نوچەنێت.هەولێر:
بەرپرسی پەیوەندییە نیشتمانی و عێراقییەكانی پارتی رایدەگەێنێت،جارێكی دیكە ئەو پۆستانە بە گۆڕان نادەینەوە كە لە پێكهێنانی حكومەت پێمان دابوون.
ئەحمەد كانی،بەرپرسی پەیوەندییە نیشتمانی و عێراقییەكانی پارتی دیموكراتی كوردستان، بە (باسنیوز)ی ڕاگەیاندوە:”هیوا دەخوازین ڕێككەوتن لە نێوان یەكێتی و پارتی درووست ببێت و هەردوو لامان هاوڕاین، بەبێ پارتی و یەكێتی، كوردستان بەڕێوە ناچێت،بەڵام مانای ئەوە نییە كە خەڵكی دیكە لەگەڵماندا هاوبەش نەبێت، بڕوامان بەوەیە كە هەردوولا بە ڕێككەوتن بگەین، جا لە ژێر هەر ناوێك بێت”.
ئەو بەرپرسەی پارتی ئەوەشی خستەڕوو:”لە كاتی پێكهێنانی حكومەتدا،لەگەڵ یەكێتی،ئامانجمان ئەوەنییە هیچ لایەنێك فەرامۆش بكەین،بەڵام بەپێی قورسایی خۆیان مافیان پێ دەدەین”.
سەبارەت بە پۆستەكانی بزووتنەوەی گۆڕانیش ئەحمەد كانی ئەوەی ئاشكرا كرد:”جارێكی دیكە ئەو پۆستانە بە گۆڕان نادەینەوە كە لە پێكهێنانی حكومەت پێمان دابوون”.
