(نوچەنێت)
لیژنەی جێبەجێکردنی دیوانی لە نوسینگەی سەرۆکوەزیرانی عێراق فەرمانی دەستگیرکردنی بۆ شەش بەرپرسی باڵای عێراق دەردەکات و بڕیاری دا بە دەستبەسەرداگرتنی سەرجەم موڵک و ماڵی سەرۆکی پێشووی دەستەی خانەنشینی و براکەی و ژنەکانی و منداڵەکانیدا.
لە نوسراوێکدا، کە رۆژی ٢٥ی تشرینی دووەمی ٢٠٢٠ لە لیژنەی جێبەجێکردنی دیوانی دەرچووە، داواکراوە دەستبەسەر موڵک و ماڵی ئەحمەد ساعیدی و سەباحی برای دا بگیرێت و داوای ناوی ژنەکانی و منداڵەکانیشی کراوە بۆ دەستبەسەرداگرتنی موڵک و ماڵیان.
رۆژی ١٧ی ئەیلولی ڕابردوو، هێزێکی سەربازی ئەحمەد ساعیدی سەرۆکی پێشووی دەستەی خانەنشینی یان لە ماڵەکەی خۆیدا دەستگیرکرد و دواتر برایە بارەگای هێزەکانی سوات تاوەکو بدرێتە دادگا بۆ لێکۆڵینەوە.
هاوکات، “شەش بەرپرسی تر لەو هەڵمەتەدا دەستگیرکراون بەڵام ناوەکانیان ئاشکرا نەکراوە.”
لیژنەی لیکۆڵینەوە لە دۆسیەکانی گەندەڵیی گەورە و تاوانی جیاواز کە مستەفا کازمی ڕۆژی ٢٧ی ئابی ٢٠٢٠ دروستیکرد، حەوت دۆسیەی گەورەی گەندەڵی جوڵاندووە و چاوەڕێی دەرچوونی بڕیار دەکرێت لەبارەیانەوە.
