پەرلەمانی عیراق پەکخراوە

نوچەنێت

پەرلەمانی عێراق بەسەر دووبەرەدا، دابەشبووە ئەگەر هەیە بۆ یەكلاكردنەوەی ململانێكانی ناو پەرلەمانەكە پەنا بۆ دادگای فیدراڵی ببرێت.

لەرۆژی پێنج شەممەی رابردووەوە، بە هۆی باسکردن لە ئەنجامدانی چاکسازییەوە،  پەرلەمانی عێراق دابەشی دوو بەرە بووە، كە بەرەی یەكەم ئەو پەرلەمانتاران، لەگەڵ مانەوەی دەستەی سەرۆكایەتی پەرلەمانی عێراقن‌و بەرەی دووەمیش ئەو پەرلەمانتارە مانگرتووانەن، كە دەستەی سەرۆكایەتی پەرلەمانیان لەكارخستووە.

پەرلەمانتارە مانگرتووەكان، كە زۆرینەن‌و باس لەوە دەكرێت ژمارەیان گەیشتووەتە 204 پەرلەمانتار، رۆژی پێنج شەممەی رابردوو لەكۆبوونەوەیەكی نائاساییدا بەزۆرینەی دەنگ دەستەی سەرۆكایەتی پەرلەمانیان لەكارخست.

ئەو پەرلەمانتارانە، ئێستا سوون لەسەر ئەوەی دەستەی سەرۆكایەتی پەرلەمان لەكارخراون‌و بڕیارە ئەمڕۆش كۆبوونەوەی نائاسایی بەسەرۆكایەتی عەدنان جەنابی، وەك بەتەمەنترین پەرلەمانتار كۆبوونەوەیەكی تر بكەن‌و لێپرسینەوە لەحەیدەر عەبادی سەرۆك وەزیرانی عێراق بكەن.

لەلایەكی ترەوە ئەو پەرلەمانتارانەی لەگەڵ دەستەی سەرۆكایەتی پەرلەمان‌و هەنگاوەكانی پەرلەمانتارە مانگرتووەكان، بە”نایاسایی” ناودەبەن، چەند هەوڵێكیاندا بۆ ئەوەی ئەمڕۆ شەممە لەدەرەوەی هۆڵی پەرلەمان، كە پەرلەمانتارە ناڕازییەكان مانیان تێدا گرتووە، كۆبوونەوەیەك بكەن، بەڵام بەهۆی نەبوونی رێژەی یاسایی بۆ كۆبوونەوە، كۆبوونەوەیەكیان بۆ چەند رۆژێك دواخست.
دواین هەوڵیش، كە ئێستا لەلایەن ئەو پەرلەمانتارانەوە لەئارادایە، ئەوەیە دەیانەوێت پەنا بەرن بۆ دادگای فیدراڵی بۆ ئەوەی كێشەو ململانێكان یەكلابكاتەوە.

ناكۆكی پەرلەمانتاران لەسەر ئەو هەوڵانەی حەیدەر عەبادی سەرۆك وەزیرانی عێراقە، كە ماوەیەكە دەستیپێكردووە بۆ گۆڕانكاری لەحكومەتی عێراق.