(نوچەنێت)
یەكگرتووی ئیسلامیی رایگەیاند فراكسیۆنەكەیان لە پەرلەمان لەگەڵ شاندی هەرێم ناچێتە بەغدا و بۆ ئەم مەبەستەش وتەبێژی ئەو حزبە ئەو هەڵوێستەی حزبەكەی دووپات كردەوە.
بەپێی هەواڵێك كە میدیای یەکگرتوو بڵاویكردۆتەوە ، ئەمڕۆ پێنجشەممە موستەفای سەید قادر جێگری سەرۆکی هەرێمی کوردستان، سەردانی سەڵاحەدین بەهادین ئەمینداری گشتی یەکگرتوی کردووە و بانگهێشتی یەکگرتووی کردووە بۆ بەشداری کردن لە شاندی سیاسی هەرێم بۆ بەغدا، بەڵام ئەمینداری یەکگرتوو، بەشداریکردنی حزبەکەی بە گونجاو نەزانیوە و داواکەی رەتکردوەتەوە.
لە کۆبوونەوەی سێ قۆڵی پارتی و یەکێتی و گۆڕان كە لە رۆژی 8ی کانوونی یەکەمی 2020 سازكرا، بڕیاردرا لەسەر ناردنی دوو شاندی حکومی و سیاسی بۆ بەغدا، بەمەبەستی چارەسەرکردنی کێشەکان لەگەڵ بەغدا، پێشتر كۆمەڵی ئیسلامیی بەشداری خۆی لەو شاندە رەتكردەوەو ئێستاش یەكگرتووی ئیسلامی دەبێتە دووەم حزب كە خاوەن فراكسیۆنی پەرلەمانە و ئەو داوایەی سەرۆكایەتی هەرێمی كوردستان رەتدەكاتەوە.
