هەڵوێستی ئیسلامی سیاسی
هەڤاڵ سەید حەسەن
پرسی ئیسلامی سیاسی، بە یەکێ لە پرسە گرنگەکانی ژیانی سیاسی و کۆمەلایەتی و فەرهەنگی دەژمێردرێ، بەگوێرەی زەرفو زەمانی ئەوڕۆ، کە ڕۆژهەڵاتی ناوەڕاست بۆتە چەقی ڕووبەڕووبوونەوەو یەکلایی کردنەوەی کۆمەڵێ لە کێشە گەورەکانی جیهان.
بۆ ئێمەی کورد هەر ئەمریکاو ولاتانی هاوپەیمان و ڕوسیا زلهێز نییە، بەڵکو ولاتانیدەوروبەریش، بەحوکمی مێژووی دەولەتداری دوروو درێژیان، لە ناو بەرژەوەندە مەزن و ستراتیجییەکانی جیهان سازاون و شوێن پێیەکی بەهێزیان بەرکەوتووە. لە دیرۆکی نوێدا، بەشێ لە ولاتانی دونیا سودیان لە ئایدیۆلۆجیای مارکسیزم وەرگرت، لەژێر ناوی دەستەڵاتی پڕۆلیتاریاو نەزمی سۆسیالیستی، دەستەڵاتی نەتەوەیی خۆیان چەسپاند، بە هەمان ڕووگەوە، زۆرێ لە ڕەگەز و پێکهاتە جیاوازەکانی ڕۆژهەڵاتی ناوەڕاست، بۆ جێگیرکردنی دەستەڵاتی نەتەوەیی خۆیان، کەڵکی زۆریان لە باوەڕی دینی و مەزهەبی وەرگرت ، هەروەک چۆن عەرەبەکان لەگەل دەستپێکی پەیام (٦١٠ )ی زاینی توانیان دەستەڵاتی خۆیان فراوانکەن، بە هەمان ئامراز تورکە کانیش لەژێر پەرچەمی ئاینی ئیسلام بۆ ماوەی ٦٠٠ ساڵ خیلافەتیان گرتەدەست، لەچاخی ناوەڕاستەوە تا مێژووی سەردەم، کە بە سەردەمی خیلافەتی عوسمانی( ١٢٩٩ز تا ١٩٢٣ز ) ناسراوە، بەهەمان ڕیتم ئێران (١٣٠٠ ز ) لەڕێگەی مریدەکانی سەفیەدینی ئەردەبیلی( ١٢٥٢ ـ ١٣٣٤ ) فارسەکان دەستەلاتی خۆیان پەرەپێداو دەولەتی سەفەوییان دروستکرد.
کوردیش وەک یەکێ لە پێکهاتە ئیتنیەکانی ڕۆژهەلاتی ناوەڕاست، لەگەڵ بوونی هەموو ئەو کۆڵەکە سروشتیانەی کە پاڵپشتی (خەڵک، خاک، زمان، کلتور، ئاین) خۆڕسکی مانەوەو بونیادی بەهێزی لەئارادابوو، ئەگەر کوشتوبڕ و تێکدان و کاولکاری نەتەوە هەمەجی و ڕەگەزپەرستە سەردەستەکانی ناوچەکە دەرفەتی دابا، ئێستا لەڕووی خۆژیێنی و ئابورییەوە دەبوو بە یەکێ لە ژیارە بەهێز و هەرە ئاوەدانەکانی ناوچەکە.
هەر لەبەر ئەوەشە، دەستەلاتە ڕەگەزپەرستەکانی ناوچەکە، هەمان ئەو ئامرازەی کە ئیمپڕاتۆڕییەتی خۆیان پێدروست کرد، بەکاردەبەن بۆ تۆقاندن و خنکاندنی نەفەسی ئازادی و کوشتنی هەستی سەربەخۆیی خوازانەی کورد. ئەمڕۆ ڕەوتێکی سیاسی مەزهەبی( داعش ) پەڕگیر، کە هاری و وەحشەت و دڕندەیی ئاگروو شەیتانی لەخۆی بارکردووە، بەناوی خوا کۆمەڵکوژی دەکات، بەناوی جیهاد، مانۆڕی دەستدرێژی و سێکسی جەماعی سازدەکات، پیاو مێردمنداڵە دیلەکان سەردەبڕن و ژن و کچی قوربانییەکان، دوای دەستدرێژی و تەجاوزپێکردنیان،، بۆئەوەی سوکایەتی بەحورمەتی ئینسانییان بگەیەننە ترۆپک، لەبازاڕی نەخاسە وەک کۆیلە بەپارەیەکی کەم دەفرۆشرێنەوە. سروتە ئاینیەکانیان کردۆتە گۆرانی، بەسەر ژمارەی زۆری حۆرییەکانی بەهەشت و چێژی ئەوێ هەڵدەڵێن، بلۆک بە زەکەریان وەدەکەن، تا لەشەڕدا کۆئەندامی نێرینەیان بەساغی بمێنێتەوە و بتوانن بەزووی پیایاندا هەڵگژێن و خۆیان بگەیەننە مرازی ڕەعشەو ئەوپەڕی چێژ. ئەوەی لێیان دەبیندرێ، ئاخیرەت و جەنەت، ئاڵۆشی و ئیباحییەتی ئەم عفریتانە پڕناکاتەوە، بۆیە لەسەر عەرد، لەناو ماڵی قوربانییەکان، سێکس دەکەن، تاڵان دەکەن، دەکوژن، مرۆڤ ناچاردەکەن واز لە باوەڕەکانی خۆی بێنێ.
ئەوەی جێی تێبینییە سەبارەت بە( یەکگرتوی ئیسلامی ، کۆمەڵ ) و باقی ڕەوتە ئیسلامیستەکانی دەرەوەی دەستەڵات، تاکو ڕۆژی ئەمڕۆ لەسەر ئاستی کەسی و بۆچوونی فەرمی و گشتییان، زاتی ئەوەیان نەکردووە بەقەدەر د عەدنان ئیبراهیم لەسەر کارە چەپەلەکانی داعش بێنە دەنگ، کاک (عەلی باپیر) لە کۆڕێکی ڕووبەڕوودا، لە سوید لە شاری یۆتۆبۆری، ئامادە نەبوو داعش بە هێزێکی ئیرهابی ناوزەدکات، بە هێنانەوەی جۆرێ لە تەفسیرو شەرحی دووروو درێژ، خۆی لە وەلامدانەوەی ئەو پرسیارە دەشاردەوە! لە ڕاگەیاندنی هاوبەشی یەکگرتوو کۆمەڵ لە پەڕاوێزی کۆتایی کۆبونەوەکەیان، ئاماژەیەکی کرچوکاڵیان بە جموجۆلی ناشیاوی داعشی کردبوو، شرۆڤەی کۆتاییان لەسەربنەمای پاراستنی ناوی ئیسلام بوو، نەک بەرگری کردن کەرامەتی ئینسان و مافی ژیان و ئازادی، بەم دەستەواژەیە خستبوویانە ڕوو : کەوا ئەم گروپە ڕەفتار و هەڵسوکەوتی ناشەرعیانەیان زۆرە و ئیدانەی دەکەن!
بەشداری سلبی ئەم دوو ڕەوتە ئیسلامییە، کاریگەری گەورەی لەسەر ئێستاو داهاتوویان دادەنێ! لەبەرئەوەی خەڵکی سڤیلی کوردستان، وەک نەفرەتی و بەڵایەکی شەیتانی گەورە، لەم کوشتوبڕو ئاشووبەی داعش دەڕوانێ، چاوەڕوانییان لە هێزە سیاسییەکانی کوردستان ئەوەییە، کە بەگرنگیی و بایەخەوە لە ژیانی جڤاکی خۆیان بڕوانن و بە بەرپرسیارییەتییەوە ڕۆڵی خۆیان وازی بکەن، کاتێ وجودی خۆیان لە حاشیەی نوسراوێکدا دەخوێننەوە لێیان دووردەکەونەوە، هەست بە دوفاقی و دووڕووی و نیفاقی سیاسی و دینی دەکەن. وادەزانن، هێزە سیاسییە ئیسلامییەکانی ناو دامودەزگاکانی هەرێم، وەک کلکە بیور ڕەفتاردەکەن و خەون بە ڕژێمێکی داعشییەوە دەبینن.بۆ ئەوەی ئەم تێڕوانینە کاڵکەنەوە، گرنگە بەشدار بوونیان بە حونجەو گرێوگۆڵ و هەستی تراوماتیکی نەبێ، بەڵکوو بە هەموو کامی دڵی خۆیان، بە تەواوی بونی خواکردی خۆیان بەرگری کاربن لە خەلک و خاک و پەرچەمی کوردستان.
خەڵکی کوردستان وەک هەر خەڵکێکی تری ئەم گێتییە، حزب و ڕێکخراوە سیاسی و مەدەنییەکانی بۆ ڕۆژێکی ئاوا پێویستە، کە هاوبەندی و گرێدانیان بەیەکترەوە بەتینترکات، خەڵکی بەرەو ڕاستگۆیی و ویژدان و لێبوردەیی و هیمەت و خۆشەویستی ولات و ژیان ئاڕاستەکات.
