شلێرسەعید،تایبەت بە (نوچەنێت)
ئەمڕۆ سەرلەنوێ خۆپیشاندانەكانی بەغدا لە گۆڕەپانی تەحریر دەستپێكردەوە و بە گوتەی خۆپیشاندەرانیش ئەمڕۆ لە یادی تێپەڕبونی یەكساڵ بەسەر خۆپیشاندانەكان تێدەپەڕێت و بۆیەش ناوی “شۆرٍشی تشرین “ی لێنراوە.
بەپێی ئەو دیمەنانەی كە ئێستا لە گۆڕەپانی تەحریری بەغدا دەبینرێن، خۆپیشاندەران بە دروشمی جۆراوجۆر و بەرزكردنەوەی وێنەی شەهیدەكانیان لە گۆڕەپانەكەدان.
سەیف عەلی چالاكوان لە گۆڕەپانی تەحریر بە (نوچەنێت)ی ڕاگەیاند: مستەفا كازمی هیچی بۆ خۆپیشاندەران نەكردووە و ئەو وتارەشی كە لە یادی تێپەربوونی ساڵێك خۆپیشاندانەكان پێشكەش كرد، تەنها لە ئینشا دەچوو ، و ترسناكترین دۆسیەی شاردەوە كە پەیوەندی بە داهاتوی وڵاتەوە هەیە ئەویش چاكسازیە”.
ناوبراو گووتیشی “مستەفا كازمی دەڵێت چاكسازی ئابوری دەكەم لەهەمان كاتدا دەیەوێت 41 ترلیۆن دینار قەرزبكات ، بۆیە نازانم باس لە چ چاكسازیەك دەكات و دەیەوێ بە عەقڵی كێ پێبكەنێت؟”.
لایخۆشییەوە فازل فەتلاوی پەرلەمانتاری هاوپەیمانی فەتح لە ئەنجومەنی نوێنەرانی عێراق بە(نوچەنێت)ی راگەیاند “خۆپیشاندان و مانگرتن مافی هەر هاوڵاتیەكە كە داوای مافی خۆی بكات ئەوانیش داوای نەهێشتنی گەندەڵی دەكەن ئەوەش مافی خۆیانە و ئێمەش بەهەمو توانامان لەگەڵیانین و هاوڕاین لەگەڵیان”.
فەتلاوی گوتیشی “داواكاری هاوڵاتیان ڕەوایە و پێویستە حكومەت داواكاریەكانیان جێبەجێبكات”. دەشڵێت “پێویستە لەسەر حكومەت و پەرلەمانی عێراق هەوڵی تەواو بدەن بۆ جێبەجێكردنی داواكاری خۆپیشاندەران، هەرچەندە بەشێكی پەیوەستە بە باری ئابوری حكومەتیش باری ئابوری لەوپەڕی خراپیدایە”.
دەربارەی ئەوەی كە بۆچی تا ئێستا ئەوانەی خۆپیشاندەرانیان كوشت و رفاندویانن نەدراونەتە دادگا كە ئەوە داواكاری سەرەكی خۆپیشاندارانە؟ فەتلاوی لە وەڵامدا دەڵێت “هاوڵاتیان سكاڵایان پێشكەشكردووەو داوای قەزائی هەیە بۆ جێبەجێكردنی دادپەروەری، چونكە كوشتن و رفاندنی هاوڵاتی هیچ ڕەوانیە و دەبێت حكومەت هەوڵی جدی بدات چونكە ئەوە بابەتێكی هەستیارەو نابێت لەمبارەوە هیچ فشارێكی سیاسی هەبێت بۆ سەر حكومەت، چونكە لایەن هەن فشاردەخەنە سەر حكومەت بۆ داپۆشینی ئەو دۆسیانە”.
