نوچەنێت
سەرۆکوەزیرانی عێراق وێڕای دەربڕینی دژایەتی لە هەر جۆرە دەستێوەردان وناردنی هێزی زەمینی بۆ سوریا دەڵێت: تەنها چارەسەری قەیرانی سوریا دەبێت سیاسیانە بێت.
حەیدەر عەبادی، لە وتوێژ لە گەڵ ئاژانسی سپۆتنیک، گوتویەتی: هەڵوێستی ئێمە لە بارەی دژایەتیمان لە گەڵ دەستێوەردانی دەرەکی لە لە کاروباری ناوخۆیی وڵاتان لە جێی خۆیەتی و هەر جۆرە دەستوەردانی زەمینی لە راستای قووڵتر بوونەوەی قەیرانی سوریادایە، لەوەش بترازێت دەرهاویشتەی مەترسیداری بۆ عێراق و ناوچەکە بەدوادادێت.
عەبادی، جەخت لەوە دەکاتەوە، کە وڵاتانی جیهان لە ئەنجامی دەستێوەردانی زەمینی و بەرین بوونەوەی کێشە و ململانێی سیاسی، تایفی و نەتەوەی، ئەمن و ئاسایشی خۆیان لە دەست دەدەن.
سەرۆکوەزیرانی عێراق، لە درێژەی وتوێژەکەی، جەخت لە چارەسەری سیاسیانە بۆ قەیرانی سوریا دەکاتەوە و دەڵێت، خودی سوریەکان دەبێت بڕیار لە سەر چارەنووسی خۆیان بدەن.
حەیدەر عەبادی، هەروەها هیواخوازە، کە سوریا ببێتە دەروازەی ئەمن و ئاسایشی دایمی و پشتیوانی وپێشوازی عێراق لە ئاگربەستی سوریا، دووبارە دەکاتەوە.
