23 پاسداری ئێرانی لە عێراق كوژراوون
نووچەنێت-زەمان
بەپێی زانیارییەكانی رۆژنامەی ئەلزەمانی چاپی لەندەن، تا ئێستا لە عێراقدا 23 ئەندامی سوپای پاسدارانی ئێران كوژراوون، كە چواریان ئەفسەرن.
رۆژنامەكە دەڵێت گرووپێكی ئەو ئەندامانەی پاسداران لە شارۆچكەی سامەڕڕا و گرووپێكی دیكەشیان لە سنووری بەغدا كوژراوون.
لەو شیعە بیانیانەی لە عێراق كوژراوون دەزگا فەرمییەكانی ئێران دانیان بە كوژرانی دوو ناو كردووە كە یەكێكیان ناوی جاوید حەسەنە و خەڵكی پاكستانە بەڵام ماوەیەكی زۆر بووە لە شاری قومی ئێرانی ژیاوە، تا رووی كردۆتە عێراق بۆ پاراستنی مەرقەدی شیعەكان لە سامەڕڕا و لەوێش بەدەستی داعش كوژراوە.
ئەوەی دیكەشیان شوجاعەت عەلەمدارمۆرجانییە كە ئەفسەری فڕۆكەوانی ئێرانی بووە و لە عێراق كوژراوە. بەڵام رۆژنامەی ئەلزەمان لە سایتی ئەنجوومەنی باڵای دیاریكردنی بەرژەوەندییەكانی ئێرانەوە زانیویەتی كە تەرمی 23 پاسداری ئێرانی كە چواریان ئەفسەر بوون لە سامەڕڕا و بەغدا كوژراوون گەیەنراونەتە نەجەف تا لە مەزارگەی ئیمام عەلی نوێژیان لەسەر بكرێ، دواتر بە ئامادەبوونی حەسەن دانایی فەڕ باڵیۆزی ئێران لە عێراق لە فڕۆكەخانەی نەجەفەوە نێردراونەتەوە بۆ ئێران.