وەزارەتی ئەوقاف بە بڕیارێک گوتاری هەینی رێکدەخات

نوچەنێت
بەڕێوەبەری پەیوەندییەكان و پێكەوەژیانی ئایینی لە وەزارەتی ئەوقافی حکومەتی هەرێم رایدەگەیەنێت، بە بڕیارێک گوتاری هەینی رێکدەخات و بۆ ئەو مەبەستەش سێ تەوەر دەخاتە بەردەست مامۆستایانی ئایینی و سەرپشکیان دەکات لە هەڵبژاردنی یەکێک لەو تەوەرانە.

شارەزایانی سیاسی و ئەمنی باس لەوە دەکەن، کە بە دووركەوتنەوەی داعش لە سەنگەرەكانی پێشمەرگە و لە بەرەكانی جەنگدا شتێكی گرنگ بوو، دوای نەمانی ئەو رێکخراوە لە موسڵ، پێویستە پێش بە توندڕەوی بگیریەت و رێکگە بە گوتاری توند نەدرێت کە هانی خەڵک بدات بۆ توندڕەوی ئایینی، چونکە یەکێک لە کەناڵەکانی ناردنی گەنجان بۆ ناو رێکخراوە توندڕەوەکان گوتاری لابەلا و توند لە مزگەوتەکاندا بووە. 

مەریوان نەقشبەندی، بەڕێوەبەری پەیوەندییەكان و پێكەوەژیانی ئایینی لە وەزارەتی ئەوقاف و كاروباری ئایینی، بە (رووداو)ی راگەیاند، لە هەرێمی کوردستان بۆ یەکەمجارە وەزارەتی ئەوقاف سیستەمی یەکگوتاری پەیڕەودەکات و گوتاربێژان سەرپشک دەکات لەنێوان سێ تەوەردا. هەروەها پێویستە گوتاری نوێژی هەینی لە 20 خولەک تێپەڕ نەكات.

بەڕێوەبەری پەیوەندییەكان و پێكەوەژیانی ئایینی لە وەزارەتی ئەوقاف، لەبارەی تەوەرەكانی گوتاری هەینی گوتی “لیژنەیەكی پسپۆر لە وەزارەتی ئەوقاف لە كەسانی شارەزا لە بواری شەریعە و گوتار، هەموو سێشەممەیەك سێ تەوەر بۆ گوتاری هەینی دیاریدەكەن، مامۆستایانی ئایینیش ئەگەر شتێكی گەرم لە ناوچەكەیان هەبوو دەتوانن لەپاڵ تەوەری گوتارەکە باسی لێوە بكەن.”