نوچەنێت-قطرە
میدیاکانی ئەمریکا لە زاری بەرپرسانی هەواڵگری و زانیاری ئەم وڵاتەوە رایانگەیاندووە، کە کۆشکی سپی بە مەبەستی ئەنجام دانی ئۆپەراسیۆنێکی سایبەری بۆ سەر روسیا خەریکی خۆئامادەکردنە.
ئەم سەرچاوانە دەڵێن ئامانج لەم هێرشانە، بەرپەرچ دانەوەی سیاسەتی دەستوەردان و هێرشی سایبەری مۆسکۆیە، کە دەیهەوێت ئاراستە و ئەنجامی هەڵبژاردەکانی سەرۆکایەتی لەم ولاتە بگۆڕێت.
کەنالی (ئێن. بی. سی) لەم بارەیەوە دەڵێت: چەند سەرچاوەیەکی باوەڕپێکراو هەواڵی ئەم ئۆپەراسیۆنەیان ئاشکرا کردووە، بەڵام ئامادە نەبوون وردەکاری زیاتر بخەنەڕوو.
بە گوتەی سەرچاوەکان، ئامانجەکانی ئەم هێڕشە سایبەریانەی لای ئەمریکا پێشوەخت دیاریکراوە و کۆشکی سپی بۆ قۆناغەکانی دواتری ئەم ئۆپەراسیۆنە ئامادە دەکات.
ئەفسەرانی ئەمنی و هەواڵگری پێشووی ئەمریکا پێیان وایە، ئەم هێرشانە دەتوانێت بۆ شەخسی ڤێلادیمیر پوتین، سەرۆککۆماری روسیا دەرهاویشتە و تێچووی زۆری بە دواوە بێت. چونکە لە خۆیدا ئەم هێرشانە وەڵامێکە بۆ دەستوەردانی سایبەری روسیا لە رەوتی هەڵبژاردەنکان و خودی ئەمریکا.
ئەمە لە کاتێکدایە، کە ماریا زاخاروا، گوتەبێژی وەزارەتی دەرەوەی روسیا رۆژی پێنجشەممەی رابردوو هێرشی سایبەری ئەمریکای بۆ سەر مۆسکۆ بە هەڕەشەیەکی ناڕوون وەسفکرد.
