تەوەر… دەزگای خەندان و میدیای مارکسی
موحسین کەریم: خەندان لە بنەڕەتدا ئامانجی میدیاکە نیە ئەوەندەی ئامانجیان لێدانە لە خودی مارکس
نوچه‌نێت: ماڵپەڕی دەزگای خەندان لە وەڵامی هێرشەکانی کەناڵی کەی ئێن ئێن. پەنای بۆ بەکارهێنانی دەستەواژەی میدیای مارکسی بردووە، کە چەند ڕستەیەک لەو بارەوە دەڵێن، وەک ئەوەی لە وەڵامەکەیاندا بۆ کەی ئێن ئێن هاتووە”میدیای مارکسیستیی بڕوای وایه ئه‌وه‌ی ئه‌و ده‌یڵێت راسته‌و ئه‌وه‌شی وه‌ک ئه‌و نییه هه‌ڵه‌یه، با ئیدی باشیش بێت. لۆجیکی میدیای ناو بازنەی بیری مارکسیزمی، پێمی ده‌ڵێت مادام من نایکه‌م خراپه و گه‌ر منیش بیکه‌م قه‌ینا، گرنگ ئه‌وه‌یه تۆ نه‌بیت، میدیای مارکسیستی، گه‌ر هێرشی له‌سه‌ر نه‌بێت ئه‌وا خۆ خۆریشه”.
لەم تەوەرە مەبەست لە قسەکردن نییە لەسەر شەڕی ئەو دوو دەزگا، بەڵکو مەبەست ئەوەیە کە بزانرێت ئایا شتێک هەیە بەناوی میدیای مارکسی، ئایا ئەوە ئەسڵی میدیای مارکسی و کاری میدیای مارکسییە؟.
بەبڕوای ئێوە بەکار هێنانی دەستەواژەی میدیای مارکسی پێدانی ناسنامەیەکی دروستە بۆ ئەو میدیایانەی بەو جۆرێک کار دەکەن کە هێرش بکەن یان راستی نەبینن؟. پێتان وایە بۆچی لەوەڵامی دوو حزبدا، ناوی میدیای مارکسی دێتە ئارا ؟ هۆکارو مەبەست چییە؟.
موحسین کەریم: سەرەتا بەکارهێنانی دەستەواژەی میدیای مارکسی دەتوانێ چەواشەکارانەبێت، لە کاتێکدا چەندین گروپ‌و رێکخراو و لایەن هەن کە بەجۆرێک خۆیان بە مارکسی دادەنێن یان بە مارکسی ناودەبرێن، بەڵام جیاوازی زۆر بنەڕەتی لە نێوانیاندا هەیە. ئەگەر لەو روەشەوە کە ئەوان پۆلێنیان کردوە تەماشای بکەین، دیسانەوە نەگونجاوە. چ کاتێك حیزبی شیوعی کوردستان کەوتۆتە بەرەی دژی دەسەڵات‌و رەخنەگر لەو دەسەلاتەوە، لە کاتێکدا میدیای رەسمی بۆرژوازی کوردو حیزبەکانی ئەو حیزبە بە “حیزبی رەسەنی مارکسی!” دەزانن؟.
بەڵام بۆچی ئەوان ئەم دەستەواژەیە بەکاردێنن؟ بەبڕوای من لە بنەڕەتدا ئامانجیان میدیاکە نیە ئەوەندەی ئامانجیان لێدانە لە خودی مارکس‌و بیروباوەڕەکەی. بیروباوەرو رێبازی مارکسیزم بیروباوەرو رێبازێکی سیاسی- کۆمەڵایەتی رەخنەگرانەیە لە بۆرژوازی‌و سیستەمی سەرمایەداری لە روانگەی ژیان‌و گوزەران‌و بەرژەوەندیە ئابوری- سیاسیەکانی چینی کرێکارەوە. مارکسیزم ئەو هۆکارە فکری‌و سیاسی‌و رێکخراوەییە دەداتە دەستی چینی کرێکار کە لەرێگایەوە بتوانێ کۆتایی بە سیستەمی نایەکسان‌و چەوسێنەرانەی سەرمایەداری و بۆرژوازی بهێنێ‌و کۆمەڵگایەکی یەکسان بۆ سەرجەم کۆمەڵگا دابین بکات. بۆیە مارکسیزم بیروباوەرو جیهانبینیەکی رەخنەگرانەیە کە رووی لەپێش‌و لە ئایندەیە نەك پیرۆزگرتنی ئێستاو لاوانەوە بۆ رابردوو. ئەم ناوەرۆکە رەخنەگرانەی مارکسیزمە کە سەرجەم چینی بۆرژوازی‌و حیزب‌و کەسایەتیە سیاسیەکانی‌و میدیای بۆرژوازی بەگشتی لێی قەڵس‌و نیگەرانن.
دەسەڵاتدارێتی کوردستانیش، وەکو نوێنەرایەتی سیاسی بۆرژوازی کورد لە مارکسیزم ناڕەحەت‌و نیگەرانە بۆیە ئەم پڕوپاگەندەیە دژی مارکسیزم بەرێدەخات. دەیەوێ مارکسیزم وەکو شەیتان بە خەڵك بناسێنێ، تا چینی کرێکاری کوردستان خەیاڵی تێکدانی بەهەشتی سامان‌و دەسەڵاتی ئەوان نەکەن! هەر لێرەشەوە دەتوانین وەڵامی ئەو بەشەی پرسیارەکەی ئێوە وەربگرینەوە کە بۆچی دوو لایەن کە هیچیان مارکسی نین، بەڵام لەرێگای هێرشکردنە سەر مارکسیزمەوە هێرشی راگەیاندنی خۆیان بۆسەریەکتر دەبەنەپێشەوە! ئامانج شەڕە لەگەڵ مارکسیزم لەرێگای وردەبۆڵەی ناوخێزانی بۆرژوازی کوردەوە بەتایبەتی لە دەورانێکدا کە دەسەلاتی بۆرژوازی کورد لە دوای ١٧ شوباتی پارەوە کەوتۆتە بەر رەخنەی جەماوەری چەوساوەو بێبەش‌و لاوانی مافخوراوی کوردستانەوە. دەسەڵات گلەیی لە ئۆپۆزیسیۆن دەکات کە بۆچی عەیبەکانی دەسەڵاتەکەیان دەخاتەروو، چونکە رەنگە دوژمنانی چینایەتیمان (هەڵسوڕاوانی مارکسیست‌و کۆمۆنیستی چینی کرێکارو لەورێگایەشەوە خودی چینی کرێکار) سوودی لێوەربگرن‌و دەسەڵاتەکان تووشی مەترسی بکەن‌و سەرمایەکانمان لەکیس بچێت!.
دوای ئەم رونکردنەوەیە دەکرێ بچێنە سەر لایەنێکی دیکەی مەسەلەکە. ئەویش ئەوەیە کە ئایا مارکسیستەکان یان کۆمۆنیستەکان، بەتایبەتی ئەوەی مەبەستی سەرەکی دەزگای خەندانە، کۆمۆنیزمی کرێکاری‌و حیزبی کۆمۆنیستی کرێکاری، بڕوامان وایە کە ئەوەی ئێمە دەیڵێین‌و دەیکەین راستەو باشەو ئەوەشی وەکو ئێمە نیە هەڵەیەو خراپە!؟ من دەتوانم بەراشکاوی بڵێم کە ئەوە میسۆدی ئێمە نیە، بەڵکو ئەوە میسۆدی “جۆرج بۆش”بوو کە هەردوو حیزبی دەسەڵاتداری بۆرژوازی کوردو سەرجەم بزوتنەوەی ناسیۆنالیستی کورد بەفریشتەی رزگاری ناوی دەبەن! ئێمە دەکرێ هەڵە یان راست بین وەکو هەموو کەس‌و لایەنێکی دیکە، بەڵام ئێمە وەکو بزوتنەوەیەکی کۆمەڵایەتی-سیاسی سەر بەچینێکی دیاریکراوی کۆمەڵگا(چینی کرێکار) رەخنەمان لە سیستەم‌و دەسەلاتی سیاسی کوردستان هەیەو بەو سیستەم‌و دەسەلاتەی نازانین کە نوێنەری بەرژەوەندی سیاسی- ئابوری و کۆمەڵایەتی چینی کرێکارو خواست‌و ئومیدەکانیان بێت بۆ ژیانێکی باشترو ئینسانی و یەکسان، بۆیە ئەوە بەکاری خۆمان نازانین کە بەشانوباڵی ئەم دەسەڵاتە چینایەتی‌و نایەکسانەدا هەڵدەین! کاری ئێمە ئەوەیە کە گەردوخۆڵی وەهمو خۆشباوەری بە بۆرژوازی کوردو دەسەلات‌و حیزبە سیاسیەکانی لەسەر تێگەیشتن‌و لێکدانەوەی جەماوەر کرێکارو زەحمەتکێش پاك بکەینەوەو بە بەرژەوەندیە چینایەتیەکانی خۆیان هوشیاریان بکەینەوە. گلەیی ئەوان لە ئێمە ئەوەیە!.
