نوچەنێت
لە راگەیانراوێكدا وەزارەتی ناوخۆی حكوومەتی هەرێمی کوردستان شێوازی پێبژاردنی هەندێ سزای بۆ خەڵك بڵاوكردەوە بەمەبەستی خۆپاراستن لە تووشبوون بە فایرۆسی كۆڕۆنا،
بەپێی ئەو راگەیانراوەكە (شایی و چوونە سەرقەبران و دانانی پرسە و نەبەستنی ماسک لە شوێنە گشتییەکان..) جۆری ئەو سزایانەن كە وەزارەتی ناوبراو دیاریكردوون و دەشڵێ ” ئەوانەی ئەم سزایانە دەیانگرێتەوە بە پسوولە لێیان وەردەگیرێت و لە 50٪ی داهاتی پێبژاردنەکەش بۆ ئەو کەسەیە کە کاری پێبژاردنەکە دەکات”.
راگەیێندراوەکەی وەزارەتی ناوخۆی هەرێمی کوردستان دوای بڵاوبوونەوەی رێکارە نوێکان دێت بۆ رووبەڕووبوونەوەی ڤایرۆسی کۆرۆنا کە رۆژی 24-10-2020 بڵاوکرایەوە و لە 18 خاڵ پێکهاتبوو. لە راگەیێندراوێکیشدا کە واژۆی رێبەر ئەحمەد، وەزیری ناوخۆی حكوومەتی هەرێمی کوردستانی لەسەرە و ئاراستەی پارێزگار و ئیدارە سەربەخۆکان کراوە، شێوازی پێبژاردنەکان روونکراوەتەوە و تێیدا هاتووە:
یەکەم: ئەو لایەنانەی کە لە بڕگەی شانزەیەم / یەکەمی بەیانی 52 ئاماژەی پێدراوە بە پسوولەی 38/ا پارەکە وەردەگیرێت.
دووەم: وێنەی یەکەم لە پسوولە دەدرێت بە کەسی سەرپێچیکار.
سێیەم: ئەم بڕە پارانە کە وەردەگیرێت لە ژمێریاری پارێزگا و ئیدارە سەربەخۆکان وەک ئەمانەت هەڵدەگیرێت.
چوارەم: مانگانە لیستێک بەناوی ئەو کەسانەی کە کاری پێبژاردنەکان دەکەن رەوانەی وەزارەت دەکرێت بە مەبەستی خەرجکردنی هاندان بۆیان بە رێژەی 50٪ لە داهاتی پێبژاردن.
پێنجەم: 50٪ی داهاتی پێبژاردنەکان خەرجدەکرێت بۆ کڕینی پێداویستی خۆپارستن بەپێی ئەو لیستەی کە لەلایەن پارێزگا و ئیدارە سەربەخۆکان دەنێردرێت بۆ وەزارەت.
رۆژی 24-10-2020 وەزارەتی ناوخۆی هەرێمی کوردستان راگەیێندراوێکی بڵاوکردەوە و تێیدا ئاماژەی بە چەند سزایەک کرد لە پێناو پابەندبوونی هاونیشتمانییان و ئاماژەی بەوە دابوو، “پێویستە لەسەرجەم فەرمانگەکان رەچاوی رێکاری نوێ بکرێت و ماسک بەکاربهێندرێت، هەر فەرمانبەر یان کارمەندێکی هێزەکانی ئاسایشی ناوخۆ و یان پێشمەرگە یان ئاسایش پابەندنەبێت سزای دارایی دەدرێت. “
سەبارەت بە شاییکردن و چوونە سەرقەبران و دانانی پرسە، وەزارەتی ناوخۆی ئاماژەی بەوە دا، کە قەدەخەکردنی داوەت و شایی و چوونە سەرقەبران و دانانی پرسە بەردەوام دەبێت و بنکەی پۆلیس و موختاری گەڕەک بەرپرسیارن و هەر کەسێک پابەندنەبێت بڕی 2 ملیۆن دینار پێبژاردنی پێ دەکرێت.
سەبارەت بە بەستنی ماسک لە راگەیێندراوەکەدا هاتووە، هەر کەسێک ماسک نەبەستێت بەپێی رێکارەکانی ئەم بەیانە بە بڕی 20 هەزار دینار سزادەدرێت.
