بورهان هەژار ئاشکرای دەکات، کێ هاوکاری د. هەڤاڵ ئەبوبەکر بووە لەبڵاوکردنەوەی نوسینەکانی لەرۆژنامەی هاوکاریدا
هەرگیز ناکرێت د. هەڤاڵ ئەبوبەکر نکولی لەوە بکات کە زۆرینەی ئەو نوسینانەی بۆی بڵاوکراونەتەوە گشتییان لە سۆنگەی داکۆکی و هەڵمەتی ئەدەبی قادسیە بوون لە راگەیاندنی بەعسدا
نوچەنێت
کاندیدکردنی د.هەڤاڵ ئەبوبەکر لەلایەن بزوتنەوەی گۆڕانەوە بۆ ئەنجومەنی پارێزگای سلێمانی، و دیاریکردنی وەکو سەرۆکی لیست، کە لەئەگەری سەرکەوتنی دەبێتە پارێزگاری داهاتووی ئەو شارە، قسەو باسی زۆری بەدوایخۆیدا هێنا، راگەیاندنەکانی یەکێتی چەندین بەڵگەیان بڵاوکردەوە، کە تێیدا ئەوە دەخەنە ڕوو ئەو کاندیدەی بزوتنەوەی گۆڕان، لە رۆژنامەکانی سەردەمی دەسەڵاتی بەعسدا، بەتایبەت لەرۆژنامەی هاوکاری، بابەتی لەبەرژەوەندی بەعس نوسیووە، بەو هۆیەوە بەکەسێکی بەعسی دەناسێنن، بەڵام د. هەڤاڵ ئەبو بەکر ئەوە رەتدەکاتەوەو وەک راگەیاندنەکان بڵاویانکردەوە ئەوەی رایگەیاندنووە، ئەو هەڤاڵ ئەبوبەکرەی لەرۆژنامەی هاوکاری بابەتی نوسیوە، ئەو نەبووە، بەڵکو ناوی خوازراوی ، نوسەرو هونەرمەندی کورد بورهان هەژار بووە، ئەو لەرۆژنامەی هاوکاریدا بەو ناوەوە شتی نوسیوە.
نوچەنێت لە بەدواداچونێکدا پەیوەندی کرد بە نوسەرو هونەرمەند بورهان هەژارەوە، کە لەو سەردەمەدا لە رۆژنامەی هاوکاری شتی نوسیووە، هەژار ئەوەی پشت راستکردەوە، کە یەکێک لەنوسینە چاپکراوەکانی ئەو لە رۆژنامەی هاوکاری، ئێستا لە راگەیاندنی کوردیدا بەناوی هەڤاڵ ئەبوبەکرەوە بڵاو کراوەتەوە، دەڵێت” ئەو نوسینە نوسینی منە و بە ناوی ئاشکرای خۆم و ساڵی ١٩٩٠ بڵاوکرایەوە، هیچ رۆژێ لە رۆژن نکۆڵییم لێنەکردووە، چ لەم نوسیینە یانژی هەندەکیتر. گەر دادگایەکیش هەبێت و بخوازێ لێپرسینەوەم لەتەکدا بکات، ئەوا بوێرانە و سەربڵندانە دێمە ئاخافتن و بە بەڵگە و راستیی شێلگیرانە دەیسەلمێنم، کە هۆکار چبووە و نەکەومە گێژاویی خیانەت و مەرامی خۆفرۆشیی بەڵگە قەڵغانێک بووە لە پارێزگارییم، کە دەشێت باس و گێڕانەوەی لێرەدا پێوسیت نەکات”.
بورهان هەژار گومان و سەرسوڕمانی خۆی بەوە رادەگەیەنێت کە” کە بۆچ هەمان نوسینییان لەم کات و رەوشەدا کردە ئامانج ؟ لە تەزویرکرنی ئەو مژارە بەناوی دکتۆر هەڤاڵ ئەبوبەکرەوە”، مەبەستی پشت ئەو تەزویرکردنەش وا دەخاتەڕوو کە” دوو جەمسەری دەبینم، یەکەم بۆ لێدانی هەڵمەتی بانگەشەی هەڵبژاردنە لە دژی گۆڕان و ئەم پاڵێوراوەی وەک سەرۆکی لیست بۆ پارێزگار، لەلایەکیتر بەهەمان شێوە پەشێوی و ئاژاوەگێڕییەکیترە لەهەمبەر من، کە رامکێشنە ناو هەڵچوون و تێکدانی تەرازووی سەنگم گەرچ دوورو نزیک ئەندامی هیچ حیزب و پارتێکی کوردیی نییم و خۆم لە قەرەی هەڵبژاردن و هتد ، نەداوە. لەهەمانکاتدا تەزویرکردنی ئەم بڵاوکراوەیە و دانانی وێنەو ناوی ئەو بە رۆژی روناک ئەوەدەخاتە روو، بۆ وروژندنی هەڵدانەوەو پێشینەی هەڤاڵ ئەبوبەکرە، کە هەڵدانەوەی پێشینەی لە بوونی نوسین و بەرهەم بۆ راگەیاندنی ئەدەبی قادسیە لە رۆژنامەی هاوکارییدا، ئەو دەمەی لاوێکی تەمەن ١٩ ساڵان بووگە”.
هەژار ئەوەش ناشارێتەوە کە ئەو کاندیدەی بزوتنەوەی گۆڕان لە رۆژنامەی هاوکاری نوسینی هەبووە و دەڵێت” نەک هەر من و ئەم هەڤاڵ ئەبو بەکر هەڵەبجەییە، لەسەرتاسەری هوندەری کوردستاندا لە قەڵەم بەبڕشتەکانیش فرە بەرهەم و نوسینییان هەبووە چ نزیک لە راگەیاندنی بەعس، چ بەرهەمی ئەدەبیی و هونەریی . گەر بێتە یادت لە گۆڤاری ( سڤیل ) چەند ساڵ بەر لەنووکە لەلایەن بەڕێزتانەوە لە وروژاندنی بواری دەمانی بەعسدا و بەتایبەتی رۆژنامەی هاوکاریی، هاوپەیڤێنێکتان لەتەکدا کردم بە دوورو درێژی ئەوانەشم ناوزەدکردبوون کە بەرهەمیان نوسییووە. لێرەو لەوێ کەسانێک هەن چونکی لە ناخیاندا گرێیەکی پەنهانی هەس و هەست بەکەمی کەسایەتی دەکەن لە رووی مۆڕالەوە لە بارە دەروونییەکەوە، ترسێکیان لا هەس کە پەنا ببەنە بەر شەرم وترس و خاوەنی بریاری بوێرانەی خۆیان نەبن، بۆ بەرژەوەندی هەلپەرستییان دان بنێنن بە رابردوویاندا بەهەرچ پاساوێک بێت، ئیتر نێوەندی بزاڤی کوردیی تژییە لە پیاوی دەجال، پاشان چەندیین رۆژنامە و بڵاوکراوەیتر هەبووگن نوسینییان بۆ راگەیاندنی قادسیە بە شانازییەوە دەنوسیی، لێ تا نووکە کەم کەسم بینییووە ئەوەندە جوامێریی و لێوەشاوەیی هەبووبێت، نەک پاساو بەڵکە باس لەوە بکات رۆژێ لە رۆژانی رابردوویان چ هەڵپەیەکیان بووە لە بواری بڵاوکردنەوە بۆ ئەدەبی بەعس و شانامەیان دەنوسی، هاوپەیڤینییان لەتەک موستەشارەکان دەکرد “.
بورهان هەژار لەبارەی ئەو قسەیەی د. هەڤاڵ ئەبوبەکر کە لەڕووبەڕووبونەوەیەک لەگەڵ رکابەرە (یەکێتی) یەکەی رایگەیاند(ئەگەر بۆ بەعسم نوسیی بێت، لەبەردەرکی سەردا ئیعدامم بکەن) بۆ نوچەنێت دەڵێت ئەوە” بۆخۆی پەلەقاژێ و راکردنە لەهەمبەر راستییەکدا کە دەخوازێت خۆی بەر لە خەڵک پێچەواشە بکات، جارێ سەرەتا ئەو هەرگیز ناکارێت نکولی لەوە بکات کە زۆرینەی ئەو نوسینانەی بۆی بڵاوکراونەتەوە گشتییان لە سۆنگەی داکۆکی و هەڵمەتی ئەدەبی قادسیە بوون لە راگەیاندنی بەعس بووە، لە رۆژانەمەری کوردییدا. ئەمن بەشبەحالی خۆم دەمانێ ئەو برادەرە کەوتە هەڵپە و بزێویی لە جار جار دەرکەوتنی نوستینەکانیدا لە ئەکادیمیاش نەمابووم، واتە خوێندنم تەواو کردبوو، ئەو چەند ساڵەی کاتی پێڤاژۆی خوێندن بە ( موکافەئە ) لە رۆژنامەی هاوکاری کارم کردووە نەک وەک دەستەی نوسەران کە فەرمانبەرێک بم و راستەخۆ بەرهەمی ببینم.دوورو نزیک نەک پەیوەندییم لەتەکیا نەبووە، بەڵکە نەشمناسییووە، هێندە دەزانم بە هۆی بەڕێزێکەوە کە ئەویش هەر هەڵەبجەیی بوو هەنووکە مامۆستای زانکۆیە لە سلێمانی و بڕوانامەی دکتۆرای هەس، لە دەستەی نوسەرانی هاوکاری بوو، زیاتر نوسین و شیعرەکانی پاڵپێوە دەنرا وەک هاندان و دەستگیرۆیی بۆی وەشان بکرێت..! بەشدار بوونیشی لە سلێمانی لەرێی لقی سلێمانی دەزگای رۆشنبیری و بڵاوکردنەوەی کوردی، وەک هاوکاری پشتگیری دەکرا و ئەز دڵنیاشم تەمەنی ئەو دەمانەی کە تازە هەرزەکارێک بو، بۆ هاتنە پێشەوەو پەلەقاژێ کردن لە ناو و شۆرەت ئامادە بوو هەموو شتێ بڵێت و بڵاویبکاتەوە.. ئیتر ئەوەش ژمارەکانی هاوکارییە ، لەهەمان کاتدا بە دەیانیتر هەس نەک هەر ئەوەندە، بەڵکە بە ناوی نهێنی و خوازراو دەیاننوسی بۆ بەعس و کاریشییان دەکرد بە موکافەئەش، کەس لە گوڵ کاڵترییان پێینائێژێت”.
هەژار قسەکردن لەمەڕ ئەو بابەتە بەدەرفەت دەزانێ کە وەک خۆتی وتی رووبکاتە” ئەو قارەمانەی بە ناوی دەرسیم دیبەگەیی کە ئەو نوسینەی منیان بۆ نارد و خۆی تیا شین مۆر کردەوە، گەر بوێریی تیا هەس بەردەوام بێت، لەسەر ئەو شەکراندنەی لە منەوە دەستیپێکرد، تەنیا کۆچکردوو مەحمود پیرباڵی کردە ئامانج، با کەرەمبکات گەر یەک گەردیلە موویی شکۆمەندیی و جوامێریی هەس لەدوویی ئەوانەدا بگەڕێت کە بە ناوی خوازراو دەیاننوسیی و لای جەنابی عالی و جاشقەڵەم نین، هەنوکە لە راگەیاندنەکانی هوندەری کوردستاندا لە پاڵ پارتەکاندا دەلەوەڕن و لێمان بوونەتە دەموچاوگێڕی سیاسی”.
گۆڤاری سڤیل دوو ساڵ لەمەو بەر دیمانەیەکی رۆژنامەوانی لەگەڵ بورهان هەژار سازکرد، کە تێیدا بەوردی باس لەکارەکانی خۆی و نوسینی لەرۆژنامەکانی بەعسدا دەکات، بۆ خوێندنەوەی ئەو دیمانەیە کلیک بکە …..………………….
