شاندی حكومەتی هەرێمی كوردستان رۆژی یەكشەممە دەچێتە بەغدا
نوچەنێت.رووداو:
بڕیارە رۆژی یەكشەممە 30/11/2014،شاندی هەرێمی كوردستان بە سەرۆكایەتی سەرۆكی حكومەت سەردانی بەغدا بكات و لەگەڵ سێ سەرۆكایەتییەكەی عێراق كۆببێتەوە،بە مەبەستی چارەسەركردنی پرسی بودجە و مووچە و كێشە هەڵپەسێردراوەكانی دیكەی نێوان هەولێر و بەغدا.
سایتی رووداو ئاشكرای كردوە،رۆژی یەكشەممە 30ی تشرینی دووەمی 2014، شاندی هەرێمی كوردستان بە سەرۆكایەتیی نێچیرڤان بارزانی، سەرۆكی حكومەت سەردانی بەغدا دەكات و لەگەڵ هەریەك لە د. فوئاد مەعسووم، سەرۆككۆماری عێراق، حەیدەر عەبادی، سەرۆكوەزیران و سەلیم جبووری، سەرۆكی پەرلەمان كۆدەبێتەوە.
ئەندامانی شاندەكە بریتین لە قوباد تاڵەبانی،جێگری سەرۆكی حكومەت،د.ئاشتی هەورامی،وەزیری سامانە سرووشتییەكان،رێباز حەملان،وەزیری دارایی،د. عەلی سندی،وەزیری پلاندانان،سەفین دزەیی،وتەبێژی حكومەت و د. ئامانج رەحیم،سەرۆكی فەرمانگەی یاسایی ئەنجوومەنی وەزیران. هەروەها لە كۆبوونەوەی نێوان شاندی كوردستان و سەرۆكوەزیرانی عێراق، عادل عەبدولمەهدی، وەزیری نەوتی عێراقیش ئامادەدەبێت.
رۆژی 13/11/2014، لە كۆبوونەوەیەكدا نێچیرڤان بارزانی و عادل عەبدولمەهدی بۆ گەیشتن بە چارەسەرێكی گشتیر رێككەوتننامەیەكی سەرەتاییان واژۆكرد،بەپێی رێككەوتنەكە حكومەتی هەرێمی كوردستانە رۆژانە 150 هەزار بەرمیل نەوتی كەركووك لەرێگەی كۆمپانیای سۆمۆوە هەناردەبكات و بەغداش 500 ملیۆن دۆلار رەوانەی هەولێر بكات.
زیاتر لە هەفتەیەكە هەولێر دەستی بە هەناردەكردنی نەوتەكە كردووە و دوێنێش تەواوی پارەكەی بەغدا گەیشتە هەرێمی كوردستان.لە خاڵی سێیەمی رێككەوتنەكەشدا هاتبوو،كە لە ئایندەیەكی نزیكدا نێچیرڤان بارزانی بە یاوەری شاندێك سەردانی بەغدا بكات.
