نوچەنێت: تایبەت
گوتەبێژی هاتووچۆی سلێمانی رایدەگەیەنێت، لە شاخی گۆیژە ئۆتۆمبیلێك کەوتووەتە خوارەوە و بەو هۆیەوە دوو سەرنشین گیانیان لەدەستداوە و سێ سەرنشینی دیكەش برینداربوون.
لە لێدوانێکی تایبەت بە نوچەنێت، رائید كاروان حەمەسدیق، گوتەبێژی پۆلیسی هاتووچۆی سلێمانی رایگەیاند: ئەمڕۆ سێشەممە 21-3-2017 ئۆتۆمبیلێکی تایبەت لە جۆری كیا سپۆرتاج، کە لەگەڵ شۆفێرەکەیدا چوار سەرنشینی تری تێدابووە، لە شاخی گۆیژە وەرگەڕاوە و کەوتووەتە خوارەوە، لە ئەنجامدا شۆفێرەکە و سەرنشینێك گیانیان لەدەستداوە و سێ کەسی دیکەش برینداربوون. رووداوەکە لە ئەنجامی تیژڕەوی و ئاگانەبوون لە رەوشی شەقامەکە و شارەزانەبوونیان بە رێگاكە دووچاری رووداوەكە بوون.
رائید کاروان گوتیشی، سەرجەم سەرنشینانی ئۆتۆمبیلەكە عەرەبن و خەڵكی باشوور و ناوەڕاستی عێراقن، کە بە مەبەستی گەشتکردن هاتوونەتە شاری سلێمانی.
ئەو گوتەبێژەی پۆلیسی هاتووچۆی سلێمانی دەڵێت، هەر ئەمڕۆ دوو رووداوی هاتووچۆی دیکە روویداوە، بەڵام گێانلەدەستدانی تێدانەبووە، کە رووداوێکیان لەدەروەی شار بووە و ئەوی تریان لە نزیکی تاسڵوجە وەرگەڕاوە و یەک دوو سەرنشین بەسوکی بریندار بوون.
