هێمن هەورامی: وەکو كورد هەست بەوە ناكەین کە هاوبەشی ڕاستەقینەین لە دەوڵەتی عێراقیدا
نوچەنێت
ماڵپەری هەولێر
بەرپرسی پێوەندییەكانی دەرەوەی پارتی دیموكراتی كوردستان (هێمن هەورامی) لە دیمانەیەكیدا لەگەڵ ئاژانسی ئەنادۆڵی توركی، ئاماژە بە چەند پرسێكی گرنگی پەیوەست بە بارودۆخی عێراق و هەرێمی كوردستان دەدات و نیشانی دەدات كە ڕەفتارەكانی (مالیكی) وا لە كورد ناكات بێدەنگ بێت و بەغدا بۆ كەسانی تێكدەر جێ بهێڵێت.
بەغدا بەجێ ناهێڵین
(هێمن هەورامی) لە دیمانەیەكیدا لەگەڵ ئاژانسی ئەنادۆڵی توركی، مەترسییەكانی سیاسەتی (مالیكی) لەسەر بارودۆخی گشتیی عێراق و سەقامگیركردنی دیموكراسییەت تێیدا، نەشاردەوە.
(هەورامی) ئەوەی دووپات كردەوە كە ڕەفتارەكانی (مالیكی) بە بڵاوكردنەوەی 10 هەزار سەرباز لە سنووری نێوان هەرێمی كوردستان و بەشەكانی دیكەی عێراق و كاركردن بۆ گۆڕینی واقیعی ناوچە دابڕێندراوەكان بە هەمان شێوەی ڕژێمەكانی پێشوو، وا لە كورد ناكات بەغدا بۆ (مالیكی) جێ بهێڵێت و بێگومان كورد قسە و وەڵامی خۆی بۆ ئەوان دەبێت.
بێوەڵام نابین
بەرپرسی مەكتەبی پێوەندییەكانی دەرەوەی پارتی، دووپاتی كردەوە كە هیچ كاتێك كورد لە ڕەفتارەكانی ئەو حكوومەتە بێدەنگ نابێت ئەگەر بێت و بەهێز واقیعێكی تازەی لەسەر ناوچە دابڕێندراوەكانی هەرێمی كوردستان فەرز كرد و گوتی “بێگومان ئێمە بە هەمان زمان وەڵامی هەر هەوڵێك دەدەینەوە كە بیەوێت بە هێز یان بە زۆر واقیعێكی نامۆ بەسەر ناوچە دابڕێندراوەكانی هەرێمی كوردستاندا بچەسپێنێت، ئێمە داوای شەڕمان نەكردووە و نایشیكەین و هیچ كاتێكیش باوەڕمان پێی نەبووە، بەتایبەتی بۆ چارەكردنی كێشەی ناوچە دابڕێندراوەكان، هاوكات ئێمە پاڵپشتیی دەستوورمان كرد و دەنگمان بۆی دا، چونكە ماددەیەكی تێیدایە كە بە شێوەیەكی ئاشتییانە كێشەی ئەو ناوچانە چارە دەكات، بەڵام بەداخەوە حكوومەتی عێراق هێز لەو ناوچانە بڵاو دەكاتەوە و فیرقەكانی (5، 12، 2 و 3) دەجوڵێنێت و چەكی قورس دێنێتە ئەو ناوچانە، ئەمەیش بەڵگەیەكی زیندووە بۆ ئەوەی حكوومەت دەیەوێت واقیعێكی دیكە بەسەر ئەو ناوچانەدا بسەپێنێت.”
متمانە بە حكوومەتی (مالیكی) نەماوە
(هەورامی) نەیشاردەوە كورد و سەركردایەتیی سیاسیی كوردستان متمانەیان بە حكوومەتی (مالیكی) نەماوە، چونكە حكوومەتی نێوبراو هیچ یەكێك لە بەڵێنەكانی خۆی بەجێ نەگەیاندووە و ئەمەیش دەیسەلمێنێت كە باوەڕ بە عەقڵییەتی دیموكراسی و قبووڵكردنی بەرانبەر لە عێراقی تازەدا نییە. هەروەها گوتیشی “هەمیشە كورد كاری بۆ گۆڕینی بارودۆخی عێراق كردووە، بەوەی كە دەستوور ببێتە حەكەم، بەڵام بەداخەوە لە ئەمڕۆی عێراقدا تەوافوق نییە و ئێمەی كوردیش هەست بەوە ناكەین ئێمە هاوبەشی ڕاستەقینەین لە دەوڵەتی عێراقیدا، ئەم ڕەفتارەی حكوومەتی عێراقیش تازە نییە، بەڵكوو چەندین ساڵە لەو ناوچانەدا دەكرێت، بە بەڵگەی هێنانی پێنج فیرقەی تازەی سووپا و جوڵاندنی 3 یەكەی چەكی قورس، كە هەڵگری تۆپهاوێژی جۆری 155 ملیمە، ئەمە جگە لە هەبوونی تانك و زرێپۆش و كۆكردنەوەی سەد هەزار سەربازی عێراقی لەو ناوچەیەدا، بێگومان ئەو كردەوانەیش تەواو لە دژی لێدوانەكانی (مالیكی)ـن كە دەڵێت “ئێمە شەڕ لە دژی تیرۆ دەكەین.”
ئایا ئەو بە تۆپهاوێژی جۆری 155 شەڕی تیرۆر دەكات؟ ئێمە لە نیەتی تێگەییشتووین، ئەو دەیەوێت واقیعی ناوچەكە بگۆڕێت و دەستوور پێشیل بكات، ئێمە ئەو شتەمان لە (سەددام) قبوڵ نەكرد، جا ئایا لە (مالیكی)ـی قبووڵ دەكەین؟”
پابەندبوون بە دەستووری هەمیشەییەوە
(هەورامی) دووپاتی كردەوە كە هەر هەوڵێك بۆ لادانی (مالیكی) بدرێت، ئەوا لە چوارچێوەی هەوڵە سیاسییەكان دەبێت بە پێی دەستوور و كورد هیچ كاتێك گۆڕەپانەكە بۆ (مالیكی) چۆڵ ناكات و دەستبەرداری بەشداریی سیاسیی خۆی نابێت، بەڵكوو پشت بە دەستوور دەبەستێت، چونكە پابەندنەبوون بەو دەستوورەوە، یەكبوونی خاكی عێراق دەخاتە مەترسییەوە، ئەو دەستوورەیش هەشتا لە سەدی عێراقییەكان دەنگیان بۆ داوە و دەستووریش ڕێگەی بۆ ئەو مەبەستە داناوە.
ئەو هەروەها گوتی “پرسی سەندنەوەی متمانە لە (مالیكی) بە زۆر ڕێگە دەكرێت، لەوانەیش چوونە نێو ڕێككەوتنی تازە و هاوپەیمانێتیی تازە و لە دوای هەڵبژاردنی داهاتووی ئەنجوومەنی نوێنەران، كە نیاز وایە لە نیسانی ساڵی داهاتوودا بكرێت و لەوێدا دەتوانین لەسەر ئەوە ڕێك كەوین، كە ماوەی سەرۆكایەتیی ئەنجوومەنی نوێنەران لە دوو خول زیاتر نەبێت بە یاسا، پێویستە هەموومان لەسەر ئەوە ڕێك كەوین، ڕێگەیش لە بەردەم هەر كەسێك بگرین كە بیەوێت تاكڕۆیانە حوكمی ئەو وڵاتە بكات و بەرەو هەڵدێری ببات، زۆریش زەحمەتە بۆ ئێمە مامەڵە لەگەڵ كەسانێك بكەین، پابەندی ئەو بەرنامە سیاسییە نەبن، كە حكوومەت ڕایگەیاندووە، یانیش لە ڕێككەوتنە سیاسییەكان سڵ بكاتەوە، بەڵام ئێمە كۆی پڕۆسەی سیاسی لە یەك كەسدا كورت ناكەینەوە، بەڵكوو دەستوور پاڵپشتی ئێمەیە.”
چارەسەری ئاشتییانە
(هێمن هەورامی) پەنابردنی لایەنە سییاسییەكانی بۆ چارەسەری ئاشتییانە، بە باشترین چارەسەر و ڕێگە زانی و گوتی “تا ئەو كاتەی لایەنە سیاسییەكانی عێراق پابەندی دەستوور دەبن و بە شێوەیەكی دیموكراسییانە مامەڵە لەگەڵ یەكتردا دەكەن، بە دوور لە توندوتیژی هەرێمی كوردستان پابەندی ئەو بەشدارییە سیاسییە دەبێت، بەڵام لە هەمان كاتیشدا ئێمە بۆ هەر ئەگەرێك ئامادەین، كە بیەوێت هەر چارەسەرێكی نادەستووریمان بەسەردا بسەپێنێت، بە تایبەتی چارەسەری سەربازی.
ئەمەریكا بەڵێنی ئەوەی دا عێراق وەكوو وڵاتێكی دیموكراسی جێ بهێڵێت كە ئازادیی پێكهاتەكانی ڕابگرێت، وەك دیاریشە سەرۆككۆمار و سەركردەی دیكەی عێراقی وەكوو (عەممار حەكیم) و (ئەیاد عەللاوی) و سەركردەكانی ڕەوتی سەدر، مەترسیی خۆیان لە سیاسەتەكانی سەرۆكوەزیران نەشاردووەتەوە، ئێمە چاوەڕوانین، هاوبەندی نیشتمانی كاتێك بۆ چارەكردنی كێشەكان دابنێت و دیاری بكات و بێگومان گرفتەكان زۆرن، لەوانەیش هاوبەشی لە وەرگرتنی بڕیار و هاوسەنگی لە بەشداربوون لە سوپادا كە ئێستا ڕێژەی كورد لە سوپاسی عێراقدا 3%ـە، لە كاتێكدا كە پێویستە لانی كەم 17% بێت و دامەزرێنەرانی ئەفسەرانی سوپا و بڕیارەكانی پەیوەست بە سوپا كە لە لایەن (مالیكی)ـیەوە دەردەچێت، بۆیە ئەگەر ئێمەی كورد و عەرەبی شیعە و عەرەبی سوننە، تەنیا ڕێگەی ژیانی هاوبەشمان هەبێت، ئەوا پێویستە بە شێوەیەكی ئاشتییانە گرفتەكانی خۆمان چارە بكەین.”
پەنا بۆ چەك نابەین
بەرپرسی مەكتەبی پێوەندییەكانی دەرەوەی پارتی، هیوای خواست (مالیكی) پەند لە ئەزموون و مێژووی (سەددام) وەربگرێت و مەسەلەكە نەگەیەنێتە ئاستی پێكدادان لە نێوان كورد و عەرەبدا، چونكە ئەو ڕەفتارانە وا لە كورد ناكات سەر دابنەوێنێت و گوتیشی ” ئێمە وەكوو كورد بە ڕوونی ئەوەمان ڕاگەیاندووە، كە بە هیچ شێوەیەك لەگەڵ زیاتر لە دوو خولی سەرۆكایەتیدا نین، بۆ هەرسێ سەرۆكایەتییەكە و پێویستە پەرلەمان یاسایەك بۆ ئەم مەبەستە دابنێت”.
هەڵوێستی پارتی لە بارەی توركیا و سووریاوە
(هەورامی) گوتی “لە بارودۆخی سووریادا، ئێمە جەخت لەسەر یەكگرتوویی برایانی كوردمان لەوێ دەكەینەوە و ڕێگەیش بەوە نادەین، كورد و عەرەبی ناوچەكە بكەونە شەڕ لە دژی یەكتر و زۆریش بۆ ئێمە گرنگە لە هەڵوێستی ئۆپۆزسیۆنی سووریا تێ بگەین، بە تایبەت دوای كۆنگرەی دەوحە لە بارەی دیدیان بۆ مافی نەتەوە و پێكهاتەكانی گەلی سووریا و پێویستە سیاسەتی دەرەكیی سووریا جەخت لەسەر ڕێزگرتنی ئەم وڵاتە لە دیموكراسییەتی گەلان بكاتەوە. هەروەها ئێمە پاڵپشتیی برایانی كوردمان لە توركیا دەكەین و هیوادارین بەڕێگەی ئاشتییانەوە، بگەنە مەرامی خۆیان و پێم وایە دوایین مانگرتنیش پەیامی خۆی گەیاند، بە تایبەتی دوای داننانی حكوومەتی توركیا بەوەی كە پێویستە كورد بۆ بەرگریكردن لە خۆیان لە دادگەكاندا زمانی كوردی بەكار بهێنن.
ئێمە لەگەڵ هەموو شێوازێكی ئاشتییانەین و لە دژی هەر شێوازێكیش دەوەستینەوە كە توندوتیژی و خوێنڕشتنی تێدا بێت.
