نوچەنێت: هەولێر
دیندار نەجمان دۆسكی رایگەیاند، پارتی هەڕەشەی لە یەكگرتووەكانی دهۆك نەكردووە، بەڵكو ئەندام پەرلەمانەكانی یەكگرتوو خۆیان بە باشیان زانیوە بەشداری دانیشتنی پەرلەمان نەكەن، وتیشی: “پارتی مافی خۆیەتی پرسێكی وەها گرنگ بۆ خەڵك روون بكاتەوە و قەناعەت بە پەرلەمانتاران بهێنێت”.
دۆسكی كە ئەندامی دەست لە كاركێشاوەی سەركردایەتی یەكگرتووی ئیسلامییە، لە لێدوانێكی رۆژنامەوانیدا رایگەیاند: “پارتی دیموكراتی كوردستان هیچ هەڕەشە و فشارێكی نەكردووەتە سەر پەرلەمانتارەكانی یەكگرتووی ئیسلامی لە بادینان”.
وتیشی: “پارتی دیموكراتی كوردستان، مافی خۆیەتی قەناعەت بە پەرلەمانتاران بهێنێت و بۆچوونی خۆیانی بۆ روونبكاتەوە لەبارەی پرسێكی واگرنگ، بەڵام بەهیچ شێوەیەك هەڕەشە و فشاری نەكردووەتە سەر پەرلەمانتارانی یەكگرتوو لە بادینان، بەڵكو ٤ پەرلەمانتارەكەی یەكگرتوو لە بادینان و پەرلەمانتارەكەی یەكگرتوو لە هەولێر خۆیان پێیان باش بووە بەشداری لە دانیشتنە نەكەن، ئەگەر پارتی دیموكراتی كوردستان، فشار و هەڕەشەی كردبایە، ئەوا چۆن لە دانیشتنی ٢٣ حوزەیرانی پەرلەمانی كوردستان، دوو پەرلەمانتاری یەكگرتوو لە بادینان بەشداریان لە دانیشتنەكە دەكرد؟”.