نوچەنێت
سەرۆکی هەرێمی کوردستان، بەبۆنەی رۆژی جیهانی کرێکاران پەیامێکی بڵاوکردەوە و پیرۆزبای ئاراستەی سەرجەم کرێکارانی کوردستان کرد و رایگەیاند، كرێکاران چینی زەحمەتکێش و ماندووی وڵاتن.
مەسعود بارزانی، سەرۆکی هەرێمی کوردستان لە پەیجی تایبەتی خۆی لە تۆڕی کۆمەڵایەتی فەیسبووک، پەیامێکی بەبۆنەی رۆژی جیهانی کرێکارانەوە بڵاوکردەوە و رایگەیاند “بە بۆنەی رۆژی جیھانی کرێکار و جەژنی کرێکارانەوە، گەرمترین پیرۆزبایی خۆم ئاراستەی ھەموو کرێکارانی کوردستان، سەندیکای کرێکارانی کوردستان و رێکخراوەکانی داکۆکیکاری مافەکانی کرێکار دەکەم و ھیوای شادی و بەختەوەری بۆ کرێکارانی ئازیز دەخوازم”.
لە بەشێکی دیکەی پەیامەکەیدا، سەرۆکی هەرێمی کوردستان چینی کرێکاران بە چینێکی زەحمەتکێش و ماندووی وڵات دەناسێنێت و دەڵێت “رۆڵی کاریگەریان لە پێشکەوتنی ئابووریی کۆمەڵگە و دابینکردنی ئاسوودەیی و خۆشگوزەرانی ھاووڵاتیاندا ھەیە، دەستخۆشی لە ئەرک و ماندووبوونیان دەکەم”.
بارزانی دەشڵێت “رێزگرتنی مافی کرێکاران و باشترکردنی باری گوزەرانیان و رەچاوکردنی دادپەروەری، ئاماژەن بۆ گەشەسەندنی مرۆیی و ئابووری و پێویستە کوردستان لەو ئاراستەیەدا ھەنگاو بنێت”.
