ئیتالیا:بەردەوام دەبين لە هاوكاریكردنی پێشمەرگە و دابینكردنی چەكی باشتر و كردنەوەی بنكەی مەشقپێكردن لە كوردستان
نوچەنێت – هەولێر:
سەرۆكی ئەركانی سوپای ئیتاڵیا و بارزانی كۆدەبنەوەو ڕایگەیاند،كە وڵاتەكەی بەردەوام دەبێت لە هاوكاریكردنی پێشمەرگە و كار بۆ دابینكردنی چەكی باشتر و مەشقپێكردنی پێشمەرگە لە ئیتاڵیا و هەروەها كردنەوەی بنكەیەكی مەشقپێكردن لە كوردستان دەكات.
ماڵپەڕی فەرمی سەرۆكایەیتی هەرێم بڵاویكردوەتەوە”ئەمڕۆ دووشەممە 10ـی 11ـی 2014 لە سەلاحەدین مەسعود بارزانی سەرۆكی هەرێمی كوردستان پێشوازی لە ئەدمیراڵ لویگی بینێڵی مانتێڵی سەرۆكی ئەركانی سوپای ئیتاڵیا و شاندێكی یاوەری كرد كە لە ژمارەیەك پلەدار و ڕاوێژكاری سەربازیی سوپای ئیتاڵیا پێكهاتبوون“.
لەم دیدارەدا فواد حوسێن سەرۆكی دیوانی سەرۆكایەتیی هەرێمی كوردستان و مستەفا سەید قادر وەزیری پێشمەرگە و بابەكر زێباری سوپاسالاری عێراق و فەریق روكن تەیار ئەنوەر حەمەدئەمین فەرماندەی ھێزە ئاسمانییەكانی عێراق و فەلاح مستەفا بەرپرسی فەرمانگەی پەیوەندییەكانی هەرێم و جەعفەر شێخ مستەفا و فەریق شێروان و جەبار یاوەر ئەندامانی فەرماندەیی گشتیی هێزەكانی پاراستنی هەرێمی كوردستان ئامادە بوون.
بەپێ هەواڵی ماڵپەڕەكە”لە دیدارەكەدا سەرۆكی ئەركانی سوپای ئیتاڵیا سوپاسی بارزانی كرد بۆ ڕەخساندنی ئەم دیدارە و ئەو پێشوازییەی لێی كراوە و وێڕای ئاماژەدان بە پەیوەندییەكانی نێوان هەرێمی كوردستان و ئیتاڵیا ئەوەی خستەڕوو كە لە وڵاتەكەی سۆزێكی تایبەتی بەرانبەر گەلی كوردستان هەیە“.
ئەوەش ئاشكراوە”ناوبراو دەستخۆشی لە بارزانی و هێزی پێشمەرگە كرد كە بەرگریی لە پێكهاتە نەتەوەیی و ئایینییەكان دەكەن و هێمای بەوەدا كە ئیتاڵیا بە شانازییەوە سەیری ڕۆڵی بوێرانەی پێشمەرگە دەكات و جەختیشی لەوە كردەوە كە ئەوەی پێشمەرگە لەبەرانبەر تیرۆریستاندا كردوویەتی كارێكی گەورە و دەستكەوتێكی مەزنە“.
ماڵپەڕەكە جەختی لەوەشكردوەتەوە،لەبارەی پاڵپشتیكردنی هێزەكانی پێشمەرگەی كوردستانیش سەرۆكی ئەركانی سوپای ئیتاڵیا ڕایگەیاندوە”كە وڵاتەكەی بەردەوام دەبێت لە هاوكاریكردنی پێشمەرگە و كار بۆ دابینكردنی چەكی باشتر و مەشقپێكردنی پێشمەرگە لە ئیتاڵیا و هەروەها كردنەوەی بنكەیەكی مەشقپێكردن لە كوردستان دەكات“.
سەرۆكی ئەركانی سوپای ئیتاڵیا ئەوەیشی باسكردوە”كە لەپێناو بەهێزتركردنی هێزەكانی عێراقی ئیتاڵیا ئامادەیە هاوكاری و مەشق و ڕاهێنان پێشكەشی سوپای عێراقیش بكات و بە پێویستیشی زانی كە وڵاتانی ئەوروپایی ڕێوشوێنی گونجاو بگرنەبەر بۆ ئەوەی ئەوە گەنجانەی لەگەڵ گڕووپە تیرۆریستییەكان تێكەڵ بوونە نەتوانن بگەنە ناوچەی ڕۆژهەڵاتی ناوەڕاست و هاوكاری تیرۆریستان بن“.
هەر بەپێ هەواڵی ماڵپەڕەكە لەبەرانبەردا سەرۆك بە گەرمی بەخێرهاتنی سەرۆكی ئەركانی سوپای ئیتاڵیا و شاندی یاوەری كرد و جەختی”لە دۆستایەتیی قووڵی گەلی كوردستان و ئیتاڵیای كردەوە و سوپاسی حكوومەت و گەلی ئیتاڵیاشی كرد كە لە كاتی تەنگانەدا پاڵپشتیی خۆیان بۆ گەلی كوردستان ڕاگەیاند و هاوكاری هێزی پێشمەرگەی كوردستان بوون“.
بارزانی ئاماژەی بە شەڕی تیرۆریستانی داعش دا و ئەوەی خستەڕوو”كە گەلەكەمان هەر لە كۆبانێ هەتا خانەقین ڕووبەڕووی ترسناكترین ڕێكخراوی تیرۆریستیی بووەتەوە كە ئیمكانیاتی دەوڵەتێكی هەیە و چەكی دوو دەوڵەتیشی كەوتۆتە دەست. سەرۆك بارزانی هێمایشی بەوەدا كە پاراستنی پێكهاتە نەتەوەیی و ئایینییەكان ئەركێكی مرۆڤی و نیشتیمانیی ئێمەیە و شانازیشیە كە ئێمە لە جیاتی هەموو جیهانی ئازاد شەڕی تیرۆریستان دەكەین“.
لە درێژەی قسەكانیدا بارزانی بارودۆخی مەیدانیی بەرەكانی شەڕی خستەڕوو و ڕایگەیاند”كە هێزی پێشمەرگە توانی هێرشی تیرۆریستان ڕابگرێت و خۆی بكەوێتە هەڵوێستی هێرشبردن و زەبری كوشندەی لە تیرۆریستانی داعش وەشاند“.
ناوبراو ئەوەیشی بۆ شاندی میوان شی كردەوە”كە تیرۆر هەڕەشەیە بۆ هەموو گەل و نەتەوەیەك بۆیە ڕووبەڕووبوونەوەی تیرۆریستان و لەناوبردنیان هەوڵێكی هەمەلایەنەی پێویستە. سەرۆك بارزانی داهاتووی تیرۆریستانی داعشی بە دۆڕاو و وەك دیاردەیەكی كاتی وەسف كرد و جەختی لەوە كردەوە كە دواجار هاووڵاتیان و دانیشتوانی ناوچەكە لەدژی تیرۆریستان ڕادەپەڕن چونكە تیرۆریستان ئازادیی خەڵكیان زەوت كردووە و خەڵك قەبووڵ ناكات هێزێك ئازادییان لێ بستێنێت“.
