نوچەنێت
لیژنەی لێکۆڵینەوەی سەر بە نەتەوەیەکگرتووەکان رۆژی دووشەممە، دەوڵەتی سوریا-یان بە کوشتاری بە کۆمەڵی زیندانیان و ئەنجامدانی تاوانی جەنگی تۆمەتبار کرد.
بە پێی ئەم راپۆرتە، ژمارەیەکی زۆر لە خەڵکی مەدەنی ودەست بەسەرکراو، لە ژێر ئەشکەنجە وبە هۆی ئازار و لێدانەوە کوژراون و ژمارەیەکیش بە هۆی تینویەتی، دۆخی خراپی خواردن و نەبوونی خزمەتگوزاری پزیشکی گیانیان لە دەست داوە.
ئەم راپۆرتەی نەتەوەیەکگرتووەکان بە پێی کۆمەڵێک بەڵگە و وتووێژ ئامادە کراوە و بۆ یەکەم خۆپیشاندانی خەڵکی ئەم وڵاتە لە مارسی ٢٠١١، دەگەڕێتەوە.
لە راپۆرتەکەدا هاتووە: لە ماوەی چوار ساڵ و نیوی رابردوودا هەزاران کەسی دەست بەسەرکراو لە لایەن لایەنەکانی شەڕ لە سوریا کوژراون.
دەگوترێ زۆربەی قوربانیەکان لە زیندانەکانی دەوڵەتی سوریا گیانیان لە دەست داوە.
لە بەشێکی دیکەی راپۆرتەکەدا هاتووە: دەوڵەتی سوریا رۆڵی سەرەکی هەیە لە ئەنجامدانی تاوانی جەنگی، بەڵام ئۆپۆزسیۆنی ئەم وڵاتەش بە تایبەت داعش دەستێکی باڵای هەبووە لە کوشتار و ئەشکەنجەی زیندانیان.
