رزگار رەزا چوچانی
ئەم ژنە ناوی گۆنا سەعیدە.
بیروباوەڕی سیاسی من, لەگەڵ ئەو, هێندە لەیەک دوورە، هیچ سازان و رێککەوتنێک بەیەکیان ناگەیەنێ.
ئەو جگە لەوەی چالاکوانە، رەخنەگرە، هەندێ جار بەرەخنەکانی کە دەینوسێت لەسەر بابەتە سیاسییەکان، داروبەردی ئەو بڕوا سیاسیەی من باوەڕم پێی هەیە، بەسەریەکەوە ناهێڵێ، دیسان وەک ئەوەی کەخۆی بڕوای پێی هەیە دەینوسێتەوە.
ئەگەر بەعەقڵی کوردستان لەرەخنەکانی ئەوژنە بڕوانم، ئەبێ بڵێم، ئەو پێشێلی بروای منی کردووە، بەڵام بەعەقڵی خۆم دەڵێم، ئەو مومارەسەی ئازادی خۆی دەکات و بەوبڕوای کەخۆی هەیەتی دەیەوێ وڵات رێککتر لەوەی من دەیڵێم بنیاتبنرێتەوە، یان دروست لەوەی من دەیبنم بنوسێتەوە.
بەهۆی کارەوە، یەکترناسینێکم لەگەڵ ئەو خانمە هەیە، بەڵام تا ئێستا راستەوخۆ لەسەر جیاوازی بروای سیاسی لەگەڵ ئەو خاتونە قسەیەکم نەکردووە، لەسەر هیچ کام لەپرسەکانی تریش مناقەشەو راگۆڕینەوەیەکم لەگەڵی نەبووە، ناشمەوێ هەم بێ، چونکە دەزانم هەرکەسەو بەبڕوای سیاسیی خۆیەوەیەوە جوانە، ئەمما…
لەدوورەوە هەمیشە راکانیم دیووە، بەچالاکییەکانی ئاشنام، بۆیە دەتوانم بەویژدانەوە بڵێم:
گۆنا کێوێکە لەخەبات و تێکۆشان بۆ باشترکردنی کۆمەڵگە، بۆ باشترکردنی وڵات، بۆ بەئینسان بینینی ئینسان.
گۆنا ژنێکە دەیەوێ لەوڵاتەکەیدا ئینسان ئینسان بێ، ئازادی بەمانای خۆی بوونی هەبێ، دڵنیاشم برواکانی گۆنا جێبگرن و سەر بگرن، و وەک خۆی کاریان لەسەر بکرێت، هەموومان لەکوردستانێکی ئازاددا لێی بەهرەمەند دەبین، و ئینسانەکانیش شکۆمەندانەتر دەژین.
راستە رەنگە هەندێ کات رەخنەکانی ئەو بەمەنتقی من یان تۆ، توندبێ، پێمان وابێ سنورەکانی بڕوای ئێمە دەبەزێنێ، بەڵام دەبێ بشزانین ئەو لەو مرۆڤانەیە خەبات بۆ ئینسان سەیرکردنی ئینسان دەکات، رەنگە کەدەبینێ شکۆی ئینسانێک پێشێل دەکرێت، زۆر زیاتر لەوانەی میانیان لەگەڵ خەباتدا بۆ ئینسانیەت نییە، گرژتر ببێت و توندتریش قسە بکات، چونکە وەک وتم ئەو خەباتکارێکی مافەکانی ئینسانە و ئاشنایە بەئازار و خۆشییەکانی مرۆڤ، بۆیە زیاتر لەهەموان، لەمسی ئازارەکانی ئینسان دەکات و تێیان دەگات، بێگومان ئەوەش ئەو مافەی پێدەدات وەک مافێکی رەوای خۆی، کە کەس مافی رێگری نییە لێی، هەندێ جار گرژتر قسان بکات و بدوێ.
بەداخەوە، لەجێی پاداشت، لەجێی پێزانین بۆ ماندوبونی ئەم ژنە بەڕێزە، لێرە لەم فەیسبووکە بینیم، هەڕەشەی لێکراوە، یان خەڵک هاندراوە بۆ ئەوەی سوکایەتی بەم ژنە بکرێت و خەتەر لەسەر ژیانی دروستبکرێت، بێ ئەوەی بیر لەوە بکرێتەوە، خەتەر دروستکردن لەسەر ژیانی گۆنا خەتەر دروستکردنە لەسەر داهاتووی میللەتێک، ئاخر لەناو کورددا، گۆناکان، ئەوانەی خەبات بۆ ئینسان بوونی ئینسان دەکەن، بەپەنجەکانی دەست دەژمێردرێن، عەجەب ئەوانەی بەخەمی ئایندەی ئەو وڵاتەوەن، ئەوانەی کە تێدەگەن بنیاتنانی هەر وڵاتێک بێ بنیاتنانی ئینسانیەت تێیدا، بنیاتنانێکی شکڵی و بێ کەڵکە، بەدەنگ نایەن لەسەر هەوڵی بێ دەنگکردنی گۆنا و وەستاندنی گۆنا، گۆنایەک کەهەوڵی بنیاتنانی ئینسان دەدات لەتەک هەوڵە سیاسییەکانی بۆ بنیاتنانی وڵاتێکی تژی لەعەدالەت.
من لێرەوە بەخاتوو گۆنا سەعید دەڵێم:
هێندەی گەورەیی جیاوازیی بروای سیاسیم لەگەڵ تۆدا، وەک کوردێک، وەک تاکێک، منەتباری هەوڵ و تێکۆشان، خەباتی تۆم.
تکامە وەک ئەوەی تائێستا هەڕەشەی گەورەتر لەخەبات نەیوەستاندووی نەوەستی، و بەردەوامبە لەو رێگای خۆت.
دڵنیابە ئەوەی بڕوای سیاسیی وێژدانی نەخواردبێ، ئەوەی دەزانێ وڵات بەجیاوازییەکانییەوە وڵاتە، دەنگی لەگەڵ دەنگی تۆیە، پشتیوان و هاوڕێ و هاوکارتە.
