(نوچەنێت)
شەوی رابردوو، لە سحێلا نوێنەرانی هێزەکانی پێشمەرگە و یەپەگە کۆبوونەوەیەکیان ئەنجامداوە و شەش گەریلای پەکەکە، کە دوێنێ کەوتبوونە دەستی پێشمەرگە ئازادکراون.
سەرچاوەیەک لە هێزەکانی پێشمەرگە بە (نوچەنێت)ی رایگهیاند، شەوی رابردوو، لە سحێلا نوێنەرانی هێزەکانی پێشمەرگە و یەپەگە کۆبوونەوەیەکیان ئەنجامداوە و شەش گەریلای پەکەکە، کە دوێنێ کەوتبوونە دەستی پێشمەرگە ئازادکراون، شەش گەریلاكە دوای ئازادکردنیان چوونەتەوە رۆژئاوای کوردستان.
ئەوەش لەکاتێکدایە، رۆژی یەکشەممەی رابردوو، شەڕ لە نێوان هێزەکانی پێشمەرگە و پەکەکە لە ئامێدی روویدا، بەوهۆیەوە پێشمەرگەیەک بووە قوربانی و سێ گەریلای پەکەکەش برینداربوون.
دوێنێش، بریکاری وەزارەتی پێشمەرگە رایگەیاند، هێزەکانی یەپەگە گروپێکی چەکدارییان ناردووە بۆ هەرێمی کوردستان تا گورز لە هێزەکانی پێشمەرگە بوەشێنێت، بەڵام رووبەڕووی ئەو هێزە بوونەتەوە و بە ناچاری گەڕاونەتەوە دواوە.
دواتر لە راگەیەنراوێکدا کەجەکە رایگەیاندبوو، ئەوان دەستیان لە نانەوەی توندوتیژی لە باشوری کوردستاندا نییە و لایەنگریشی نین.
لای خۆشییەوە، مەسرور بارزانی رایگەیاندبوو، گروپێک لە چەکدارانی یەپەگە هەوڵیانداوە بە شێوەیەکی نایاسایی لە سوریاوە بێنە ناو خاکی هەرێمی کوردستان و ئەوەش، “پێچەوانەی رێنمایی و یاساکانی ئێمە و یاساکانی پاراستنی سنوورە، بۆیە لە لایەن هێزە ئەمنییەکانمان رێگرییان لێکراوە”.
