سوپای عێراق له‌ لاوازترین و خراپترین سوپاكانی جیهانه‌

نوچه‌نێت- گڵۆباڵ فایه‌ر پاوه‌ر

له‌ نوێترین راپۆرتیدا پێگه‌ی ” گڵۆباڵ فایه‌ر پاوه‌ر” له‌ به‌رواری 23ی ئازاری ئه‌م مانگه‌، ده‌رباره‌ی به‌هێزترین سوپاكانی جیهان كه‌ 126 ده‌وڵه‌ت ده‌گرێته‌وه‌،  ده‌ركه‌وتوه‌ كه‌ سوپای ئه‌مریكا به‌هێزترین سوپای جیهانه‌ و سوپای میسریش به‌هێزترین سوپای وڵاته‌ عه‌ره‌بییه‌كان و ئه‌فریقایه‌، ته‌نانه‌ت له‌ سوپای وڵاتانی ئه‌مریكای لاتینیش به‌هێزتره‌ و له‌سه‌ر ئاستی جیهانیش، ریزبه‌ندی ژماره‌ 18 ی گرتوه‌.

ئه‌وه‌ی جێگه‌ی سه‌رنجه‌ له‌ راپۆرته‌كه‌دا ، سوپاكانی ئاسیا و ئه‌وروپا له‌ 21 پله‌ی پێشه‌وه‌ی ریزبه‌ندییه‌كه‌دان جگه‌ له‌ سوپای میسر.

سوپای ئه‌مریكا یه‌كه‌می جیهانه‌ و له‌ دوای ئه‌ویش سوپای روسیا و پاشان چین، له‌دوای ئه‌و سوپای هیندی و به‌ریتانی و فه‌ره‌نسی دێن.

سوپای كۆریای باشور له‌ پله‌ی حه‌وته‌مدایه‌، له‌كاتێكدا سوپای ئه‌ڵمانیا له‌ پله‌ی هه‌شته‌مدایه‌، ژاپۆن له‌ پله‌ی نۆیه‌م و توركیا له‌ پله‌ی ده‌هه‌مدایه‌.

له‌ رۆژهه‌ڵاتی ناوه‌ڕاستدا سوپای ئیسرائیل، وه‌ك به‌هێزترین سوپا ناوی هاتوه‌ و دوای سوپای توركیا ، كه‌ پله‌ی یانزه‌هه‌مینی گرتوه‌ ، پاشان سوپای میسر له‌ پله‌ی 18 و سوپای ئێران له‌ پله‌ی 23 و جه‌زائیر له‌ پله‌ی 27 و سعودیه‌ له‌ پله‌ی 28دایه‌.

هه‌روه‌ها سوپای سوریا پله‌ی 42 ی گرتوه‌ دوای ئه‌ویش مه‌غریب له‌ پله‌ی 49دایه‌، راسته‌وخۆ سوپای ئیماراتی به‌دوادا دێت له‌ پله‌ی 50دا، پاشان تونس له‌ پله‌ی 58 و ئه‌رده‌ن له‌ پله‌ی 65 و عوممان له‌ پله‌ی 69دایه‌.

سوپای كوێت له‌ پله‌ی 71 و قه‌ته‌ر له‌ پله‌ی 77 و یه‌مه‌ن له‌ پله‌ی 79 و به‌حره‌ین له‌ پله‌ی 83 و لوبنان له‌ پله‌ی 86 دایه‌.

ریزبه‌ندییه‌كانی دوای ژماره‌ 100، سوپای سودان له‌ پله‌ی 101 و دوای ئه‌ویش عێراق كه‌ جه‌نگ له‌ دژی داعش ده‌كات له‌ پله‌ی 112دایه‌، سوپای لیبیاش له‌ پله‌ی 126دایه‌ كه‌ دوا پله‌ی ریزبه‌ندییه‌كه‌یه‌ له‌ راپۆرته‌كه‌دا.