نوچەنێت
ئەمڕۆ سەرۆكی هەرێمی كوردستان، لەگەڵ پێشمەرگە دێرینەكان كۆبووەوە و رایگەیاند، هیچ جیاوازییەك لە نێوان پێشمەرگە نییە، پێشمەرگەش هی هیچ حیزبێك نییە و پێشمەرگەی کوردستانە.
بە گوێرەی ماڵپەری سەرۆكایەتی هەرێمی كوردستان، رۆژی پێنجشەممە 20-4-2017 مەسعود بارزانی، سەرۆكی هەرێمی كوردستان، لەگەڵ شاندی هاوبەشی دەزگای ئەیلول و كۆمەڵەی پێشمەرگە دێرینەكان كۆبووەوە.
لە ماڵپەرەکەی سەرۆكایەتی هەرێمی كوردستاندا هاتووە، کە بارزانی لە كۆبوونەوەكەدا ئەوەی خستەڕوو، كە هیچ جیاوازییەك لەنێوان پێشمەرگەدا نییە و پێشمەرگە، پێشمەرگەی كوردستانە و پێشمەرگەی هیچ حیزبێك نییە.
هەر لەو بارەیەوە رابەر سەید برایم، ئەندامی سەركردایەتی یەكێتی نیشتمانی کوردستان بە (رووداو)ی راگەیاند “لە كۆبوونەوەكەدا گلەیی و رەخنە و پێشنیازی خۆمان سەبارەت بە موچە و مافەكانی پێشمەرگە دێرینەكان خستە بەردەم جەنابی كاك مەسعود بارزانی، ئەویش بەڵێنی پێداین لەگەڵ حكومەتی هەرێمی كوردستان كۆببێتەوە و مافی پێشمەرگە دێرینەكان دابین بكرێت”.
ئەو ئەندامی سەركردایەتی یەكێتی گوتوویەتی، پێشمەرگە خانەنشیكراوەكان دوو مانگ جارێك موچە وەردەگرن، ئێمە داوامان كردووە موچەكانیان مانگانە پێبدرێت، زەویش بدرێتە ئەو پێشمەرگانەی سوودمەند نەبوون.
