نوچەنێت.هەولێر:
سەرۆکى فراکسیۆنى گۆڕان داوا دەکات دامەزراوە شەرعییەکانى عێراق رۆڵیان لە چارەسەرکردنى کێشەکانى هەرێم هەبێت.
ئەمشەو کۆبوونەوەى هەرسێ سەرۆکایەتییەکەى عێراق و سەرۆکى کوتلەسیاسیەکانى ناو پەرلەمان ونوێنەرانى پارتە سیاسییەکانى عێراق بەڕێوەچوو،لەبارەى کۆبوونەوەكە، هۆشیار عەبدوڵڵا سەرۆکى فراکسیۆنى گۆڕان لە لێدوانێکى رۆژنامەوانیدا كە وێنەیەكی بۆ نوچەنێت نێراوە رایگەیاندوە:لە کۆبوونەوەکەدا ئەوەمان خستەڕوو کە لەنێوان دامودەزگاکان شەرعییەکانى عێراقدا پەیوەندییەکى تەندروست بوونى نییە.
وتیشى:لەکۆبوونەوەکەدا ئاماژەم بەوەشدا کە قەیران و کێشەکانى هەرێمى کوردستان،پەکخستنى دامودەزگا شەرعییەکانە و داوامان کرد دامەزراوە شەرعییەکانى عێراق رۆڵیان لە چارەسەرکردنى کێشەکانى کێشەکانى هەرێمى کوردستان هەبێت.
سەرۆکى فراکسیۆنى گۆڕان لە ئەنجومەنى نوێنەرانى عێراق، ئەوەشى ئاشکرا کرد: “لەسەر داواى ئێمە لە بەلاغى کۆتایى کۆبوونەوەکە ئاماژە کرا بە کێشە سیاسییەکانى عێراق و هەرێم وجەختکردنەوە لە چارەسەرکردنیان”.
لەبارەى کێشە و قەیرانى پەکخستنى پەرلەمانی کوردستان و رێگەگرتن لە سەرۆکى پەرلەمان كە بچێتە ناو هەولێر، هۆشیار عەبدوڵڵا وتى: لەو کۆبوونەوە ئەوەمان باسکرد کێشەى سیاسى لە هەرێمى کوردستان پەکخستنى دامودەزگا شەرعییەکانى هەرێمى کوردستانە و لەو روەوە داوامان لە سەرۆک کۆمارکرد کە بەشداربوو لە کۆبوونەوەکە دەسەڵاتى دەستورى خۆى بەکاربهێنێـت بۆ چارەسەرکردنى ئەو کێشەیە.
