شلێر سەعید، تایبه‌ت به نوچە نێت
كتێبی (به‌هاری چل چیا) كه په‌رتووكێكی ئه‌ده‌بییه له شیعرو لێكۆڵێنه‌وه پێكدێت، تایبه‌ته به شیعرو ژیانى عوسمان عومه‌ر مام یه‌حیا- پشكۆ له‌لایه‌ن په‌یوه‌ست خۆشناوه‌وه ئاماده‌كراوه و توێژینه‌وه‌ى بۆ كراوه، ئه‌مڕۆ بڵاوكرایه‌وه .
په‌یوه‌ست خۆشناو نووسه‌ری كتێبه‌كه بۆ نوچه‌نێت گوتى، “من كاری ئاماده‌كردن و توێژینه‌وه‌م بۆ كردووە، له‌سه‌ر دوو ته‌وه‌ره‌ی سه‌ره‌كی کاری لەسەر کراوە، یه‌كه‌میان تایبه‌ته به ژیانی شاعیرو دووه‌میشیان تایبه‌ته به شیعره‌كانی، ناوه‌رۆكی كتێبه‌كه به‌م شێوه‌یه دابه‌شكراوه: بەشی یەكەم لە دوو تەوەرە پێك دێت: تەوەرەی یەكەم تایبەتە بە ژیانی شاعیرو چەند تێبینییەك لە بابەت شیعرەكانی شاعیرو پەرتووكی بەهاری چل چیا، تەوەرەی دووەمیش تایبەتە بە توێژینەوەیەك لە بابەت رووخسارو ناوەرۆكی شیعرەكانی شاعیرو بەنموونەی شیعرەكان سەرنج و تێبینیەكان خراونەتەروو”.
په‌یوه‌ست خۆشناو له ناساندنى كتێبه‌كه‌ى به‌رده‌وام بوو و گوتى، لە بەشی دووەمیشدا شیعرەكانی شاعیر دەرخراون و بەشی سێیەمیش تایبەت كراوە بە چوارینەكانی شاعیر، بەشی چوارەم و كۆتایش تایبەتە بەچەند بەڵگەو دەستنووس و وێنەو یادەوەرییەكی شاعیر”.
خۆشناو ئاماژەی بەوەشكرد ئه‌مرۆ سێشەممە ١٧ ی تشرینی دووەم ٢٠٢٠ لە ماڵی ڕۆشنبیرانی کۆیە، ناساندن بۆ ئەم كتێبه كراوه و بە دیاریش بەسەر ئامادەبوواندا دابەشكراوه.
ئه‌م كتێبه له(٤٥٦) لاپه‌ڕه پێك دێت و به تیراژی(٢٠٠٠ دانه) لەتاران چاپكراوه‌و، له لایه‌ن مامۆستا(عادل زرار) دیزاینی به‌رگه‌كه‌ی كراوه‌و هه‌روه‌ها له‌لایه‌ن(سۆران تاوده‌ر) دیزاینی ناوه‌وه‌ی كراوه‌و به‌سه‌رپه‌رشتی (بێستون عوسمان پشكۆ) چاپكراوه.
