شیعەكان داوای جیابوونەوە لە عێراق دەكەن
نووچەنێت-ئیلاف
برَیارە مانگی تشرینی یەكەم (دە)ی ئەمساڵ هەڵمەتێكی بەرفراوانی ئیمزا كۆكردنەوە لە پارێزگا شیعەنشینەكانی باشوور و ناوەڕاستی عێراق دەست پێبكات، بەمەبەستی جیابوونەوەی شیعەكان لە عێراق و دامەزراندنی “كۆماری سۆمەری مەزن”.
ئەندامانی كەمپەینەكە بە نیازن 2 ملیۆن ئیمزا كۆ بكەنەوە و بیدەنە یو ئێن تا سەربەخۆیی شیعەكانی عێراق بخاتە كارنامەی خۆیەوە.
رێكخەرانی كەمپەینە روو لە شیعەكان دەكەن و دەڵێن “بەشێك لە نەوت و خێرو بێری زەوییەكانتان دەچێت بۆ بكوژەكانتان، بۆ ئەو زمانفسانەی سوكایەتیتان پێدەكەن، جنێوتان پێدەدەن و بە بێئەقڵ ناوتان دەبەن، ئەویش لەو كەناڵە ئاسمانییانەی بە پارەی ئیوە كردوویانەتەوە، تەنها لەبەرئەوەی لە ووڵاتی سەربڕیندا هاوبەشتانن”.
سەجاد جەواد جەبەل یەكێك لە بەشدارانی كەمپەینەكە ووتوویەتی “عێراقی ئەمڕۆ هەستاوە بە داگیركرجنی دەوڵەتی سۆمەر. لە مێژوودا شتێك نەبووە ناوی دەوڵەتی عێراق بێت، بەڵكو دەوڵەتی سۆمەر هەبووە لە ناوەڕاست و باشووری عێراقی ئێستادا”.
جەبەل تەحەددای هەمووانی كردووە بیسەلمێنن لە مێژوودا دەوڵەتێك هەبووە بەناوی عێراق.
ئەو ووتوویەتی لە كۆندا خەڵكی سعودیەی ئەمڕۆ بەم ناوچەیەیان ووتووە عێراقی عەرەبی و عێراقی عەجەمی، واتە وەك ناوچەیەكی جوگرافی عێراق هەبووە، نەك وەكو دەوڵەت و یەكەیەكی سیاسی.
جەبەل ووتووشیەتی عێراقی ئێستا دەوڵەتێكی دەستكردە لەشێوەی یەكێتی سۆڤیەت و یوگوسلاڤیای جاران و چارەنووسی هەڵوەشانەوەیە.
جەختیشی كردۆتەوە كە شیعەكان خوازیارن لە تیرۆری سێگۆشەی سوننی رزگاریان ببێت و دەوڵەتێكی خۆیان هەبێت لە فاوەوە بۆ سەرووی بەغدا.
