ئەمساڵ لە كەركووك 82 ژن كوژراون
نوچەنێت-سۆمەریە نیوز
سەرۆكی رێكخراوێكی تایبەت بە مافەكانی ژنان لە كەركووك دەڵێت ئەمساڵ لە سنووری ئەو پارێزگایەدا 82 ژن كوژراون و 2 حاڵەتی رفاندنی ژنانیش تۆماركراوون.
سرود محەممەد فالح سەرۆكی رێكخراوی هیوا تایبەت بە مافەكانی ژنان لە رۆژی جیهانی مافەكانی ژناندا وتویەتی ئەو 82 حاڵەتە بەمشێوەیە دابەشبوون: 24 حاڵەتی خۆكوشتن، 53 حاڵەتی خۆسووتاندن و 5 حاڵەتی كوشتنی راستەوخۆ لەلایەن پیاوانەوە.
سرود وتویەتی گرفتێكی گەورەی ژنانی كەركووك دیاردەی مارەبڕینە لە دەرەوەی دادگاكان، چونكە بەو شێوەیە زۆركات مافەكانی ژنان لە پرۆسەی هاوسەرگیریدا دەفەوتێت و لایەنی پەیوەندیدار ناتوانێت وەك پێویست بەرگرییان لێبكات.
شیاوی وتنە ساڵی 1999 بۆ یەكەمجار رێكخراوی نەتەوە یەكگرتووەكان 25ی نۆڤەمبەری دیاریكرد وەك رۆژی جیهانی رووبەڕووبوونەوەی توندوتیژی دژی ژنان.
