داش بە نیازە پەلاماری كەركووك بدات
نوچە: سلێمانی
بە گوێرەی هەواڵێكی هەفتەنامەی چاودێر، كە مەلا بەختیار بەرپرسی دەستەی كارگێڕی مەكتەبی سیاسی یەكێتی سەرنووسەرییەتی، داعش خۆی رێكخستۆتەوە و بە نیازە پەلاماری شاری كەركووك بدات، بۆ ئەو مەبەستەیش بەرنامەیەكی چڕیان داناوە و دوو جاریش ئەبو بەكر بەغدادی سەردانی حەویجەی كردووە.
هەفتەنامەی چاودێر بڵاوی كردۆتەوە، كە رێكخراوی دەوڵەتی ئیسلامی ( داعش) سەرقاڵی خۆ رێكخستنە بۆ پەلاماردانی شاری كەركوك و بۆ ئەو مەبەستە دەستیكردووە بەداڕشتنی هەیكەلی رێكخراوەیی خۆی و بەنیازە “دەوڵەتی كەركوك”یش هاوشێوەی دەوڵەتی نەینەوا دابمەزرێنێت.
هەر لە زانیارییەكانی چاودێردا هاتووە، كە داعش كەسێكیان بە ناوی ( نیعمە عەبدولمەناف) ناسراو بە ( ئەبو فاتیمە) بە والی كەركوك دەستنیشانكردووە، هەروەك هەوڵەكانیان بۆ تێكدانی ئاسایشی كەركوك چڕكردۆتەوەو هێزێكی زۆر و چەكی قورسیان لەدەوروبەری شاری كەركوك كۆكردۆتەوە، لەهەوڵی بردنە ناوەوەی ئۆتۆمبێلی بۆمبڕێژكراودان بۆ ناو شاری كەركوك.
چاودێر ئەوەیشی بڵاو كردۆتەوە داعش جگە لەوالی كەركوك، (قاسم خەلیل حەمدانی) ناسراو بە ( ئەبو خەلیل) وەك بەرپرسی دەستەی شەرعی ویلایەتی كەركوك دەستنیشانكردووە، كەرتەكانی دیكەی ناوشاری كەركوكیش بەرپرسیان بۆ دانراوە، بەمجۆرە:
محەمەد سەلیم حەردان بەرپرسی كەرتی حەویجە.
حارس شوجاع عەزۆ ناسراو بە ( عەبدولعەزیر) بەرپرسی كەرتی ریاز.
باسم محەمەد ئەحمەد ناسراو بە ( ئەبو حوزەیفە) بەرپرسی كەرتی داقووق.
مشتاق تاڵب ئەلجبوری ناسراو بە ( ئەبو ئەنەس) بەرپرسی كەرتی رەشاد.
ماهر عەبدوڵا جدوع ئەلعزی بەرپرسی كەرتی غیدە.
عادل ئەمین ناسراو بە ( ئەبو ئیستیبراق) بەرپرسی كەرتی دوز.
ئەبو عەبدوڵا بەرپرسی كەرتی عەباسی.
سەلمان عەبد شەبیب ناسراو بە ( ئەبو سوفیان) بەرپرسی كەرتی زاب.
غەیس ئیبراهیم موراد ناسراو بە ( ئەبو ماهیر) بەرپرسی كەرتی حەلوات.
هەر بەپێی زانیارییەكانی چاودێر چەكداركانی داعش لەنزیك ناوچەكانی دەورووبەری حەویجە چەند بازگەیەكیان داناوە وەك بازگەی گوندی (زیبان) كە دوو تانك و چوار ئۆتۆمبێلی بە دۆشكەوە لێ جێگییركردووە، لەگەڵ بازگەی گوندی ( ئەلمەرە) كە چوار تانك و سێ ئۆتۆمبێلی بەدۆشكەوە لێ جێگییركردووە، هەروەك بازگەیەكی گەورەشی لە دووڕیانی ( ریاز – كەركوك) لەگەڵ هێزێكی داعش جێگییركردووە.
لە نزیك ناحیەی مولتەقا و ریاز تا دەگاتە گوندی بەشیر داعش هێزێكی گەورەی كۆكردۆتەوە، هەروەك چەند ئۆتۆمبێلێكی بۆمبَرێژكراوی ئامادەكردووە تا لە كاتژمێری سفردا بیانكەن بەناو شاری كەركوكدا بۆ جێبەجێ كردنی پلانەكەیان.
