نوچەنێت: تایبەت
بەرپرسێكی سوپای عێراق رایدەگەنێت، ئاگر لە بیرە نەوتییەكانی گەیارە بەردەوامە و تا ئێستا 50%ی ئاگرەكە كۆنترۆڵ كراوەتەوە.
لە 25-8-2016، ناحیەی گەیارە كۆنترۆڵ كرایەوە لە لایەن سوپای عێراق، لە گەڵ كۆنتڕۆڵ كردنەوەی گەیارە تیرۆرستانی داعش چەند بیرە نەوتێكی گەیارەیان تەقاندەوە، ئاگرێكی زۆر لە نێو كوچە و كۆلانەكانی گەیارە کەوتووەتەوە و تاوەكو ئێستا بە تەواوی كۆنترۆڵ نەكراوەتەوە.
لە لێدوانێكی تایبەت بە نوچەنێت، رائید ئەمین شێخانی، ئەفسەر لە سوپای عێراق، لە بارەی ئەو ئاگرەی ماوەیەكە لە گەیارە كەوتۆتەوە رایگەیاند: تیمەكانی ئاگر كوژینەوە بۆ بیرە نەوتییەكانی گەیارە، بەردەوامە بەهۆی زۆری ئاگرەكە، تا ئێستا كۆنتڕۆڵ نەكراوە و دووكەڵی ئەو ئاگرە بەردەوامە و خەڵكی زۆر بێزار كردووە.
رائید ئەمین شێخانی گوتی، لە ئێستا دا حەوت تیمی سەڵاحەدین كار بۆ كوژاندنەوەی ئەو ئاگرە دەكەن، بەڵام لە بەر زۆری ئاگرەكە و دووکەڵی رەشی زۆری ئاگرەكە دووبارە سەرهەڵدەداتەوە.
شێخانی دەڵێت، لە گەڵ كەوتنەوەی ئاگرەكە تا بە ئەمرۆ دەگات 50%ی ئاگرەكە كۆنترۆڵ كراوەتەوە، تیمەكانیش لە بەیانی تا ئێوارە خەریكی كۆنترۆڵكردنەوەی ئاگرەكەن، بەڵام كاتێكی زۆری دەوێت تا بە تەواوی ئاگرەكە كۆنترۆڵ بكرێتەوە، لە بەر زۆری ئاگرەكەش خەڵكەكە نەگەراوەتەوە گەیارە.
