نوچەنێت
شەوی رابردوو چەکدارانی داعش لە سنووری خورماتوو هێرشیان کردۆتە سەر سەنگەرەکانی پێشمەرگە و لە ئەنجامدا هێرشەکەی داعش تێکشکێندرا و ژمارەیەک چەکداریان کوژران، دوو پێشمەرگەش شەهید و شەشی دیکەش بریندار بوون.
عەبدوڵڵا بۆر، فەرماندەی میحوەری خورماتووی هێزەکانی پێشمەرگەی کوردستان بە (رووداو)ی راگەیاند، کاژێر 11:00 ی شەوی رابردوو چەکدارانی داعش لە سنووری گوندی عەبوود هێرشیان کردە سەر دوو سەنگەری پێشمەرگە، بەڵام سەرکەوتوو نەبوون و هێرشەکەیان تێکشکێندرا.
عەبدوڵڵا بۆر ئاماژەی بەوە کردووە، کە لەو هێرشەدا ژمارەیەک چەکداری داعش کوژراون، دوو پێشمەرگەش شەهید و شەشی دیکەش بریندار بوون.
هاوکات کاوە شێخانی، ئەفسەر لە هێزەکانی پێشمەرگە بە (رووداو)ی گوتووە، هێرش بە تەنها بۆ سەر پێشمەرگە نەبووە و لە دوو قۆڵی دیکەشەوە هێرشکراوەتە سەر هێزەکانی حەشدی شەعبی و سوپا.
شێخانی راشیگەیاندووە، لە قۆڵی پێشمەرگە شەڕ و رووبەڕوونەوەی سەخت روویداوە و داعش تێکشکێندراوە، پاشان چەکدارانی داعش لە سێ گوندەوە هێرشیان کردووەتە سەر حەشدی شەعبی و سوپا. تاوەکو ئێستاش زیانەکانی ئەوان نازانرێن.
