ئەرسەلان مەحمود: لەپەنای مەساج و، مەی..هێزێك دەیەوێ كولتورە جیاوازەكان، بڕەتێنێ
نوچەنێت. تایبەت
نوچەنێت: ئێستا لەكوردستان دۆخێكی ئاڵۆز هاتۆتە پێش، ئایا ئەو دۆخە لەخزمەتی كورددایە؟ چی بكرێت بۆ رەواندنەوەی ئاڵۆزییەكان؟ ئەركی كام لایەنە كار بۆ رەواندنەوەی بكات؟ دەرئەنجامی كار كردن لەسەر تۆخكردنەوەی ئەو ئاڵۆزیانە چی دەبێت؟.
ئەرسەلان مەحمود : بەلای منەوە، هەتا ئێشتایش ئێمە لەبێچارەترین بوونەوەرەكانی ئەم سەر زەمینەین، ئێمە پێش مرۆڤبوون، بوونەوەرگەلێكی ئاینگەراو، پێش كورد بوون، گەلەیەكی خێڵگەراو، حزبییەكی سوننەتی و، حوكمڕانێكی تەشریفاتی، بەڵێ ژیان و، ژینگەمان لێبووە بەبانێك و، هەزران هەوا..
تۆببینە، ماركس ئەوەندەی كورد ماركسیەكانی لای ئێمە ماركسی نەبوو، ئیسلامییەكانی ئەوپەڕی دنیای ئیسلام، ئەوەندەی كورد ئیسلامییەكانی لای ئێمە دژە بەرژەوەندی نەتەوەكانی خۆیان نەبوون، هیچ قەومییەك بۆ هەمیشە بەهێزو لەپێش ترین نەبووە، بەڵام قەومییەكانی ئێمە بۆ هەمیشە دەبێ پێشمانكەون، كەچی دواجار هەمووشمان واین لەبەردەم كۆمەڵگەیەكی جاڕسكراوی بێ دەسەڵاتداو، شەرمیش لەو بێچارەییەمان ناكەین، بەخاتری هەڵكشانی بەرژەوەندییە حزبییەكانیش، توانا ماددی و، مرۆییەكانی هەموو خەڵكی كوردستان بەهەدەر ئەدەین، ئەگەر وانییە، مەگەر لەكوردەواریدا، هەر مەساج و، مەیی، كەوتوونەتە دەرەوەی حەرامكراوەكان؟، ئایا ئەم هەڵایساوەی بادینان، بەرئەنجامی ململانێیەكی قوڵی نێوان دو جۆر رێكخستنی حزبییە، یان دو كولتوری كۆمەڵایەتی جیاواز؟..
بێگومان ڕونە، ئەوەی رو ئەدات، بەرئەنجامی ململانێ قوڵەكەیە، هێزێك لەوێ دەیەوێ دەس بەسەوابتاتی خۆیەوە بگرێ و، هێزێكیش نەك لەبەرامبەر ئەم هێزدا، بەڵكو لەسەر ئاستی كوردستان ئەگەر بۆی بلوێ هەموو جومگە نەرێتییەكانی كۆمەڵگەو، شعوری خەڵكەكەیشی بۆ وەها ئەنجامگرییەك ئیستغلال دەكات، هەر ئەمەیشە وایكردوە سیاسیەكانی كورد، لەمسەر بۆ ئەو سەریان، لەبەرامبەر یەكترو، خەڵكەكەی خۆیشیان تائەوپەڕی لوتبەرزی، لوتبەرزو، خۆبەزۆر زان و، دڵڕەق بن، بەو عیبارەتەیش كۆمەڵگەیەكی وابەستەو، وەستاو، ئایا لەكوێ دەتوانێ نۆرماڵ بژی؟، ئایا چۆن و لەكوێ دەتوانێ ببێتە خاوەن دەوڵەت و، نۆرمێكی خۆشگونجاو؟، فەرموو ئێوەش قسەی خۆتان بكەن.
ئێوە لێرەدا بەجۆرێك لەجۆرەكان، نیەتی هێوربوونەوەی ئەم دۆخە تەبەنی دەكەن، ئێمەیش هەروەها، فەرموون بۆ پێكەوە ژیان و، بەشینەوەی هزرو گیانی لێبوردەیی، فەرموون بابگەڕێینەوە بۆ حوكمی بێچەن و، چۆنی یاسا، بەڵام ئایا تێڕوانینی گروپ؟، عەقلیەتی خێڵ؟، ڕوانگەی ڕەجعی حزبگەرا، نامۆراڵییەتی كۆمەڵگە؟، كۆمەڵگەی ڕیشنپۆش؟، دەبێ چییەك لەم هەموو نامەوزوعییەتوو بێبەهابوونەی بوون لەم وڵاتەدا، بۆ دیاریكردنی نەخۆشییە بنچینەییەكان وەربگرین؟..
دیارە بۆ وەها كارێك، دەبێ خۆ باوێینە ژێر باری خۆ بە بەرپرسیار زانینێكی زۆر وەردو بەدیقەتەوە، یانی بەزمان و، بڕیارە هاوشێوەكانی رابردو، هیچ قسەیەكی بەكەڵكمان پێ ناچێتە سەر مێزی چارەسەر؟، لەبەر ئەوە، تەنها ئەوە هەر كەڕو لاڵی دونیایی دەرەوەی خۆمان نەبووەو نییە، مرۆڤی كوردی لەو دۆخەدا جێهێڵاوە، هۆكارە نێو خۆییەكانیش بەدەر نین لەهێشتنەوەی ئەم واقیعە تاڵ و، نەخوازراوە، ڕوداوەكانی ئەم دواییەی دهۆك و، زاخۆیش، هەتا ئێرە لەنوێترین ئەو هۆكارە ناوخۆییە گەورەو بچوكانەن و، گرینگترین ڕەنگدانەوەیشیان دەكرێ لەم چەند خاڵەی خوارەوەدا، چڕ بكرێنەوە:
لەئاستی دەرەكی:
1. بەیەكەوە ژیانی ئاینزاكان هێشتا لەژێر پرسیار دەرنەچووە.
2. مرۆڤی كورد، هێشتا نەبووە بەمرۆڤێكی خۆشگونجاو.
3. حكومڕانێتی، هێشتا نەبووە بەخاوەن فۆڕمێكی نۆرماڵی گەلی.
4. ڕەوینەوەی هاوخەمییەكان بۆ دامەزراندنی دەوڵەتی كوردی.
لەئاستی ناوخۆیی:
1. قوڵكردنەوەی ململانێ حزبییەكان و، لرفاندنەوەی حزبۆكراتییەت.
2. ڕوتكردنەوەی حكومەت لەحیكمەت و، بەلارێدابردنی یاسا.
3. شڵەژاندنی بازاڕو، دەمەزەردكردنەوەی ئۆینبازییەت.
4. هێنانەوە ئارای واقیعییەتێكی نائامادەی ڕیشنپۆشەكان.
5. دڵشكانی خەڵك و، برەو پەیداكردنەوەی كۆبوونەوە بێماناكان.
لێرەوە دەمەوێ ئەوە بڵێم، هەر جۆرە قسەكردنێك بەئاراستەی ناسینەوەی چەشنیەتی ئەم ئاڵۆزییە، دیاریكردنە، دیاریكردنیش وەك هەمیشە نیوەی چارەسەرە، ئێستا هێزێك لەوێ، لەلایەك دەڵی” بەناچارییەت و، زۆرەملێیی گەمارۆ دراوین”، لەلایەكی تریشەوە ئیش بۆ پەكخستنی پرۆسەی بەیەكەوە ژیان و، دەركردنی كولتورە جیاوازەكان دەكات، بێگومان لەم وڵاتەدا بەگشتی، ئەمەیش مانای ئەوەیە جەنگ بەردەوامی هەیە، من پێم وایە ئەم هێزە بۆئەوەی ئەم خواستەشی بێتە دی، پەنا بۆ تەكنیكی پارچە پارچە بوون و، دابەشبوونی نەرێتی لەكۆمەڵگەدا دەبات.
ئەرسەلان مەحمود: لەپەنای مەساج و، مەی..هێزێك دەیەوێ كولتورە جیاوازەكان، بڕەتێنێ
0
Share.
