فراکسیۆنەکەی مالیکی : چونی پێشمەرگە بۆ کۆبانێ پێشهاتێکی ترسناکە، دەبێ پێشمەرگە رەزامەندی لەحکومەتی عێراق وەربگرێت
نوچەنێت
سەرۆکی فراکسیۆنی دەوڵەتی یاسا رایگەیاند، چونی پێشمەرگە بۆ کۆبانێ پێشهاتێکی ترسناکە، و پێچەوانەی دەستوری عێراقە، دەشڵێت، پێشمەرگە هێزێکی عیراقییە دەبێ بۆ چونە دەرەوەی سنور رەزامەندی لەحکومەتی عێراق وەربگرێت.
بەبڕیاری مەسعود بارزانی سەرۆکی کوردستان و بەڕەزامەندی پەڕلەمان، هێزێکی پێشمەرگەی کوردستان بەچەکی قورسەوە سنورەکانی باشوریان بەرەو کۆبانێ بەجێهێشت، تا لەوێ هاوکاری شەڕڤانانی کورد بکەن دژ بەداعش.
لەکاردانەوەیەکدا بەرانبەر ناردنی هێزی پێشمەرگە بۆ کۆبانێ، عەلی ئەدیب سەرۆکی فراکسیۆنی دەوڵەتی یاسا، لەپەڕلەمانی عێراق، رەخنە لەو هەنگاوەی پێشمەرگە دەگرێت و دەڵێت”پێشمەرگە لە بنەڕەتدا هێزێكی عێراقییە و بۆ هەر جموجۆڵێكی لە دەرەوەی سنووری عێراق پێویستە رەزامەندی پەرلەمان و حكومەتی عێراق وەربگرێ، ئەمەش شتێكی سروشتییە، چونكە عێراق دەوڵەتێكی خاوەن سەروەری خۆیەتی”.
ئەدیب، کە قسەی بۆ تۆڕی میدیایی رووداو کردووە رایدەگەیەنێت “چوونی پێشمەرگە بۆ كۆبانێ پێشهاتێكی گرنگ و ترسناكە، چونكە پرسیاری گەورە ئەوەیە ئەو هێزە چ دەكات بۆ كۆبانێ، لەودەمەی ژمارەی ئەو هێزە زۆر كەمە، بۆیە دەڵێم چوونی پێشمەرگە بۆ كۆبانێ پەیامێكی سیاسییە و پێویست بوو عێراق بڕیاری لێبدات”.
سەرۆكی فراكسیۆنی دەوڵەتی یاسا و نزیك لە نووری مالیكی ئاماژەی بەوەشدا كە “عێراق وڵاتێكی خاوەن سەروەرییە و مەنتقی نەتەوایەتی مامەڵە لەگەڵ پێشهاتە سیاسییەكان ناكات، ناردنی پێشمەرگەی كوردستانیش بۆ وڵاتێكی دیكە پێچەوانەی دەستوور و یاساكانی عێراقە”.
عەلی ئەدیب كە لە كابینەی پێشووی حكومەتی عێراق وەزیر بوو دەشڵێ “چوونی پێشمەرگە بۆ سووریا دەرگای كێشەی زۆرترمان لێدەكاتەوە هانی ناوچەكان و پارێزگاكانی دیكەی عێراق دەدات بەبێ پرسكردن بە حكومەتی فیدراڵی مامەڵە لەگەڵ پرسەكانی خۆیان بكەن”.
سەرۆكی فراكسیۆنی دەوڵەتی یاسا كە خاوەنی نزیكەی ١٠٠ كورسی پەرلەمانە ئەوەشی خستەڕوو كە “بەشداریكردنی پێشمەرگە لە جەنگی سووریا رەنگە ببێتە هۆی دزەكردنی ئاڵۆزییەكانی سووریا بۆ نێو عێراق زۆرتر لەوەی ئێستا دزەی كردووە، دەرئەنجامەكانی بڕیارەكانی هەرێمی كوردستانیش كاریگەریان لەسەر هەموو عێراق دەبێ بەوپێیەی هەرێمی كوردستان بەشێكە لە عێراق”.
