ئەندامێكی مەكتەبی سیاسی پارتی بۆ نوچەنێت: ئێمە و مەكتەبی سیاسی یەكێتی، لەسەر ریفراندۆم هیچ كێشەیەكمان نیە
نوچەنێت: تایبەت
كاكەمین نەجاڕ ئەندامی مەكتەبی سیاسی پارتی دیموكراتی كوردستان، لە لێدوانێكدا بۆ نوچەنێت رایگەیاند، پارتی مامەڵە لەگەڵ مەكتەبی سیاسی یەكێتی دەكات و لەسەر پرسی ریفرراندۆمیش، هیچ كێشەیەك لە نێوان پارتی و یەكێتیدا نیە.
ئەو ئەندامەی مەكتەبی سیاسی پارتی وتی “بوونی جیاوازی لە بۆچوونی ئێمە و یەكێتیدا، شتێكی سرووشتییە، ئەمە ئەوە ناگەیەنێت كە لێكترازابین، چونكە ئێمە لەسەر ریفراندۆم كێشەمان لەگەڵ یەكێتی نیە، ئەو بابەتەیش تەسلیم بە پەرلەمانی كوردستان كراوە و سەرۆك داوای لە پەرلەمان كردووە، كە پەلە بكرێت لە درووستكردنی كۆمسیۆنێكی تایبەت بە هەڵبژاردن و راپرسی”.
كاكەمین نەجاڕ دەربارەی لێدوانی هەندێك بەرپرسی یەكێتی، كە پێچەوانەی بۆچوونی پارتییەوە لەسەر ریفراندۆم و پرسی سەربەخۆیی كوردستانەوە دەدوێن وتی “ئێمە مامەڵە لەگەڵ مەكتەبی سیاسی یەكێتی دەكەین، لێرە و لەوێ یەكێكیان قسەیەك دەكەن، ئێمە مامەڵە لەگەڵ ئەو قسانە ناكەین، بەڵام مەكتەبی سیاسی یەكێتی لەگەڵ ئێمە، هیچ جیاوازییەكیان نیە لەو پرسەدا”.
