شلێر سەعید نوچە
عوسمان سوارە: ئەو شاندەی ئەمڕۆ هاتون لیژنەكن بۆ زەمینە سازی هاتون پێمان وایە بگەنە زەمینە سازی بۆ ڕێكەوتن ، و بە پێی زانیاری ئێمە لەهەفتەی داهاتو بەم نزیكانە لە سەر ئاستی باڵا وەفد دێت لەگەڵ وەزارەتی پێشمەرگە كۆدەبنەوە.
ئەمڕۆ دووشەممە، ٢٠-٧-٢٠٢٠، شاندێکی وەزارەتی بەرگری عیراق بەسەردانێک گەیشتە هەولێر ، گفتگۆکانی وەزارەتی پێشمەرگە و سوپای عێراق، درێژەپێدەری گفتگۆکانی پێشوون، کە لەبارەی ئۆپەراسیۆنی ھاوبەش و گەڕانەوەی پێشمەرگە و خاڵێ پشکنینی ھاوبەش چەند پرسێکی دیکە گفتوگو دەکەن، ئەمساڵ ئەوە سێیەم کۆبوونەوەیە لە نێو ئەو دوو وەزارەتە، و ئەمڕۆ لە هەولێر کۆبوونەوەی چوارەم دەکەن.
لە 16ی ئۆکتۆبەری 2017ەوە هاوئاهەنگی لەنێوان پێشمەرگە و سوپای عێراق کەمبووەتەوە، جموجووڵی چەکدارانی داعش زیاتر لە ناوچە کوردستانییەکانی دەرەوەی ئیدارەی هەرێمی کوردستان و هەندێک ناوچەی سوننەنشینی عێراقدان؛ هێرشەکانیان لە ناوچە كوردستانیەكان زیادی كردوە، لیژنەی پێشمەرگە دەڵیت زیاتر لە 200 كەس لەم ناوچانە شەهید بون و 300 كەس برینداربون.
لە لێدانێكی تایبەتدا، سەبارەت بە گرنگی رێكکەوتنی نێوان وەزارەتی پێشمەرگە و بەرگری عێراق، عوسمان كەریم سوارە، جێگری سەرۆك لیژنەی كاروباری پێشمەرگە لە پەرلەمانی كوردستان، بە نوچەی ڕاگەیاند: پڕۆژەیەك هەیە بۆ رێکكەوتن لە نێوان وەزارەتی پێشمەرگە و وەزارەتی بەرگری عێراق، پڕۆژەكە پڕۆژە و لێك تێگەیشتنێكی باشە.
گوتیشی ئەو پڕۆژە لە بەرژەوەندی ئێمەیە و لەبەرژەوەندی عێراقیشە، چونكە لە ئەنجامی ئەو بارگرژیانەی هەبو ببۆوە بۆشایەكی ئەمنی لەو ناوچانە و تا ئێستاش ئەو بۆشایەنە هەیە و داعش جموجۆڵی هەیە.ئاماژەی بەوەشكرد، ئەو پڕۆژە هاوبەشە خاڵی گرنگی تێدایە و گرنگترینیان دەڵێت، دەبێت وابكەن ئەو ناوچانە هێزەكانی داعشی تێدا نەمێنێ و هێزی پێشمەرگە بە هاوبەشی لەگەڵ سوپای عێراقی ناوچە كێشە لەسەرەكان بپارێزن.
جێگری سەرۆك لیژنەی كاروباری پێشمەرگە لە پەرلەمانی كوردستان گوتیشی، پێمانوایە هەموو رێکكەوتنێك لە بەرژەوەندی هەرێم و عێراقە و لە بەرژەوەندی ئەو ناوچانەشە. دەشڵێت لەماوەی كەمتر لە ساڵێك زیاتر لە 200 كەس شەهید بوون و زیاتر لە 300 كەس برینداربونە و چەندین لەوانە دەست و لاقیان پەڕیوە. بەهۆی کردەوەکانی داعشەوە.
عوسمان سوارە ئاشكراشی كرد، كە ئەو شاندەی ئەمڕۆ هاتون لیژنەیەكن بۆ زەمینە سازی هاتوون. پێمان وایە بگەنە زەمینە سازی بۆ ڕێكکەوتن و بە پێی زانیاری ئێمە لەهەفتەی داهاتو بەم نزیكانە لە سەر ئاستی باڵا وەفد دێت لەگەڵ وەزارەتی پێشمەرگە كۆدەبنەوە، بەو هیوایەین ڕێكبكەون.
