نوچەنێت
بەڕێوەبەرایەتیی مانگی دەستکردی ”نیلسات“ بڕیاریداوە پەخشی کەناڵێکی ئیسلامی حزبوڵڵای لوبنانی نزیک لە ئێران لەسەر مانگە دەستکردەکە رابگرێت.
بە گوێرەی هەواڵێکی (ئەلعەرەبییە)، بەڕێوەبەرایەتیی نیلسات پەیامێکیان بۆ وەزارەتی گەیاندنی لوبنانی ناردووە و ئاگاداریان کردوونەتەوە، کە بڕیارەکە لە سەعات 8ـی سەر لە بەیانیی رۆژی چوارشەممە ٦-٤-٢٠١٦، چووەتە بواری جێبەجێکردنەوە.
ئەو مانگە دەستکردە راگرتنی پەخشی کەناڵی ”مەنار“ی سەر بە حزبوڵڵای لوبنانی، کە حزبێکی شیعەیە، بۆ ئەوە گێڕاوەتەوە، کە ”یاساکانی پێشێل کردووە و پرۆگرامی تائیفی پێشکەش کردووە”.
لە مانگی کانوونی یەکەمی ساڵی ٢٠١٥، مانگی دەستکردی ”عەرەبسات“یش پەخشی کەناڵی مەناری راگرت، بەهۆی ئەوەی ”دەقەکانی پێشێل کردووە و لە رێککەوتنی شەرەفی راگەیاندنی عەرەبی دەرچووە”.
