فڕاكسیۆنی پارتی: لەسەر بابەتی بوونی نادادپەروەری لە مووچەدا لۆدی زۆرمان لەسەرە
نوچەنێت.ههولێر:
سەرۆكی فڕاكسیۆنی پارتی لە پەرلەمانی كوردستان،دەڵێت،یەكێك لەو بابەتانەی كە ڕووبەڕوومان دەكرێتەوە، نادادپەروەرییە لە مووچە و لۆدێكی زۆریشمان لەسەرە،بەڵام هاووڵاتیانیش هەقی خۆیانە.
پێوەست بەو كێشە دیارانەی هاووڵاتیان كە ئاراستەی پەرلەمان و فڕاكسیۆنی پارتی دەكەن،ئومێد خۆشناو،سەرۆكی فڕاكسیۆنی پارتیی دیموكراتی كوردستان لە پەرلەمان،بە ماڵپەری فەرمی حیزبەكەی وتوە”یەكێك لەو بابەتانەی كە زۆر ڕووبەڕوومان دەكرێتەوە،نادادپەروەرییە لە مووچە و لۆدێكی زۆر لەسەر ئەندامانی پەرلەمان هەیە، هاووڵاتیانیش هەقی خۆیانە،بۆیەیش ئێمە لە ماوەی رابردوودا وەكو فڕاكسیۆنی پارتی پڕۆژەیاسایەكمان پێشكەش كرد بۆ پێداچوونەوە بە مووچەی پلە تایبەتەكان،لەگەڵ ئەوەیشدا ئەمڕۆ كێشەی مووچە و كەمیی مووچەی پێشمەرگە و پێداویستییەكانیان و ژیان و گوزەرانی هێزەكانی ناوخۆ و پێشمەرگە،خەمی ئێمە و هاوڵاتیانیشە“.
سەرۆكی فڕاكسیۆنی پارتی دەشڵێت”هەنگاوەكانمان بۆ چارەكردنی ئەو كێشانە دەست پێ كردوون و لە ماوەی رۆژانی رابردوویشدا كەسانی پسپۆڕی بواری ئابووری كە لە فڕاكسیۆنی پارتی هەن، پڕۆژەیەكمان بۆ پێداچوونەوە بە مووچەی پلە تایبەتەكاندا ئامادە كردووە“.
