نوچەنێت.هه‌ولێر:
حكومەتی هەرێم و شاندێكی كۆماری ئیسلامی ئێران كۆبونەوەو بارزانیش جەختی لەسەر زیاتر بەهێزكردنی ئەو پەیوەندییانە كردەوە بە تایبەت لە ڕووی تۆكمەكردنی ئاسایشی خاڵە سنوورییەكانی نێوان هەردوولا و رێگریكردن لە هەر حاڵەتێكی نەخوازراو كە لە سنوورەكان دروست ببێت.
ماڵپەڕی حكومەتی هەرێمی کوردستان بڵاوی کردەوە”دوای نیوەڕۆی ئەمڕۆ چوارشەممە 2015/4/22 نێچیرڤان بارزانی سەرۆك وەزیرانی هەرێمی كوردستان پێشوازی لە بەڕێز سەردار قاسمی ڕەزایی فەرماندەی گشتی هێزەكانی پاسەوانیی سنووری كۆماری ئیسلامی ئێران و شاندێكی باڵای سەربازیی یاوەری كە لە فەرماندەكانی پاسەوانانی خاڵە سنوورییەكانی ئێران پێكهاتبوو و هەروەها هەریەك لە لیوا عەبدولكەریم فەرماندەی گشتی پاسەوانانی سنووری عێراق و لیوا شێركۆ فەرماندەی پاسەوانانی سنووری هەرێمی كوردستان، كرد“.
ماڵپەڕەكە رونیشیكردوەتەوە”لە دیدارێكدا شاندی میوان سوپاس و پێزانین و دڵخۆشی خۆیان بۆ دیداریان لەگەڵ سەرۆك وەزیرانی هەرێمی كوردستان دەربڕی و دواتر زانیاری پێویستیان لەبارەی بارودۆخی خاڵە سنوورییەكانی نێوان عێراق و ئێران بە گشتی و بە تایبەت سنووری نێوان هەرێمی كوردستان و كۆماری ئیسلامی ئێران دایە بەڕێز سەرۆك وەزیرانی هەرێم. هەروەها باسیان لە پەیوەندییەكانی نێوان هەرێم و كۆماری ئیسلامی و زیاتر بەهێزكردن و توندوتۆڵكردنی ئەو پەیوەندییانە كرد بە تایبەت لە ڕووی زیاتر پاراستنی سنوورەكانی نێوان هەردوولا“.
لەبەرانبەریشدا”نێچیرڤان بارزانی سوپاسی ئەو سەردانەی شاندی باڵای فەرماندەیی پاسەوانیی سنووری كۆماری ئیسلامی ئێرانی كرد و باسی لە پەیوەندییە دێرین و تۆكمەكانی نێوان كۆماری ئیسلامی ئێران و هەرێمی كوردستان كرد و بە پەیوەندییەكی ئەرێنی و باشی وەسف كرد و جەختی لەسەر زیاتر بەهێزكردنی ئەو پەیوەندییانە كردەوە بە تایبەت لە ڕووی تۆكمەكردنی ئاسایشی خاڵە سنوورییەكانی نێوان هەردوولا و رێگریكردن لە هەر حاڵەتێكی نەخوازراو كە لە سنوورەكان دروست ببێت. بۆ ئەم مەبەستەش پشتگیری تەواوی حكوومەتی هەرێمی كوردستانی بۆ شاندی میوان دەربڕی“.
