كۆبوونەوەی ئەمڕۆی حكومەت لەسەر مووچەی فەرمانبەرانە

(نوچەنێت)
وەزیری کار و کاروباری کۆمەڵایەتیی حکومەتی هەرێمی کوردستان رایگەیاند، ئەنجوومەنی وەزیرانی هەرێمی کوردستان کۆدەبێتەوە و گفتوگۆ لەسەر مووچەی فەرمانبەران دەکرێت.
کوێستان محەممەد، وەزیری کار و کاروباری کۆمەڵایەتی لەمیانی کۆنفرانسێکی رۆژنامەوانیدا رایگەیاند “سبەی کاژێر 10:00ی بەیانی ئەنجوومەنی وەزیران کۆدەبێتەوە، بابەتێکی کۆبوونەوەکە تایبەتە بە مووچە و رەشنووسی یاسای بودجەی ساڵی 2021ی عێراق”.
لە هەرێمی کوردستان 88 هەزار و 494 کەس مووچەی کەمئەندامی (خاوەن پێداویستیی تایبەت) وەردەگرن، لەو ژمارەیە 76 هەزار و 464 کەسیش هیچ مووچەیەکیان نییە و بڕی 150 هەزار دینار وەردەگرن، 12 هەزار و 30 کەسیان فەرمانبەرن و مانگانە بڕی 100 هەزار دینار وەردەگرن، حکومەت بەنیازە ئەو پارەیەی وەکو مووچە وەریدەگرن بیبڕێت و بەشێوەی دەرماڵەیەک پێیان بدرێت.
وەزیری کار و کاروباری کۆمەڵایەتی باسی لەوەشکرد “یەکێکی دیکە لە خاڵەکانی کارنامەی کۆبوونەوەکەی حکومەت تایبەتە بە بڕیاری دەرماڵەی لەبری پەککەوتەیی بۆ ئەو کەمئەندامانەی مووچەیەکی دیکەیان هەیە، کە یەکێکە لە خاڵەکانی یاسای چاکسازی”.