەرپرسێن حیزبى ژى بهێنە سزادان و حیزباتى بۆ ماوەیێ هەتا 5 سالان ل وان بهێنە قەدەغەکرن، ئەم هەموو چاڤەرێى بریار و پێشنیارێن سەرۆکێ هەرێما کوردستانێ نە کو ئەو تاکە کوردە خەمێ ژ ئێکرێزیا مللەتێ کورد دخۆت.