بێستون بەرواری: بادینان.. ما وە خێرە!!.. گەلو ئەم لبادینان بوینە لەشكرەكێ بێدەنگ و تەنێ فەرمانا بجھ دئینین

بادینان.. ما وە خێرە!!.. بادینا ژ دەڤەرەكا بەرھەمھینەر بوو دەڤەرەكا مشەخورو بێبەرھەم
بێستون به‌رواری. سوید
بادینان ددیروكا كوردستانێ دا رولەكی مەزن گێرایە.بادینا بنگەھێ میرنشینێن بناڤ و دەنگ بویە..خەلكێ دھوكا داسنیا و زاخوكا میرنشینێن بوتان وئامێدیێ كەلھا میرا و ئاكرا سەربلند وشێخان(ئێسڤنێ)یا پیروز ھەردەم جھێ شانازی و سەرفرازیێ بونە برەوشتێن خوەیێن جڤاكی و سیاسی وئایینی..ئەڤ دەڤەرە جھێ پێكڤەژیانا ئول ونەتەوێن جودا جودا بویە . دشورش و سەرھلدانێن نوی ژی دا خەلكێ دەڤەرا بادینان بھەمی ئول وئاینانڤە پشكداریەكا بەرچاڤ كرینە و گەلەك جاران ژی رولەكێ سەرەكی گێراینە.ژبەر ھندێ و ژبەر جھێ وێ یێ ستراتیژی ھەردەم ژئالیێ دوژمنێنان ڤە كەتیە بەر ھێرش و پیلانان و ھێشتا ژی یا بەردەوامە.
پشتی سەرھلدانا پیروزا خەلكێ كوردستانا باشور لسالا 1991ێ دەڤەرا بادینان ژی ژ داگیركەران ئازاد بوو، بەلێ مخابن ھەر ژ زویڤە كەتە بن بارێ ھەڤركیا حزباتیا بەرتەسك و ژبەر ھندێ ژی ھێدی ھێدی ھەر تشت ھاتە گوھارتن. سال بسال رەوشت و تیتالێن خەلكێ دەڤەرێ ھاتن گوھاتن ،جڤاك كەتە قەیرانێ و سەنگ و بوھایێن بەرێ نەمان. دلسوزی و دلوڤانی كێم بوو بەرژەوەندیێن كەسایەتی و پارەی جھێ وان گرتن. زانست و روناكبیری كێم بوو و چاڤلێكرنێ و گەندەلیێ جھێ وان گرتن.دەڤەرا بادینا ژ دەڤەرەكا بەرھەمھینەر بوو دەڤەرەكا مشەخورو بێبەرھەم.مخابن و سەدجار مخابن گەلەك ژخەلكێ دەڤەرێ لسەرھەڤركیا حزبا ژیان و ئامادەبوون ھەركارەكی بكەن ژبو بەرژەوەندیێن كەسایەتی.دڤان سالان دا چەند بویەر لدەڤەرا مە رودان كو براستی جھێ پسیارێنە!! گەلو ما خێرە!!كەنگی دێ ھزراخوە كەین دوھی مە چ كر و ئەڤرو ئەم چ دبێژین؟ گەلو ما ئەم لبادینان بوینە لەشكرەكێ بێدەنگ و تەنێ فەرمانا بجھ دئینین؟
-ھەرد ئێكەمین ھەلبژارتنێن پەرلەمانێ كوردستانێ دا ھندەكا بناڤێ خەلكێ دھوكێ لسەنتەرێ باژێری بشێوەكی نەمروڤانە ھێرش كرە سەر سەركردێ شەھید سامی عبدالرحمان ورێنەدان بانگەشا ھەلبژارتنان بو پارتی دیموكراتی گەلی كوردستان بكەت وئەو بخاین و دوژمن دانەنیاسین، و پشتی چەند سالان ژی ھەر ئەو كەس بدەھان كیلومەتران دچونە پێشوازیا وی ھزار پەسنێن وی ددان.
-سالا 1994ێ ھندەكا بناڤێ خەلكێ بادینا ھێرش كرنە سەررێکخستنێن یەكیتی نیشتمانی كوردستان لدھوك و زاخو وئاكرێ وبارەگایێن وان تالان كرن و گوتن ئەڤە دوژمنێن كوردو كوردستانێنە، دیسا پشتی چەند سالان ئەو بارەگا ڤەبوون و ئەو ھەڤال ژی بونە دلسوز ێن كوردستانێ.
-سالا 2005ێ دھەلبژارتنێن دوێ یێن پەرلەمانێ كوردستانێ دا بناڤێ خەلكێ بادینان ھێرش كرنە سەر بارەگایێن یەكگرتووی ئیسلامی لدھوك و زاخو و ئاكرێ و ئاگربەردانێ و گوتن ئەڤان لگەل دوژمنان پەیمان گرێداینە لدژی كورد و كوردستانێ،دیسا پشتی ھەیامەكێ ئەو بارەگا جارەكا دی ڤەبوون و یەكگرتوو بویە وەلاتپارێز.
– سالا2007 ژبه‌ر مه‌سه‌له‌کا جڤاکی مال و جانێ هه‌ڤوه‌لاتیێن ئێزدی وهه‌تا کوچکا میر ته‌حسین ژی لشێخان که‌تنه‌ به‌ر هێرشان،و سه‌نته‌رێن وان یێن روناکبیری هاتنه‌ سوتن.
– دگه‌ررا دوماهیێ دا یا هه‌لبژارتنێن په‌رله‌مانی ژی بزاڤا گوران و باره‌گاهێن وان لده‌ڤه‌را بادینان هاتنه‌ سوتن وتالان کرن!!
– دشه‌رێن براکوژیێ دا لناڤبه‌را پارتی و ئێکه‌تی دا و لناڤبه‌را وان هه‌ردویان و پ ك ك دا هێزێن سه‌ره‌کی دشه‌رێن گران دا خه‌لکێ بادینان بوون!!
گه‌لو ما ئه‌ڤ کارێن هه‌نێ دخزمه‌تا گه‌لێ کوردستانێ دانه‌ و ده‌ڤه‌را بادینان چ خێر ژێ دیتیه‌؟؟لهه‌مبه‌ر ڤێ چ بو ده‌ڤه‌رێ هاتیه‌ پێشکێش کرن؟ چه‌ند فروکه‌خانه‌ لبادینان هاتینه‌ ئاڤاکرن؟ چه‌ند ته‌له‌فزیونێن عه‌سمانی لدهوکێ داناینه‌؟ چه‌ند چاپخانه‌ وده‌زگه‌هێن وه‌شانێ لده‌ڤه‌را بادینان هه‌نه‌؟ ما زاراڤێ بادینی چه‌وا دێ پێشکه‌ڤیت؟
گه‌لو چه‌ند پروژێن وه‌به‌رهینانێ لده‌ڤه‌را مه‌یا پر خێرو بێر هاتینه‌ ڤه‌کرن؟ ئه‌رێ پارا بادینان ژ په‌ترولا ژده‌ڤه‌رێ ده‌ردکه‌ڤیت چه‌نده‌؟ مه‌ چه‌ند مفا ژ گومرکا براهیم خلیل و پێشابورێ وه‌رگرتیه‌؟
براستی مروڤ باوه‌ر ناکه‌ت ئه‌ڤه‌ ره‌وشتێ خه‌لکێ جامێر و خوشمێری بادینان بیت.ئه‌ز باوه‌رناکه‌م ئه‌ڤ کاره‌ بدلێ خه‌ڵكێ بادینا بن.عه‌شیرێن بادینا کو روله‌کێ وه‌لاتپارێزی گێراینه‌ د دیروکێ دا چ جارا ئه‌ڤه‌ لسه‌ر خوه‌ قه‌بول نه‌کریه‌. زانا وروناکبیرێن ده‌ڤه‌را بادینان هه‌رده‌م هه‌لویسته‌کێ دیار هه‌بویه‌ و باوه‌رناکه‌م ئه‌ڤ ره‌وشه‌ بدلێ وان بیت. ئولدارو که‌ساتیێن ئایینی چ جارا بانگه‌شا ڤێ ئێکێ نه‌دکرن!!
دوێنه‌ وفلم و ده‌کومێنتێن پرانیا ڤان بویه‌ران دا چ که‌سێن ناڤدارێن بادینان دیار نینن و دڤێ بویه‌را دوماهیێ دا ژی پرانی زاروک بون!! گه‌لو ما ده‌ی بابێت وان چ دبێژن و هه‌لویستێ مه‌زنێن ده‌ڤه‌رێ چیه‌؟ ئه‌رێ ما براستی ئه‌م بوینه‌ ئالاڤه‌ک دده‌ستێ هنده‌ک که‌سان دا و ته‌نێ پیلانێن وان پێکبینین؟ هه‌رجارا پارت و رێکخستنێن سیاسی بڤێت بناڤێ مه‌ شه‌ری بکه‌ن و هه‌رگاڤا وان ڤیا ئه‌م بو وان چه‌پلا بقوتین؟ بهوچی خوشی و شانازی بو وان بیت و ناڤێ خراب و شه‌رمه‌زاری بو مه‌ بیت؟
2011.12.07
biston.berwari@hotmail.com
ئەم بابەتە لە مالپەری مالامە بلاوكراوە