نێچیرڤان بارزانی: پشتیوانی لە هەنگاوە بوێرەكانی ئەردۆغان دەكەین
نوچەنێت
نێچیرڤان بارزانی سەرۆکی حکومەتی کوردستان، لەلێدوانێکدا بۆ ماڵپەڕی فەرمی سەرۆکایەتی حکومەت، بەبۆنەی دەرکردنی یاسایەکی نوێ لەتورکیا، کە پێشنیاری پارتی دادو گەشە پێدان بووە، رایدەگەیەنێت دەركردنی ئەو یاساییە”هەنگاوێكی دیكەی زۆر گرنگە لەپێناو هێنانەكایەی ئاشتی و چارەسەركردنی كێشەی كورد لە توركیا” هیواش دەخوازێت “گەلی توركیا بەهۆی ئەو یاسایە بگاتە تەباییەكی تەواوی كۆمەڵایەتی و، ئاشتی دەرفەتی پێشكەوتنی زۆر زیاتر بۆ گەلی توركیا بڕەخسێنێت”.
دەقی لێدوانەكەی نێچیرڤان بارزانی سەرۆكی حکومەتی كوردستان
هەوڵەكانی ئێستا و ئەو جموجۆڵەی هەیە بۆ هێنانەكایەی ئاشتی و چارەسەركردنی ئاشتیانەی كێشەی كورد لە توركیا مایەی دڵخۆشیی ئێمەیە و، هیوادارین ببێتە مایەی پێشڤەچوونی زیاتر بۆ هەموو گەلی توركیا.
هەروەها لەو چوارچێوەیەدا، دەركردنی یاسای ژمارە 6551 لە لایەن پەرلەمانی توركیاوە، بە پێشنیاز و پشتیوانیی پارتی داد و گەشەپێدان بە سەرۆكایەتیی بەڕێز ڕەجەب تەییب ئەردۆغان، هەنگاوێكی دیكەی زۆر گرنگە لەپێناو هێنانەكایەی ئاشتی و چارەسەركردنی كێشەی كورد لە توركیا، چونكە گفتوگۆكان و هەنگاوەكانی چارەسەری ئاشتیانەی خستە چوارچێوەیەكی سیاسیی یاساییەوە.
ئێمە وەك چۆن پێشتر پشتیوانیمان لە هەنگاوە بوێرەكانی بەڕێز ڕەجەب تەییب ئەردۆغان و حكوومەتی توركیا كردووه لەپێناو چارەسەری ئاشتیانە، پشتیوانی لەو هەنگاوە گرنگەش دەكەین و هیوادارین گەلی توركیا بەهۆی ئەو یاسایە بگاتە تەباییەكی تەواوی كۆمەڵایەتی و، ئاشتی دەرفەتی پێشكەوتنی زۆر زیاتر بۆ گەلی توركیا بڕەخسێنێت.
