بارزانی: شێوازی دیاریكردنی ئەندامانی كۆمیسیۆنی هەڵبژاردنەكانی هەرێم نادروست بووە
نوچەنێت.هەولێر:
سەرۆكی هەرێمی كوردستان پێشوازی لە نوێنەران و سەرۆكی فڕاكسیۆنەكانی توركمان و كلدان و ئاشوور و سریان و ئەرمەن لە پارلەمانی كوردستان رایگەیاند،شێوازی دیاریكردنی ئەندامانی كۆمیسیۆن نادروست بووە و ئەم بابەتە زیان بە پێگە و ناوبانگی هەرێمی كوردستان دەگەیێنێت،كۆمیسیۆنی هەڵبژاردن دامەزراوەیەكی نیشتیمانییە و ناكرێ بە بیرێكی تەسكی حزبی مامەڵەی لەگەڵدا بكرێت.
ماڵپەڕی سەرۆکایەتی کوردستان بڵاوی کردەوە”ئەمڕۆ پێنجشەممە 11ـی 12ـی 2014 لە سەلاحەدین مەسعود بارزانی سەرۆكی هەرێمی كوردستان پێشوازی لە نوێنەران و سەرۆكی فڕاكسیۆنەكانی توركمان و كلدان و ئاشوور و سریان و ئەرمەن لە پارلەمانی كوردستان كرد و لەگەڵیاندا كۆبۆیەوە“.
بەپێی هەواڵی ماڵپەڕی سەرۆکایەتی”لەم كۆبوونەوەیەدا قسە لەبارەی چۆنییەتی دیاریكردنی ئەندامانی كۆمیسیۆنی باڵای هەڵبژاردنی كوردستان لە پارلەمانی كوردستان كرا و، نوێنەران و سەرۆكی فڕاكسیۆنەكانی توركمان و كلدان و ئاشوور و سریان و ئەرمەن لە پارلەمانی كوردستان نیگەرانیی خۆیان لەبارەی شێوازی دیاریكردنی ئەندامانی كۆمیسیۆن و پشتگوێخستنی بەش و داواكارییەكانیان لە كۆمیسیۆنی هەڵبژاردن بە بارزانی ڕاگەیاند. هەروەها ئەوەیان خستەڕوو كە هەماهەنگینەكردنی لایەنە سیاسییەكانی كوردستان لەگەڵ پێكهاتە نەتەوەیی و ئایینییەكان لە مەسەلەی دیاریكردنی ئەندامانی كۆمیسیۆنی هەڵبژاردن سابیقەیەكی خراپ دروست دەكات و ترسی ئەوەیان هەیە بابەتی لەمشێوەیە لە داهاتوویشدا دووبارە ببێتەوە“.
ماڵپەڕی سەرۆکایەتی ئەوەی خستۆتەڕوو کە”نوێنەران و سەرۆكی فڕاكسیۆنەكانی توركمان و كلدان و ئاشوور و سریان و ئەرمەن لە پارلەمانی كوردستان داوایان لە بارزانی وەك پارێزەری ماف و داواكاریی پێكهاتە نەتەوەیی و ئایینییەكانی كوردستان و عێراق كرد كە، ڕێگە لەوە بگیرێت مافەكانیان لە كۆمیسیۆن پشتگوێ بخرێت و پێكهاتەكان نوێنەرایەتیی ڕاستەقینەیان لە كۆمیسیۆندا هەبێت.هەروەها سوپاسی بارزانیشیان كرد كە هەردەم بەدەنگ داواكاری و مافی پێكهاتە ئایینی و نەتەوەییەكان هاتووە و بایەخیان پێ دەدات“.
لەبەرانبەریشدا”بارزانی پاڵپشتیی تەواوی خۆی بۆ داواكاریی شاندی میوان ڕاگەیاند و جەختی لەوە كردەوە كە شێوازی دیاریكردنی ئەندامانی كۆمیسیۆن نادروست بووە و ئەوەی خستەڕوو كە ئەم بابەتە زیان بە پێگە و ناوبانگی هەرێمی كوردستان دەگەیێنێت. كۆمیسیۆنی هەڵبژاردن دامەزراوەیەكی نیشتیمانییە و ناكرێ بە بیرێكی تەسكی حزبی مامەڵەی لەگەڵدا بكرێت و پێویستە هەموو لایەك بەشداریی ڕاستەقینەیان هەبێت و هیچ لایەنێكیش بۆی نییە لەجیاتی پێكهاتەكان نوێنەر دیاری بكات“.
ماڵپەڕی سەرۆکایەتی ئەوەش ئاشکرا دەکات کە”سەرۆكی هەرێم نوێنەران و سەرۆكی فڕاكسیۆنەكانی توركمان و كلدان و ئاشوور و سریان و ئەرمەن لە پارلەمانی كوردستانی لەوە دڵنیا كردەوە كە هەروەكچۆن لە پڕۆسەی نووسینەوەی دەستووری عێراقیدا پێداگیری لەسەر چەسپاندنی مافی پێكهاتە نەتەوەیی و ئایینییەكانی عێراق كردووە ئەوهایش بەردەوام دەبێت لە پاڵپشتیكردن و پاراستنی مافەكانیان. سەرۆك بارزانی ئەوەیشی دووپات كردەوە كە هەموو تواناكانیشی دەخاتە گەڕ بۆ گەییشتن بە چارەسەرێكی گونجاو“.
