نوچەنێت
وەزیری ناوخۆی عێراق، لە کۆبوونەوەی وەزیرانی ناوخۆی وڵاتانی عەرەبی ئامادە نابێت حزبوڵڵای لوبنانی بە رێکخراوێکی تیرۆریستی بناسێنێت.
رۆژی چوارشەممە 2ـی ئاداری 2016، وەزیرانی ناوخۆی وڵاتانی عەرەبی لە تونس کۆبوونەتەوە و بەیاننامەیەکیان دەرکرد.
لە کۆبوونەوەکەدا بە زۆرینەی دەنگ، حزبوڵڵا بە رێکخراوێکی تیرۆریستی ناسێنراوە و ئەم هەنگاوەی وەزیرانی ناوخۆ دوای بڕیاری ئەنجومەنی هاریکاریی وڵاتانی کەنداوی عەرەبی دێت، کە رۆژی چوارشەممە حزبوڵڵای خستە لیستی تیرۆرەوە و بڕیاری دا بە یاسای رووبەڕووبوونەوەی تیرۆر مامەڵە لەگەڵ سەرکردە و ئەندامانی بکات.
بەپێی هەواڵی میدیا عێراقییەکان، محەمەد ئەلغەبان، وەزیری ناوخۆی عێراق وەک ناڕەزایی دەربڕین لە کۆبوونەوەکە هاتووەتە دەرەوە و رەتیکردووەتەوە حزبوڵڵا. بە تیرۆریست بناسێنێت.
حزبوڵڵای لوبنانی، رێکخراوێکی چەکدارییە و لەلایەن ئێرانەوە پشتگیریی دەکرێت و لە شەڕی ناوخۆیی سوریا، چەکدارەکانی، پشتگیریی رژێمی سوریا دەکەن.
