ئومێدی عێراق لە كوردستانە
لە عەرەبییەوە . نوچەنێت
نووسینی: رۆژنامەنووس و نووسەری عێراقی بەناوبانگ خالید ئەلقەشتینی لە ماڵپەڕی رۆژنامەی شەرقولئەوسەت چاپی لەندەن.
لەم ساڵانەی دواییدا نووسیبووم دەبێت كوردستان ببێتە هەڵگری ئاڵای پێشكەوتن و بیری ئازاد و هەڵگری چرای هەموو عێراق. لە راستیدا خوالێخۆشبوو عەبدولرەحمان بەززاز ئەمەی پێ ووتم، كاتێك سەرۆكوەزیرانی عێراق بوو. بەززاز پێی ووتم “هەڵمداوە زیاتر لە توانای خۆم مافە دیموكراتییەكان بە كوردستان ببەخشم، ئەویش هەر لەبەر خۆشەویستیم نا بۆ گەلەكەی، بەڵكو بۆ ئەوەش ببێتە نموونەیەك بەغدا دواتر چاوی لێبكات”.
كەمینەكان هەمیشە بە رۆحیەتی ئازادیخوازی و پێشكەوتنخوازی جیادەكرێنەوە. ئێمەش هەر ئەمەمان لە كوردان بینیوە لە چەند دەیەی رابردوودا.
كورد بە گەلێكی ئایینپەروەر و خوداناس ناسراوون، بەڵام دیندارییەكەیان بەوە جیا دەكرێتەوە كە میانەڕەوانەیە و لەنێوان مرۆڤ و خودادایە. بەجۆرێكە كە كەس بۆی نییە ئایین و ئایینزا و سرووتە دینییەكانی بەسەر ئەوانی دیكەدا بسەپێنێت.
لای ئەوان عیبادەت شتێكە و سیاسەت شتێكی تر، دەوڵەت شتێكە و دین شتێكی دی. لەسایەی ئەو باكگراوندەوەیە كە ئایین و ئایینزا جیاوازەكان بێ گرفت پێكەوە دەژین. لەوانەیە باگراوندە چەپگەراكەشیان یاریدەی دابن ئەمجۆرە باگراوندەیان هەبێت.
كورد زۆرجار شانازی بەوەشەوە دەكەن، كە مامەڵەیان لەگەڵ ئافرەت، بەشێوەیەكە كە رەچاوی یەكسانی ژن و پیاوی كردووە.
چیا و دۆڵەكانی كوردستان هەمیشە پەناگەی ئەو ئازادیخوازانە بووە، كە رژێمی سەددام حسێن راوەدووی دەنان و دواتر لە ریزەكانی پێشمەرگەدا لەدژی سەربازەكانی سەددام دەجەنگان. ئەوان هەمیشە وەها راهاتوون ببنە پەناگەی ئەوانەی، لەشوێنەكانی خۆیاندا جێیان پێ لێژ دەكرێت.
كە لە دەرگای كورد دەدەیت، لێت ناپرسن تۆ كێیت و شوناسەكەت چییە و سەر بە چ ئایینێكیت و چەندت پارە پێیە. ئەوێ زەوی بەرفراوانی خودایە، بڕۆ ژوورێ و خودا چی بۆ نووسیوی لە رۆزی لەوێ وەری بگرە. هەر بەم رۆحییەتەوە دەرگایان بۆ ئاوارەكانی سووریا و توركیا و موسڵ و تلكێف و سنجار ئاواڵا كرد، بۆ كورد و عەرەب و مەسیحی و سوننە و شەبەك و یەزیدی.
ئەوەی جوانتری كردووە، سەرەڕای واڵاكردنی دەرگاكانی، هەمەڕەنگی كۆمەڵگاكەی، ئەو باكگراوندە جەنگییەی هەیەتی و ئەو هەموو چەكەی تێیدایە، كوردستان ئاساییش و ئارامە و وای لە عێراقییەكانی تر كردووە، بە عەرەب و غەیری عەرەبەوە رووی تێبكەن و تێیدا بمێننەوە، كار و وەبەرهێنانی تێدا بكەن، تێیدا خانەنشین بن و تێیدا بخوێنن.
ئێستا هەولێر جۆرەها زمانی تێدا كۆبووەتەوە، بووەتە شوێنی كێبڕكێی ئاوەدانكردنەوە و وەبەرهێنان. لە چێشتخانەكانیشیدا خواردنی هەمەجۆر دەبینی، هەر لە فەلافلی فەلەستینییەوە، تا بریانی هیندی، لە ژەمە خۆراكی لوبنانییەوە تا هی ئەوروپی، لەسەر شەقامەكانیش ماستی هەولێر سەرنجت رادەكێشێت. لە سەرو هەموو ئەمانەشەوە، لە بازاڕەكانیدا ئەوەی دەیبینیت دەستپاكی و راستگۆییە.
نازم زەهاوی كوردێكی عێراقی بەریتانییە، نوێنەری ناوچەی ستراتفۆردە لە پەرلەمانی بریتانیادا. ئەو بەمدواییانە سەردانی كوردستانی كردبوو، دوای گەڕانەوەی لە رۆژنامەی دەیلی مەیلی بریتانی باسی ئەو شتانەی كردبوو كە لە كوردستان بینیبووی. ئەو بەشەی كە لای من لە هەمووی جوانتر بوو ئەوەبوو، كە باسی پێشمەرگەی دەكرد و دەیگوت: پێشمەرگەكان هەم خەریكی پاسەوانی كردنن لە پەنابەرەكان، هەم بەرپەرچی چەتەكانی داعش دەدەنەوە و هەم لە خەمی ئازادكردنی بەنداوی موسڵدان.
ئێستا مشت و مڕ هەیە، دەربارەی ئاییندەی كوردستان: ئایا سەربەخۆیی تەواو دەبێت، یان مانەوە لە چوارچێوەی عێراقێكی فیدرالیدا؟ بە سەرنجدان لە هەڵسوكەوتی برایانی كوردمان، هەر لە فریاكەوتنی براكانیان لە خوارو و رۆژئاوای عێراقەوە، تا پاراستنی بەنداو و نەوتی عێراقییەكان و بەرپەرچدانەوەی تیرۆریستان، دەڵێم نا بۆ جیابوونەوەی هەردو گەل لە یەكتری.
