کێن ئەوانی دژایەتی سالح موسلم و یەپەگە دەکەن؟
رێکار ئەحمەد
لەوەتەی یەکینەکانی پاراستنی گەل، رۆڵی جوامێرانەی خۆیان لە پارێزگاریکردنی رۆژئاوای کوردستان بۆ هەموو جیهان خۆیا کردوە، کەسان و لایەن هەن لێرەو لەوێ دژی تێکۆشەری ناسراوی رۆژئاوای کوردستان، بەیت و بالۆرە دەچننەوە، و دژایەتی یەپەگە بەئەرکی خۆیان دەزانن.
ئەو کەسانە سەردەمانێک بەو شێوەیە دەدوان:
دەیانگوت: داعش و یەپەگە دروستکراوی بەشار ئەسەدن و دەیانەوێ ئۆپۆزیسیۆن سوریا بشێوێنن!!!
دەیانگوت: داعش و یەپەگە هەرگیز دژایەتی یەکتر ناکەن!!!
دەیانگوت: یەپەگە هێزێکی لاوازەو ناتوانێ گوندێکی رۆژئاوا رزگار بکات!!
دەیانگوت: خەڵکی رۆژئاوا یەپەگەیان ناوێ و هیچ کەسێک ناچێتە ریزەکانیانەوە!!
دەیانگوت: هەرچەند رۆژێکەو یەپەگە نامێنێ و ئەوانەی بەو ناوەش کار دەکەن بۆ قەندیل دەگەڕێنەوە!!
بەڵام ئەوە دەرکەوت: یەپەگە هێزێکی کوردستانی تۆکمەو بە ئیرادە وڵاتپارێزە، بەشێکی زۆری رۆژئاوای کوردستانی رزگار کردووە، سەرسەختانەش دژی داعش و سوپاکەی ئەسەد شەڕ دەکات، یەپەگە بوو بە ئەمری واقیع و سوپای بەناو ئازاد بوو بەئاردی نێو دڕکان، ئیخوان و بورهان غەلیوم بوون بە پەندی زمانە.
ئەوەتا یەپەگە سەربەرزەو بە هانای شنگال و باشووریش هات و قوربانی پێشكەش کرد.. لاوانی رۆژئاوای کوردستان بەشانازیەوە بە ریزەکانی یەپەگە پەیوەست دەبن و بەشداری لە بەرخۆدانی مەزندا دەکەن.
ئێستا دەرکەوت کە یەپەگە و پەیەدە بوونەتە هێزی ئەکتیڤ و راستینی سەر زەوی لە رۆژئاوای کوردستان، ئەوەتا لەسەر ئاستی نێودەوڵەتیدا وەک رەمزی بەرخۆدان و هێزی داعش بەزێن ئاماژەیان بۆ دەکرێ. دیارە هەموو ئەو دژایەتیانە لە تورکیاوە دادەڕێژراو بۆ نێو کۆمەڵی کوردەواری شۆڕ دەکرایەوە. ئێستا ئیدی هەموو ئەو کەس و لایەنانەی کە ئەو بانگەشانەیان دەکرد و ژەهراویان بڵاو دەکردەوە، دەبێ بوێری ئەویان تێدا هەبێ، کە پەنجەی پەشیمانی بگەزن و داوای بووردن لە کوردستانیان بکەن.
دەنا مێژوو بەزەیی بەکەسدا نایەتەوە، سەرەنجام تورکیا مایە پوچ دەبێ، ئەوانەی گرەویش لەسەر تورکیا دەکەن پەشیمانیان بۆ دەمێنێەوە.
