نوچەنێت: تایبەت
پەرلەمانتارێکی گۆڕان رایدەگەیەنێت، باشترین دەرفەت ئەوەیە لایەنە سیاسیەکان رێكبکەون لەسەر کاراکردنەوەی پەرلەمان تا هەڵبژاردن لەکاتی خۆیدا بکرێت.
رۆژی دووشەممە 6-3-2017 حكومەتی هەرێمی كوردستان بودجەی هەڵبژاردنی پەرلەمانی كوردستان و سەرۆكایەتی هەرێمی كوردستانی پەسندكرد، كۆمیسیۆنی هەڵبژاردنەکانیش دەڵێت، دەبێ رۆژی 6-11-2017 هەڵبژاردن بكرێت.
لەلێدوانێکی تایبەت بە نوچەنێت، قارەمان قادر، ئەندام پەرلەمانی کوردستان لە فراکسیۆنی گۆڕان، لەبارەی ئەنجامدانی هەڵبژادنی پەرلەمانی کوردستان و سەرۆکایەتی هەرێم رایگەیاند: لە هەموو حاڵەتەکان باشترین دەرفەت ئەوەیە، کە لایەنە سیاسیەکان رێكبکەون لەسەر دەستبەکاربوونی پەرلەمان لەسەرکارەکانی خۆی و هەڵبژاردن لەکاتی خۆیدا بکرێت.
قارەمان قادر، بە پێویستی دەزانێت پێش ئەنجامدانی هەڵبژاردن، پەرلەمانی کوردستان کارابکرێتەوە، دەڵێت “هەر کاتێك پەرلەمان، کە مەرجەعی سیاسی و یاسایی خەڵکی کوردستانە کاراکرایەوە، ئەو کاتە دەتوانرێت لەوێوە بڕیارێک دەربکرێت و هەڵبژاردن لەکاتی خۆیدابکرێت بکرێت”.
